ໃນລະຫວ່າງວັນທີ 8-11 ພຶດສະພາ 2024, ສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້, ຕິດຕາມການນໍາພາ-ຊີ້ນໍາການຈັດຕັ້ງປະຕິບັດວຽກງານກໍ່ສ້າງພັກ, ພະນັກງານ ແລະ ວຽກງານປັບປຸງກົງຈັກການຈັດຕັ້ງ ຕິດພັນກັບການກະກຽມ ແລະ ດໍາເນີນ ກອງປະຊຸມໃຫຍ່ 3 ຂັ້ນຂອງພັກ ທົ່ວອົງຄະນະພັກແຂວງຈໍາປາສັກ, ໃຫ້ກຽດຕ້ອນຮັບຢ່າງອົບອຸ່ນໂດຍ ສະຫາຍ ອາລຸນໄຊ ສູນນະລາດ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ຮັກສາການເຈົ້າແຂວງຈໍາປາສັກ ພ້ອມດ້ວຍບັນດາສະຫາຍ ຄະນະປະຈໍາພັກແຂວງ.
ໂອກາດນີ້ ສະຫາຍ ອາລຸນໄຊ ສູນນະລາດ ໄດ້ລາຍງານສະພາບໂດຍຫຍໍ້ໃນການເຄື່ອນໄຫວນໍາພາ-ຊີ້ນໍາການຈັດຕັ້ງປະຕິບັດວຽກງານຮອບດ້ານຂອງແຂວງ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ພ້ອມນີ້ ບັນດາສະຫາຍຄະນະປະຈໍາພັກແຂວງ ກໍໄດ້ສົນທະນາແລກປ່ຽນບົດຮຽນກ່ຽວກັບວຽກງານກໍ່ສ້າງພັກ, ພະນັກງານ ແລະ ວຽກງານປັບປຸງກົງຈັກການຈັດຕັ້ງ ຕິດພັນກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ.
ຈາກນັ້ນ ສະຫາຍ ນາງ ບຸດສະດີ ທະນະເມືອງ ພ້ອມດ້ວຍຄະນະ ໄດ້ເຄື່ອນໄຫວພົບປະ ແລະ ເຮັດວຽກນໍາພະນັກງານຫຼັກແຫຼ່ງຂອງຄະນະຈັດຕັ້ງແຂວງ ເຊິ່ງສະຫາຍ ສະໜັ່ນ ສີພາພົມມະຈັນ ຮອງເລຂາຄະນະບໍລິຫານງານພັກແຂວງ, ຫົວໜ້າຄະນະຈັດຕັ້ງແຂວງຈໍາປາສັກ ໄດ້ລາຍງານໂດຍສັງເຂບ ກ່ຽວກັບການເຄື່ອນໄຫວນໍາພາ-ຊີ້ນໍາວຽກງານກໍ່ສ້າງພັກ, ພະນັກງານ ແລະ ວຽກງານປັບປຸງກົງຈັກການຈັດຕັ້ງ ຕິດພັນກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແຂວງຈໍາປາສັກ ໂດຍໄດ້ໃຫ້ຮູ້ວ່າ:
