ໂດຍ : ວິທູນ

        ໃນວັນທີ 26 ກໍລະກົດ 2024 ນີ້, ສານປະຊາຊົນສູງສຸດ ໄດ້ຈັດພິທີ ມອບ-ຮັບ ໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2023 ໂດຍການໃຫ້ກຽດເປັນປະທານຂອງສະຫາຍ ນາງ ວຽງທອງ ສີພັນດອນ ເລຂາທິການສູນກາງພັກ, ເລຂາຄະນະບໍລິຫານງານພັກ, ປະທານສານປະຊາຊົນສູງສຸດ, ມີຮອງເລຂາຄະນະບໍລິຫານງານພັກ, ບັນດາຄະນະພັກ ແລະ ສະມາຊິກພັກສານປະຊາຊົນສູງສຸດ ເຂົ້າຮ່ວມຢ່າງພ້ອມພຽງ.

        ໃນພິທີດັ່ງກ່າວ ສະຫາຍ ຂຸນສະວັນ ສຸທຳມະວົງ ຄະນະປະຈຳພັກ, ຫົວໜ້າກົມຈັດຕັ້ງ-ພະນັກງານ ສານປະຊາຊົນສູງສຸດ ໄດ້ຜ່ານມະຕິ ຮັບຮອງເອົາ 11 ໜ່ວຍພັກ ເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະຈໍາປີ 2023 ແລະ ມະຕິຮັບຮອງເອົາ 3 ໜ່ວຍພັກ ໃຫ້ສືບຕໍ່ປະຕິບັດແຜນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ; ໜ່ວຍພັກທີ່ໄດ້ຮັບນາມມະຍົດເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະກອບມີ: 1. ໜ່ວຍພັກ ຫ້ອງການ, 2. ໜ່ວຍພັກກົມຈັດຕັ້ງ-ພະນັກງານ, 3. ໜ່ວຍພັກກົມແຜນການ-ການເງິນ, 4. ໜ່ວຍພັກກົມກວດກາ, 5. ໜ່ວຍພັກກົມຮ່ວມມືສາກົນ, 6. ໜ່ວຍພັກຄະນະສານເດັກ, 7. ໜ່ວຍພັກສະຖາບັນຄົ້ນຄວ້າ ແລະ ຝຶກອົບຮົມ, 8. ໜ່ວຍພັກຄະນະສານແຮງງານ, 9. ໜ່ວຍພັກຄະນະສານການຄ້າ, 10. ໜ່ວຍພັກຄະນະສານອາຍາ ແລະ 11. ໜ່ວຍພັກຄະນະສານປົກຄອງ; ສຳລັບ 3 ໜ່ວຍພັກ ທີ່ສືບຕໍ່ສ້າງແຜນການໃນປີຕໍ່ໄປ ປະກອບມີ: 1. ໜ່ວຍພັກກົມຄຸ້ມຄອງວິຊາການ ແລະ ສະຖິຕິສານ, 2. ໜ່ວຍພັກຄະນະສານແພ່ງ ແລະ 3. ໜ່ວຍພັກຄະນະສານຄອບຄົວ.

        ການປະເມີນໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະຈໍາປີ 2023, ບັນດາໜ່ວຍພັກ ໄດ້ປະຕິບັດຕາມ ຄໍາສັ່ງ ສະບັບເລກທີ 01/ກມສພ, ລົງວັນທີ 03 ມັງກອນ 2018 ວ່າດ້ວຍການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ຄໍາແນະນໍາ ສະບັບເລກທີ 291/ຄຈສພ, ລົງວັນທີ 26 ເມາສາ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ໂດຍເປັນເຈົ້າການເປີດກອງປະຊຸມຂອງຕົນຕາມກຳນົດເວລາ ພ້ອມທັງໄດ້ປະຕິບັດຕາມແຈ້ງການ ຂອງຄະນະຮັບຜິດຊອບຢ່າງເຄັ່ງຄັດ.

        ໃນໂອກາດນີ້, ປະທານກອງປະຊຸມ ໄດ້ມີຄໍາເຫັນໂອ້ລົມໃຫ້ບັນດາໜ່ວຍພັກ ສືບຕໍ່ປະຕິບັດແຜນກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ແລະ ເນັ້ນໃຫ້ເອົາໃຈໃສ່ຍົກສູງຄວາມເປັນແບບຢ່າງນໍາໜ້າ, ເພີ່ມທະວີຄວາມສາມັກຄີເປັນເອກະພາບ, ສ້າງຄວາມເຂັ້ມແຂງໃຫ້ແກ່ສານປະຊາຊົນໃນຖານະເປັນອົງການຕຸລາການ, ເປັນອົງການຫຼັກໃນການປົກປ້ອງກົດໝາຍໃຫ້ສັກສິດ, ສະກັດກັ້ນການລະເມີດກົດໝາຍ ເພື່ອປົກປັກຮັກສາສິດຜົນປະໂຫຍດອັນຊອບທໍາຂອງພົນລະເມືອງ, ຂອງລັດ ແລະ ຂອງລວມໝູ່; ຮັບປະກັນຄວາມຍຸຕິທໍາ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ເສີມຂະຫຍາຍໝາກຜົນຂອງການປະຕິວັດ, ລະບອບການເມືອງ, ເສດຖະກິດ, ວັດທະນະທໍາ-ສັງຄົມ ຕາມທິດສ້າງລັດທີ່ປົກຄອງດ້ວຍກົດໝາຍ, ສຳຄັນ ແມ່ນໃຫ້ສາມາດຮັກສາມູນເຊື້ອໜ່ວຍພັກ ປອດໃສ ເຂັ້ມແຂງ ໜັກແໜ້ນ ໄວ້ໃຫ້ໝັ້ນຄົງຕະລອດໄປ, ສໍາລັບໜ່ວຍພັກທີ່ຍັງບໍ່ທັນໄດ້ເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນ ແມ່ນໃຫ້ບຸກບືນສູ້ຊົນ ຈົນສາມາດກາຍເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃນປີຕໍ່ໄປ.