ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ອົງຄະນະພັກ ທຫລ ຈັດພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023
ຈຳນວນຜູ້ອ່ານ: 6382
ອະນຸມັດວັນທີ: 07/06/2024

     ພາບ ​ແລະ ຂ່າວໂດຍ: ສ.ສົດໃສ

     ​ເພື່ອ​ຜັນ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ຕາມ​ຄຳ​ສັ່ງ ​ເລກທີ 01/ກມສພ ​ແລະ ຄຳ​​ແນະນຳ ​ເລກທີ 291/ຄຈສພ ກໍ​ຄື​ແຈ້ງ​ການ​ແນະນຳຂອງ​ຄະນະ​ພັກ ທະນາຄານ​ແຫ່ງ ສປປ ລາວ ​ເລກທີ 393/ຄພ.ທຫລ ກ່ຽວ​ກັບ​ການຈັດ​ຕັ້ງ​ປະຕິບັດ​ວຽກ​ງານ​ເພີ່ມ​ທະວີ​ການ​ກໍ່​ສ້າງ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ, ​ໜັກ​ແໜ້ນ.

     ໃນວັນທີ 06 ມິຖຸນາ 2024 ຢູ່ສະຖາບັນການທະນາຄານ (ຫຼັກ 9), ຄະນະພັກ ທະນາຄານແຫ່ງ ສປປ ລາວ (ທຫລ) ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ 23 ໜ່ວຍພັກທີ່ຂຶ້ນກັບອົງຄະນະພັກ ທຫລ. ເປັນກຽດເຂົ້າຮ່ວມໃນພິທີມີສະຫາຍ ບຸນ​ເຫຼືອ ສິນ​ໄຊ​ວໍຣະວົງ ​ເລຂາ​ຄະນະ​ບໍລິຫານ​ງານ​ພັກ, ຜູ້​ວ່າການ​ທະນາຄານ​ແຫ່ງ ສປປ ລາວ; ມີ​ບັນດາ​ສະຫາຍ​ຄະນະ​ປະຈຳ​ພັກ, ຄະນະ​ພັກ, ​ເລຂາໜ່ວຍ​ພັກ, ເລຂາ​ຄະນະ​ພັກ​ຮາກ​ຖານ, ຄະນະໜ່ວຍ​ພັກ, ​​ຄະນະ​ພັກ​ຮາກ​ຖານ ພ້ອມ​ດ້ວຍ​ສະມາຊິກ​ພັກ ​​ແລະ ​ແຂກ​ຖືກ​ເຊີນ​ ເຂົ້າ​ຮ່ວມ.

     ພິທີດັ່ງກ່າວ ໄດ້ຜ່ານຂໍ້ຕົກລົງຂອງຄະນະບໍລິຫານ​ງານ​ພັກ ທຫລ ວ່າດ້ວຍການຮັບຮອງການຕີລາຄາຄຸນນະພາບ ແລະ ແບ່ງປະເພດໜ່ວຍພັກ ປະຈຳປີ 2023 ສະບັບເລກທີ 104/ຄພ.ທຫລ ລົງ​ວັນ​ທີ 09 ພຶດສະພາ 2024 ແລະ ບົດລາຍງານສະຫຼຸບຕີ​ລາຄາ​ການຈັດ​ຕັ້ງ​ປະຕິບັດ​ວຽກງານ​ການ​ປະ​ເມີນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023; ອົງຄະ​ນະ​ພັກ ທຫລ ມີ​ຮາກ​ຖານ​ພັກ​ທີ່​ຂຶ້ນ​ກັບ ​ທັງ​ໝົດ 60 ຮາກ​ຖານ​ພັກ, ມີ​ສະມາຊິກ​ພັກ​ ທັງ​ໝົດ 1.000 ກວ່າສະຫາຍ, ຍິງ 400 ກວ່າສະຫາຍ.