ອົງຄະນະພັກແຂວງຈໍາປາສັກ ປະກອບມີ 10 ອົງຄະນະພັກເມືອງ-ນະຄອນ, 2 ອົງຄະນະພັກກອງບັນຊາການທະຫານ ແລະ ກອງບັນຊາການປ້ອງກັນຄວາມສະຫງົບແຂວງ; ມີຮາກຖານພັກທັງໝົດ 2.031 ຮາກຖານ; ໃນນີ້້ ມີຄະນະພັກຮາກຖານ 228 ຮາກຖານ, ໜ່ວຍພັກຮາກຖານ 296 ໜ່ວຍ, ໜ່ວຍພັກ ທີ່ຂຶ້ນກັບຄະນະພັກຮາກຖານ 1.507 ໜ່ວຍ; ມີສະມາຊິກພັກທັງໝົດ 30.561 ສະຫາຍ, ຍິງ 8.359 ສະຫາຍ; ໃນນັ້ນ, ສະມາຊິກພັກສົມບູນ 28.740 ສະຫາຍ, ຍິງ 7.777 ສະຫາຍ ແລະ ສະມາຊິກພັກສໍາຮອງ 1.821 ສະຫາຍ, ຍິງ 582 ສະຫາຍ; ມີພະນັກງານ-ລັດຖະກອນ ທັງໝົດ 11.940 ສະຫາຍ, ຍິງ 6.358 ສະຫາຍ. ຜ່ານການຈັດຕັ້ງປະຕິບັດວຽກງານກໍ່ສ້າງພັກ, ພະນັກງານ ແລະ ວຽກງານປັບປຸງກົງຈັກການຈັດຕັ້ງໃນໄລຍະຜ່ານມາ ສາມາດຍາດໄດ້ຜົນສໍາເລັດຫຼາຍດ້ານ ເປັນຕົ້ນ ໃນປີ 2023 ໄດ້ດໍາເນີນການປະເມີນຜົນໜ່ວຍພັກປອດໃສ, ເຂັ້ມແຂງ, ໜັກແໜ້ນ ທັງໝົດ 1.771 ໜ່ວຍ; ໃນນັ້ນ, ໄດ້ຮັບຮອງເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ມີ 1.607 ໜ່ວຍ, ໜ່ວຍພັກກາງ 162 ໜ່ວຍ, ໜ່ວຍພັກອ່ອນ 02 ໜ່ວຍ ແລະ ບໍ່ໄດ້ປະເມີນ 32 ໜ່ວຍ; ສະມາຊິກພັກປະເພດແຂງ 25.695 ສະຫາຍ, ຍິງ 7.015 ສະຫາຍ, ປະເພດກາງ 1.294 ສະຫາຍ, ຍິງ 246 ສະຫາຍ, ປະເພດອ່ອນ 05 ສະຫາຍຍິງ 01 ສະຫາຍ; ສະມາຊິກພັກ ບໍ່ໄດ້ປະເມີນ 3.567 ສະຫາຍ, ຍິງ 1.097 ສະຫາຍ; ໄດ້ເລືອກຕັ້ງ, ແຕ່ງຕັ້ງພະນັກງານ ເຂົ້າໃນຕໍາແໜ່ງງານຕ່າງໆ ລ້ວນແຕ່ຢູ່ໃນແຜນກຳນົດສ້າງ ກວມ 97%; ໄດ້ນໍາສົ່ງພະນັກງານໄປບໍາລຸງ-ກໍ່ສ້າງ ຢູ່ພາຍໃນ ແລະ ຕ່າງປະເທດ ທັງໝົດ 445 ສະຫາຍ, ຍິງ 74 ສະຫາຍ; ສົ່ງພະນັກງານ ລົງກໍ່ສ້າງຮາກຖານ ຢູ່ເມືອງ-ນະຄອນ ຈໍານວນ 79 ສະຫາຍ, ຍິງ 06 ສະຫາຍ; ໄດ້ແຕ່ງຕັ້ງ, ສັບຊ້ອນ, ຈັດວາງພະນັກງານ ທັງໝົດ 271 ສະຫາຍ, ຍິງ 100 ສະຫາຍ; ໄດ້ເອົາໃຈໃສ່ປັບປຸງກົງຈັກການຈັດຕັ້ງ ຕາມທິດກະທັດຮັດ, ສົມເຫດສົມຜົນ, ເຄື່ອນໄຫວ ມີປະສິດທິພາບ, ຕິດພັນກັບການປັບປຸງພາລະບົດບາດ ແລະ ການກຳນົດຕຳແໜ່ງງານ ຂອງບັນດາພະແນກການ-ກົມກອງ ທີ່ຍັງບໍ່ທັນສຳເລັດ 22 ພາກສ່ວນ; ປະຈຸບັນກົງຈັກການຈັດຕັ້ງທົ່ວແຂວງມີທັງໝົດ 26 ພະແນກການ ແລະ ອົງການທຽບເທົ່າ, ມີ 02 