ໂດຍ : ນາງ ອານຸລັກ ຈິດຕິລາດ
ໃນວັນທີ 03 ມິຖຸນາ 2024 ນີ້, ກະຊວງແຜນການ ແລະ ການລົງທຶນ ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023, ມອບບັດສະມາຊິກພັກສົມບູນ ຊຸດທີ 10, ມອບໃບຍ້ອງຍໍປະຈໍາປີ 2023 ພ້ອມທັງເຜີຍແຜ່-ເຊື່ອມຊຶມເອກະສານຈໍານວນໜຶ່ງ; ໃຫ້ກຽດເປັນປະທານໂດຍ ສະຫາຍ ປອ. ເພັດ ພົມພິພັກ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍບັນດາສະຫາຍກຳມະການຄະນະບໍລິຫານງານພັກກະຊວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ-ພະນັກງານ ເຂົ້າຮ່ວມທັງໝົດ 271 ສະຫາຍ, ຍິງ 114 ສະຫາຍ.
ໃນພິທີດັ່ງກ່າວ, ສະຫາຍ ປອ. ເພັດ ພົມພິພັກ ໄດ້ເຜີຍແຜ່-ເຊື່ອມຊຶມມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024, ຈາກນັ້ນ ສະຫາຍ ບຸນມີ ວິໄລຈິດ ກຳມະການຄະນະບໍລິຫານງານພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານມະຕິຕົກລົງວ່າດ້ວຍການມອບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຈໍານວນ 15 ໜ່ວຍພັກ, ຜ່ານມະຕິຕົກລົງວ່າດ້ວຍການຮັບຮອງອອກບັດສະມາຊິກພັກສົມບູນ ຊຸດທີ 10, ຂໍ້ຕົກລົງວ່າດ້ວຍການອະນຸມັດຍ້ອງຍໍ ແລະ ຊົມເຊີຍກົມກອງ, ບຸກຄົນ ພະນັກງານ-ລັດຖະກອນ ກະຊວງແຜນການ ແລະ ການລົງທຶນ ທີ່ມີຜົນງານດີເດັ່ນ ປະຈຳປີ 2023. ໃຫ້ກຽດມອບບັດສະມາຊິກພັກສົມບູນໂດຍ ສະຫາຍ ປອ. ສະຖາບັນດິດ ອິນສີຊຽງໃໝ່ ກໍາມະການປະຈໍາພັກກະຊວງ, ຮອງລັດຖະມົນຕີກະຊວງແຜນການ ແລະ ການລົງທຶນ ເຊິ່ງມີສະມາຊິກພັກສົມບູນທີ່ໄດ້ຮັບບັດ ຄັ້ງນີ້ ຈໍານວນ 33 ສະຫາຍ, ຍິງ 12 ສະຫາຍ.
ໃນຕອນທ້າຍ, ສະຫາຍ ປອ. ເພັດ ພົມພີພັກ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແກ່ 15 ໜ່ວຍພັກ ແລະ ມອບໃບຍ້ອງຍໍໃຫ້ແກ່ກົມກອງ, ບຸກຄົນທີ່ມີຜົນງານດີເດັ່ນໃນຕະຫຼອດໄລຍະປີ 2023 ລວມທັງໝົດ 627 ສະຫາຍ, ຍິງ 230 ສະຫາຍ, ໃນນີ້ ມີປະເພດໃບຍ້ອງຍໍ ຈໍານວນ 623 ສະຫາຍ, ຍິງ 229 ສະຫາຍ, ປະເພດໃບຊົມເຊີຍ ຈໍານວນ 04 ສະຫາຍ, ຍິງ 01 ສະຫາຍ; ພ້ອມນີ້ ສະຫາຍຍັງໄດ້ມີຄໍາເຫັນໂອ້ລົມສະແດງຄວາມຊົມເຊີຍຕໍ່ຜົນສໍາເລັດຂອງບັນດາໜ່ວຍພັກ ທີ່ສາມາດຮັກສາມູນເຊື້ອເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ແລະ ມີທິດຊີ້ນໍາໃຫ້ລົງເລິກແຕ່ລະຄາດໝາຍສູ້ຊົນເປັນຕົ້ນ ດ້ານການເມືອງ, ແນວຄິດ, ການຈັດຕັ້ງ, ແບບແຜນວິທີການນໍາພາ ແລະ ການປະຕິບັດໜ້າທີ່ການເມືອງໃຫ້ເປັນປົກກະຕິ, ສືບຕໍ່ຕັ້ງໜ້າປະຕິບັດຄໍາຂວັນຂອງກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງແຜນການ ແລະ ການລົງທຶນ “ເພີ່ມທະວີການນໍາພາ ວຽກງານແຜນການ ແລະ ການລົງທຶນ ໃຫ້ມີການຫັນປ່ຽນ ຢ່າງມີຈຸດສຸມ, ມີຄຸນນະພາບ ແລະ ທັນສະໄໝ”, ພ້ອມທັງປະຕິບັດໜ້າທີ່ວຽກງານວິຊາສະເພາະຂອງຕົນ ໃຫ້ມີຜົນສຳເລັດເປັນກ້າວໆ.
