ແຫຼ່ງຂ່າວ: ລລທ
ໃນຕອນບ່າຍຂອງວັນທີ 16 ພຶດສະພາ 2024 ໜ່ວຍພັກເສດຖະກິດ ທີ່ຂຶ້ນກັບຄະນະພັກຮາກຖານ ບໍລິສັດ ລາວໂທລະຄົມມະນາຄົມ ມະຫາຊົນ (ລລທ), ກະຊວງ ເຕັກໂນໂລຊີ ແລະ ການສື່ສານ (ຕສ) ໄດ້ຈັດກອງປະຊຸມໃຫຍ່ ຄັ້ງທີ III ໜ່ວຍພັກຂອງຕົນຂຶ້ນ ໂດຍການເຂົ້າຮ່ວມເປັນປະທານຂອງ ສະຫາຍ ສຸພົນ ຈັນທະວີໄຊ ຄະນະບໍລິຫານງານພັກກະຊວງ ຕສ, ເລຂາຄະນະພັກຮາກຖານ ລລທ, ຕາງໜ້າອົງຄະນະພັກກະຊວງ ຕສ, ມີສະຫາຍ ຈັນທະວີພອນ ເຄືອບຄໍາວອນ ຮອງຫົວໜ້າຫ້ອງການອົງຄະນະພັກ ແລະ ອົງການຈັດຕັ້ງມະຫາຊົນ, ຫົວໜ້າຄະນະຕິດຕາມການດໍາເນີນກອງປະຊຸມໃຫຍ່ 3 ຂັ້ນ ກະຊວງ ຕສ ພ້ອມດ້ວຍບັນດາສະຫາຍຄະນະພັກຮາກຖານ ລລທ, ຕາງໜ້າໜ່ວຍພັກ, ຕາງໜ້າ 3 ອົງການຈັດຕັ້ງມະຫາຊົນ, ຕາງໜ້າຫ້ອງການພັກ ລລທ ແລະ ສະມາຊິກພັກຂອງໜ່ວຍພັກເສດຖະກິດ ເຂົ້າຮ່ວມ.
ໃນກອງປະຊຸມ, ສະຫາຍ ບຸນຫຼາຍ ສີຫານາດ ເລຂາໜ່ວຍພັກເສດຖະກິດ ໄດ້ຂຶ້ນຜ່ານບົດລາຍງານການເມືອງ ສະຫຼຸບການເຄື່ອນໄຫວວຽກງານຂອງໜ່ວຍພັກ ໃນໄລຍະ 5 ປີ (2019-2023) ແລະ ທິດທາງແຜນການເຄື່ອນໄຫວໃນຕໍ່ໜ້າ (2024 - 2028) ເຊິ່ງໃນໄລຍະ 05 ປີຜ່ານມາ ໜ໋ວຍພັກເສດຖະກິດ ໄດ້ຮັບການນຳພາ-ຊີ້ນໍາຈາກຄະນະພັກຮາກຖານ ລລທ ເປັນປະຈໍາ ແລະ ສະມາຊິກພັກທຸກສະຫາຍກໍ່ມີຄວາມສາມັກຄີ ໃຫ້ຄວາມຮ່ວມມືໃນທຸກດ້ານ. ໃນທ່າມກາງສະພາບການຂອງໂລກທັງຢູ່ໃນລະດັບພາກພື້ນ ແລະ ສາກົນ ເກີດມີຄວາມທ້າທາຍໃນຫຼາຍດ້ານ ເຊັ່ນ: ການລະບາດຂອງພະຍາດ ໂຄວິດ-19, ບັນຫາການຂັດແຍ່ງທາງດ້ານພູມມິລັດຖະສາດ ແລະ ຄວາມຫຍຸ້ງຍາກດ້ານເສດຖະກິດ-ການເງິນ ອັນໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງຊາດ ເວົ້າລວມ, ເວົ້າສະເພາະ ແມ່ນໄດ້ສົ່ງຜົນກະທົບໂດຍກົງ ຕໍ່ການພັດທະນາວຽກງານການດໍາເນີນທຸລະກິດຂອງ ລລທ. ເຖິງແນວໃດກໍ່ຕາມ ໂດຍໄດ້ຮັບການນໍາພາ-ຊີ້ນໍາ ຈາກຄະນະພັກຮາກຖານ ລລທ ເຮັດໃຫ້ຄະນະໜ່ວຍພັກ ແລະ ສະມາຊິກພັກ-ພະນັກງານ ຂອງໜ່ວຍພັກ ເສດຖະກິດ ໄດ້ມີຄວາມສາມັກຄີເປັນປຶກແຜ່ນ, ຕັດສິນໃຈສູງຜ່ານຜ່າອຸປະສັກນາໆປະການ ປະຕິບັດໜ້າທີ່ການເມືອງຂອງຕົນ ເປັນຕົ້ນແມ່ນການຈັດຕັ້ງຜັນຂະຫຍາຍມະຕິກອງປະຊຸມ ຄັ້ງທີ V ຂອງຄະນະພັກຮາກຖານ ລລທ ເວົ້າລວມ, ເວົ້າສະເພາະແມ່ນຈັດຕັ້ງປະຕິບັດບັນດາຄາດໝາຍທີ່ກໍານົດໄວ້ ໃນມະຕິກອງປະຊຸມໃຫ່ຍ ຄັ້ງທີ II ຂອງໜ່ວຍພັກ ເສດຖະກິດ ໃຫ້ບັນລຸຜົນສໍາເລັດ ປະກອບສ່ວນໃຫ້ແກ່ການພັດທະນາ ເສດຖະກິດ-ສັງຄົມແຫ່ງຊາດ ໄດ້ເປັນຢ່າງດີ.