ສູນຂັ້ນແຂວງ; ໃນນັ້ນ, ມີ 15 ພະແນກການສາຍຕັ້ງ, ມີ 11 ອົງການສາຍຂວາງ, ມີ 152 ຂະແໜງ ແລະ ທຽບເທົ່າ ແລະ ມີ 8 ໜ່ວຍງານ; ໄດ້ຮັບຮອງພາລະບົດບາດແລ້ວ 22 ພາກສ່ວນ, ຍັງ 04 ພາກສ່ວນ; ສໍາລັບຢູ່ຂັ້ນເມືອງ-ນະຄອນມີ 227 ຫ້ອງການ ມີກົງຈັກຊ່ວຍວຽກທັງໝົດ 826 ໜ່ວຍງານ; ຮັບຮອງພາລະບົດບາດແລ້ວ 175 ຫ້ອງການ, ມີ 551 ໜ່ວຍງານ ແລະໄດ້ສ້າງຕັ້ງຫ້ອງການກະສິກຳ ແລະ ປ່າໄມ້ນະຄອນປາກເຊຄືນໃໝ່; ໄດ້ປັບປຸງກົງຈັກການຈັດຕັ້ງຂອງຄະນະຈັດຕັ້ງແຂວງ, ເມືອງ-ນະຄອນ ສໍາເລັດ 100%; ປະຈຸບັນໂຄງປະກອບກົງຈັກການຈັດຕັ້ງຂອງຄະນະຈັດຕັ້ງແຂວງ ປະກອບມີ 04 ຂະແໜງ ແລະ ຂັ້ນເມືອງ-ນະຄອນ ມີ 3 ໜ່ວຍງານ. ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ໄດ້ປະຕິບັດຕາມຄໍາສັ່ງຂອງຄະນະເລຂາທິການສູນກາງພັກ ເລກທີ 411 ແລະ ຄໍາແນະນຳຕ່າງໆຂອງອົງການຂັ້ນສູນກາງ ກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ແລະ ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 99/ຄຈສພ, ລົງວັນທີ 26 ເມສາ 2024; ຄະນະປະຈໍາພັກແຂວງ ໄດ້ນໍາພາຈັດຕັ້ງເຊື່ອມຊືມ, ຜັນຂະຫຍາຍອອກເປັນຄໍາສັ່ງແນະນຳ, ພ້ອມທັງແຕ່ງຕັ້ງຄະນະຮັບຜິດຊອບ, ອະນຸກໍາມະການຕ່າງໆ ແລະ ສ້າງແຜນການເຄື່ອນໄຫວລະອຽດໃນການກະກຽມ ແລະ ດໍາເນີນກອງປະຊຸມໃຫຍ່ຂັ້ນແຂວງ, ຂັ້ນເມືອງ ແລະ ຮາກຖານພັກ; ຜ່ານການຈັດຕັ້ງປະຕິບັດຕົວຈິງ ມາເຖິງປະຈຸບັນການດໍາເນີນກອງປະຊຸມໃຫຍ່ຂັ້້ນຮາກຖານພັກ ຢູ່ອົງຄະນະພັກເມືອງ-ນະຄອນ ສຳເລັດ 1.713 ຮາກຖານພັກ ເທົ່າກັບ 100%; ອົງຄະນະພັກກອງບັນຊາການທະຫານແຂວງ 82 ຮາກຖານພັກ ເທົ່າກັບ 100 %; ພະແນກການ-ກົມກອງອ້ອມຂ້າງແຂວງ ສຳເລັດ 20 ຮາກຖານພັກ ເທົ່າກັບ 11,2 %. ສຳລັບການກະກຽມດຳເນີນກອງປະຊຸມໃຫຍ່ຂອງອົງຄະນະພັກເມືອງ ແລະ ນະຄອນ ມາເຖິງປະຈຸບັນເຫັນວ່າບັນດາເມືອງ ໄດ້ສໍາເລັດວຽກງານຕ່າງໆໂດຍພື້ນຖານ.