     ຜ່ານການລົງ​ຕິດຕາມ​ກວດກາການ​ປະ​ເມີນ ​ແລະ ສະຫຼຸບຕີລາຄາຄຸນນະພາບ ແບ່ງປະເພດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳ​ປີ 2023 ຕາມ 5 ເນື້ອໃນທີ່ກຳນົດໄວ້ໃນຄຳສັ່ງເລກທີ 01 ຂອງກົມການເມືອງສູນກາງພັກ ເຫັນວ່າສາມາດແບ່ງເປັນປະເພດໜ່ວຍພັກປອດໃສ, ເຂັ້ມແຂງ, ໜັກແໜ້ນ ມີ 23 ໜ່ວຍພັກ ​ໃນ​ນີ້ ມີ 13 ໜ່ວຍ​ພັກ​ຮາກ​ຖານ ​ແລະ 10 ໜ່ວຍ​ພັກທີ່ຂຶ້ນ​ກັບ​ຄະນະ​ພັກ​ຮາ​ກຖານ, ​ກວມ​ເອົາ 48,93% ຂອງໜ່ວຍ​ພັກທັງ​ໝົດ​ທີ່​ໄດ້​ຮັບ​ການ​ຕີ​ລາຄາ​; ປະເພດໜ່ວຍພັກແຂງ ມີ 21 ໜ່ວຍພັກ ​ໃນ​ນີ້ ມີ 10 ໜ່ວຍ​ພັກ​ຮາກ​ຖານ ​ແລະ 11 ໜ່ວຍ​ພັກທີ່​ຂຶ້ນ​ກັບ​ຄະນະ​ພັກ​ຮາກ​ຖານ, ​ກວມ​ເອົາ 44,68% ຂອງໜ່ວຍ​ພັກທັງ​ໝົດ​ທີ່​ໄດ້​ຮັບ​ການ​ຕີ​ລາຄາ; ປະເພດໜ່ວຍພັກກາງ ມີ 03 ໜ່ວຍພັກ ​ໃນ​ນີ້ ມີ 01 ໜ່ວຍ​ພັກ​ທີ່​ຂຶ້ນ​ກັບ​ຄະນະ​ພັກ​ຮາກ​ຖານ ສທຄ ​ແລະ 02 ໜ່ວຍ​ພັກ ທີ່​ຂຶ້ນ​ກັບ​ຄະນະ​ພັກ​ຮາກ​ຖານ ທນບ, ​ກວມ​ເອົາ 6,38% ຂອງ​ໜ່ວຍ​ພັກທີ່​ໄດ້​ຮັບ​ການ​ຕີ​ລາຄາ; ສະມາຊິກພັກໄດ້ຮັບການຕີລາຄາຈັດແບ່ງປະເພດ ເປັນສະມາຊິກພັກແຂງ 779 ສະຫາຍ, ຍິງ 367 ສະຫາຍ, ກວມ 96,53% ຂອງຈຳນວນສະມາຊິກພັກທັງໝົດ; ປະເພດກາງມີ 28 ສະຫາຍ, ຍິງ 14 ສະຫາຍ, ກວມ 3,46%, ບໍ່ມີສະມາຊິກພັກອ່ອນ ​ແລະ ເສຍທາດ.

     ພາຍຫຼັງຜ່ານບົດສະຫຼຸບຕີລາຄາຜົນການຈັດຕັ້ງປະຕິບັດແລ້ວ ກໍ່ໄດ້ມີພິທີມອບໃບຢັ້ງ ຢືນ ໂດຍເປັນກຽດມອບຂອງສະຫາຍ ບຸນ​ເຫຼືອ ສິນ​ໄຊ​ວໍຣະວົງ ແລະ ມີຜູ້ຕາງໜ້າ 23 ໜ່ວຍພັກຂຶ້ນຮັບ; ໃນຕອນທ້າຍຂອງພິທີ ສະຫາຍ ບຸນ​ເຫຼືອ ສິນ​ໄຊ​ວໍຣະວົງ ໄດ້ມີຄຳເຫັນໂອ້ລົມ ຍ້ອງຍໍຊົມເຊີຍຕໍ່ຜົນງານ ແລະ ຮຽກຮ້ອງໃຫ້ບັນດາໜ່ວຍພັກທີ່ໄດ້ຮັບນາມມະຍົດຄັ້ງນີ້ ຈົ່ງສືບຕໍ່ຮັກສາມູນເຊື້ອໃນປີຕໍ່ໄປ ແລະ ບັນດາໜ່ວຍພັກທີ່ບໍ່ທັນໄດ້ຖືກຮັບຮອງ ຕ້ອງເປັນເຈົ້າການຄົ້ນຄວ້າປັບປຸງດ້ານອ່ອນ-ຂໍ້ຄົງຄ້າງໃຫ້ຫຼຸດໜ້ອຍລົງ ຈົນກ້າວໄປເຖິງສາມາດຖືກຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳ​ປີ 2024 ​ເພື່ອ​ເຮັດ​ໃຫ້​ມະຕິ​ກອງ​ປະຊຸມ​​ໃຫຍ່​ອົງຄະ​ນະ​ພັກ ທະນາຄານ​ແຫ່ງ​ ສປປ ລາວ ຄັ້ງ​ທີ IV ບັນລຸ​ຕາມ​ລະດັບ​ຄາດໝາຍ​ທີ່​ວາງ​ໄວ້.