ໃນວາລະກອງປະຊຸມ, ສະມາຊິກພັກສົມບູນພາຍໃນໜ່ວຍພັກ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກ ເສດຖະກິດ ຊຸດໃໝ່ ແລະ ຜູ້ແທນສົມບູນ ແລະ ສຳຮອງ ເຂົ້າຮ່ວມກອງປະຊຸມໃຫຍ່ຄະນະພັກຮາກຖານ ລລທ ເຊິ່ງຜ່ານການປ່ອນບັດເລືອກຕັ້ງ ໄດ້ຄະນະໜ່ວຍພັກ ຊຸດໃໝ່ 03 ສະຫາຍ ຈາກຜູ້ສະໝັກ 05 ສະຫາຍ, ເລືອກໄດ້ຜູ້ແທນສົມບູນ ຈໍານວນ 17 ສະຫາຍ ແລະ ສໍາຮອງ 5 ສະຫາຍ. ກອງປະຊຸມຄັ້ງປະຖົມມະລືກ ໄດ້ເປັນເອກະສັນກັນເລືອກເອົາ ສະຫາຍ ບຸນຫຼາຍ ສີຫານາດ ເປັນເລຂາໜ່ວຍພັກ, ສະຫາຍ ນາງ ອິນຖະໜອມ ສີສຸວັນທອງ ເປັນຮອງເລຂາໜ່ວຍພັກ ທັງເປັນປະທານກວດກາ ແລະ ສະຫາຍ ນາງ ເຄືອຄໍາ ໂພທິສັດ ເປັນກໍາມະການໜ່ວຍພັກ.
ໃນຕອນທ້າຍ, ສະຫາຍ ສຸພົນ ຈັນທະວີໄຊ ຄະນະບໍລິຫານງານພັກກະຊວງ ຕສ, ເລຂາຄະນະພັກຮາກຖານ ລລທ, ຕາງໜ້າອົງຄະນະພັກກະຊວງ ຕສ, ປະທານກອງປະຊຸມ ໄດ້ມີຄໍາເຫັນຍ້ອງຍໍຊົມເຊີຍ ຕໍ່ຜົນສຳເລັດການນຳພາຂອງໜ່ວຍພັກເສດຖະກິດ ພ້ອມທັງໄດ້ເນັ້ນໃຫ້ຄະນະໜ່ວຍພັກຊຸດໃໝ່ ເອົາໃຈໃສ່ໃນການແບ່ງງານ, ແບ່ງຄວາມຮັບຜິດຊອບໃຫ້ລະອຽດຈະແຈ້ງ, ເຕົ້າໂຮມຄວາມສາມັກຄີພາຍໃນໜ່ວຍພັກ, ນຳພາອ້າຍເອື້ອຍນ້ອງສະມາຊິກພັກ-ພະນັກງານໃນຄວາມຮັບຜິດຊອບຂອງຕົນ, ຕິດຕາມ, ກວດກາ, ຊີ້ນຳ-ຊຸກຍູ້ການເຄື່ອນໄຫວປະຕິບັດໜ້າທີ່ການເມືອງຂອງໜ່ວຍພັກໃຫ້ມີຜົນສຳເລັດ.
