ໂດຍ: ອານຸລັກ

     ໃນເດືອນ ກໍລະກົດ 2024, ກະຊວງສາທາລະນະສຸກ ໄດ້ຈັດກອງປະຊຸມເຜີຍແຜ່-ເຊື່ອມຊຶມ ແລະ ຜັນຂະຫຍາຍ ເອກະສານສໍາຄັນຈໍານວນໜຶ່ງ ທີ່ຫ້ອງປະຊຸມໃຫຍ່ ວິທະຍາເຂດດົງໂພສີ, ມະຫາວິທະຍາໄລ ວິທະຍາສາດ ສຸຂະພາບ (ມວສ) ໂດຍການເຂົ້າຮ່ວມຂອງສະຫາຍ ປອ. ດຣ. ບຸນແຝງ ພູມມະໄລສົດ ກໍາມະການສູນກາງພັກ, ເລຂາຄະນະພັກກະຊວງ ສາທາລະນະສຸກ, ມີຄະນະປະຈໍາພັກ, ຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ເຂົ້າຮ່ວມ 550 ສະຫາຍ, ຍິງ 285 ສະຫາຍ.

     ກອງປະຊຸມໄດ້ຮັບຟັງການເຜີຍແຜ່, ເຊື່ອມຊຶມ ບັນດາເອກະສານສໍາຄັນຄື: ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI, ມະຕິຂອງກົມການເມືອງສູນກາງພັກ ສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງໃນໄລຍະໃໝ່, ໃຫ້ກຽດເຜີຍແຜ່ເອກະສານໂດຍສະຫາຍ ປອ. ດຣ. ບຸນແຝງ ພູມມະໄລສົດ ກໍາມະການສູນກາງພັກ, ເລຂາຄະນະພັກກະຊວງ ສາທາລະນະສຸກ; ແຈ້ງການ ເລກທີ 122/ຄຈສພ ລົງວັນທີ 15 ພຶດສະພາ 2024 ການກະກຽມ ແລະ ດໍາເນີນກອງປະຊຸມໃຫຍ່ຮາກຖານພັກ ອ້ອມຂ້າງກະຊວງ-ອົງການ ສະເໜີໂດຍສະຫາຍ ຮສ. ດຣ. ບຸນຖົມ ຊາມົນຕຼີ ກໍາປະການປະຈໍາພັກ, ອະທິການບໍດີ ມວສ; ດໍາລັດ ເລກທີ 282/ລບ, ລົງວັນທີ 22 ພຶດສະພາ 2024 ວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ສະເໜີໂດຍສະຫາຍ ສະໜອງ ທອງຊະນະ ຮອງເລຂາຄະນະພັກ, ຮອງລັດຖະມົນຕີກະຊວງສາທາລະນະສຸກ; ດໍາລັດ ເລກທີ 283/ລບ, ລົງວັນທີ 22 ພຶດສະພາ 2024 ວ່າດ້ວຍພາລະກອນ ສະເໜີໂດຍສະຫາຍ ດຣ. ໄພວັນ ແກ້ວປະເສີດ ກໍາມະການປະຈໍາພັກ, ປະທານກວດກາພັກ, ຮອງລັດຖະມົນຕີກະຊວງສາທາລະນະສຸກ.

     ໃນຕອນທ້າຍກອງປະຊຸມ, ປະທານໄດ້ມີຄໍາເຫັນ ແລະ ສະຫຼຸບລວມການຈັດຕັ້ງເຜີຍແຜ່-ເຊື່ອມຊຶມ ເອກະສານໃນຄັ້ງນີ້ ພ້ອມທັງມີທິດຊີ້ນໍາຕໍ່ໜ່ວຍພັກ, ສະມາຊິກພັກ, ພະນັກງານ-ລັດຖະກອນ ໄດ້ຮັບຮູ້, ເຂົ້າໃຈ ແລະ ກໍາໄດ້ເນື້ອໃນ ຈິດໃຈສໍາຄັນ ເພື່ອນໍາໄປຈັດຕັ້ງຜັນຂະຫຍາຍໃນຂົງເຂດວຽກງານໃນຄວາມຮັບຜິດຊອບຂອງຕົນໃຫ້ ສອດຄ່ອງ ແລະ ມີຜົນສໍາເລັດຕາມຄາດໝາຍທີ່ວາງໄວ້.