ໂອກາດນີ້ ສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ມີຄໍາເຫັນແລກປ່ຽນຕໍ່ກອງປະຊຸມ ໂດຍໃຫ້ສືບຕໍ່ນໍາພາ-ຊີ້ນໍາຍູ້ແຮງຂະບວນການວຽກງານຮອບດ້ານໃນທົ່ວອົງຄະນະພັກແຂວງ ໃຫ້ຟົດຟື້ນ, ຕໍ່ເນື່ອງ ແລະ ແຂງແຮງ ໂດຍສະເພາະການປະຕິບັດແຜນພັດທະນາເສດຖະກິດ-ສັງຄົມ ຂອງທ້ອງຖິ່ນ; ການປະຕິບັດໜ້າທີ່ການເມືອງຂອງບັນດາຂະແໜງການ, ອົງການທີ່ຂຶ້ນກັບສິດຄຸ້ມຄອງ; ການສ້າງເສດຖະກິດຄອບຄົວ, ຍູ້ແຮງການຜະລິດເປັນສິນຄ້າ ແລະ ການສ້າງຂະບວນການສີລະປະ ວັນນະຄະດີ, ກິລາມວນຊົນ, ອອກແຮງງານ, ອະນາໄມ, ປະດັບປະດາສະຖານທີ່ ໃຫ້ມີຄວາມສະອາດ ແລະ ຈົບງາມ; ສືບຕໍ່ນໍາພາ-ຊີ້ນໍາການກະກຽມ ແລະ ດໍາເນີນກອງປະຊຸມໃຫຍ່ຮາກຖານພັກ ທີ່ຂຶ້ນກັບອົງຄະນະພັກຂອງຕົນ ໃຫ້ສໍາເລັດ; ສໍາລັບຮາກຖານພັກ ທີ່ສໍາເລັດກອງປະຊຸມໃຫຍ່ຂັ້ນຕົນແລ້ວ ໃຫ້ຮີບຮ້ອນຈັດຕັ້ງຜັນຂະຫຍາຍຜົນສໍາເລັດກອງປະຊຸມໃຫຍ່ດັ່ງກ່າວ ໃຫ້ທົ່ວເຖິງ ເລິກເຊິ່ງ; ພ້ອມດຽວກັນນີ້ ໃຫ້ເອົາໃຈໃສ່ຕິດຕາມ, ກວດກາບັນດາຮາກຖານພັກ ທີ່ດໍາເນີນກອງປະຊຸມໃຫຍ່ສໍາເລັດ, ແຕ່ສັງເກດເຫັນວ່າຍັງມີບຸກຄົນໃນຄະນະພັກ ຄວາມຮັບຜິດຊອບ ຕໍ່ໜ້າທີ່ວຽກງານບໍ່ສູງ, ເກີດມີຫາງສຽງຈົ່ມວ່າຈາກສັງຄົມ ຕໍ່ການປະຕິບັດໜ້າທີ່ວຽກງານ, ຕໍ່ບາງບຸກຄົນໃນຄະນະພັກ, ຖ້າມີກໍລະນີຄືດັ່ງກ່າວ ໃຫ້ຄະນະພັກຂັ້ນເທິງຖັດນັ້ນ ຮີບຮ້ອນປັບປຸງບຸກຄະລາກອນ ໃຫ້ຮັບປະກັນມາດຕະຖານ, ເງື່ອນໄຂ ເພື່ອສືບຕໍ່ນໍາພາຮາກຖານພັກ ດັ່ງກ່າວ ໃຫ້ມີຜົນສຳເລັດ; ສືບຕໍ່ນໍາພາ-ຊີ້ນໍາການກະກຽມດໍາເນີນຊີວິດການເມືອງທົ່ວອົງຄະນະພັກ, ຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ-ນະຄອນ ແລະ ກະກຽມເນື້ອໃນເອກະສານຕ່າງໆ ໃຫ້ສອດຄ່ອງກັບນິຕິກໍາຂອງຄະນະພັກຂັ້ນເທິງ; ການກະກຽມບຸກຄະລາກອນ ອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກເມືອງ-ນະຄອນ ໃຫ້ຖືກຕ້ອງຕາມມາດຕະຖານ, ເງື່ອນໄຂ; ເອົາໃຈໃສ່ ເລືອກເຟັ້ນເອົາບຸກຄະລາກອນ ທີ່ມີມາດຕະຖານ, ເງື່ອນໄຂ ຈາກຄະນະພັກຮາກຖານ ແລະ ຄະນະໜ່ວຍພັກບ້ານ ເພື່ອອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກເມືອງ-ນະຄອນ ຊຸດໃໝ່ ຕາມອັດຕາສ່ວນທີ່ເໝາະສົມ; ພາຍຫຼັງສໍາເລັດກອງປະຊຸມໃຫຍ່ອົງຄະນະພັກເມືອງ-ນະຄອນ ທໍາອິດຂອງແຂວງ ໃຫ້ຄະນະຮັບຜິດຊອບກະກຽມ ແລະ ດໍາເນີນກອງປະຊຸມໃຫຍ່ ສະຫຼຸບຖອດຖອນບົດຮຽນ ແລະ ລາຍງານຕໍ່ຄະນະພັກຂັ້ນເທິງຖັດຕົນ ແລ້ວຈຶ່ງສືບຕໍ່ດໍາເນີນກອງປະຊຸມໃຫຍ່ອົງຄະນະພັກເມືອງ-ນະຄອນອື່ນ ໃຫ້ສໍາເລັດ ຕາມຈຸດປະສົງ, ລະດັບຄາດໝາຍ ແລະ ທັນຕາມເວລາທີ່ກຳນົດໄວ້.
