ໂດຍ: ອານຸລັກ ຈິດຕິລາດ

        ໃນວັນທີ 26 ກໍລະກົດ 2024 ທີ່ສະໂມສອນກະຊວງ ແຜນການ ແລະ ການລົງທຶນ (ຜທ) ໄດ້ຈັດພິທີປາຖະກະຖາ ວັນເກີດປະທານສຸພານຸວົງ ຄົບຮອບ 115 ປີ, ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 62 ປີ ແລະ ວັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ ຄົບຮອບ 47 ປີ. ໃຫ້ກຽດເປັນປະທານມີ ທ່ານ ນາງ ພອນວັນ ອຸທະວົງ ຮອງເລຂາຄະນະບໍລິຫານງານພັກ, ປະທານກວດກາພັກ, ຮອງລັດຖະມົນຕີກະຊວງ ຜທ ພ້ອມດ້ວຍຄະນະພັກກະຊວງ, ຄະນະໜ່ວຍພັກ, ສະມາຊິກພັກ ເຂົ້າຮ່ວມ 198 ສະຫາຍ, ຍິງ 73 ສະຫາຍ.

        ໃນພິທີດັ່ງກ່າວ ທ່ານ ນາງ ພອນວັນ ອຸທະວົງ ໄດ້ໃຫ້ກຽດປາຖະກະຖາເລົ່າມູນເຊື້ອວັນຄ້າຍວັນເກີດ ປະທານ ສຸພານຸວົງ ຄົບຮອບ 115 ປີ ເຊິ່ງໄດ້ຍົກໃຫ້ເຫັນເຖິງຜົນງານຂອງປະທານ ສຸພານຸວົງ ທີ່ໄດ້ອຸທິດສະຕິປັນຍາ, ເຫື່ອແຮງຂອງຕົນ, ຄວາມເສຍສະຫຼະ, ຄຸນງາມຄວາມດີປະກອບສ່ວນຢ່າງສໍາຄັນໃນການກໍ່ສ້າງແນວທາງຍຸດທະສາດ ເຂົ້າໃນການຕໍ່ສູ້ກູ້ຊາດ ພາຍໃຕ້ການນຳພາອັນສະຫຼາດສ່ອງໃສຂອງພັກ, ປະທານ ສຸພານຸວົງ ໄດ້ຕັ້ງໜ້າເຊີດຊູນໍ້າໃຈຮັກຊາດ ແລະ ຄວາມສາມັກຄີປອງດອງຊາດທົ່ວປວງຊົນລາວບັນດາເຜົ່າ, ບັນດາຊັ້ນຄົນ, ເຮັດສຳເລັດພາລະກິດປົດປ່ອຍຊາດ ກ້າວເຂົ້າສູ່ໄລຍະການປົກປັກຮັກສາ ແລະ ພັດທະນາປະເທດຊາດໃນປະຈຸບັນ.

        ພ້ອມນີ້, ໃນວາລະຍັງໄດ້ສືບຕໍ່ຮັບຟັງການເລົ່າມູນເຊື້ອວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 62 ປີ ແລະ ວັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ ຄົບຮອບ 47 ປີ ໃຫ້ກຽດເຜີຍແຜ່ໂດຍ ທ່ານ ວຽງສະຫວັນ ວິໄລພອນ ກຳມະການຄະນະບໍລິຫານງານພັກກະຊວງ ຜທ, ຮອງປະທານຄະນະກຳມະການຮ່ວມມື ລາວ-ຫວຽດນາມ ໂດຍທ່ານໄດ້ຍົກໃຫ້ເຫັນເຖິງຄວາມສາມັກຄີພິເສດຂອງສອງຊາດ ລາວ-ຫວຽດນາມ ທີ່ໄດ້ຄຽງບ່າຄຽງໄຫຼ່ກັນຕໍ່ສູ້ຢ່າງ​ພິລະ​ອາດ​ຫານ, ຜ່ານ​ຜ່າ​ທຸກ​ອຸປະສັກທຸລະກັນດານ ຮ່ວມກັນຕ້ານສັດຕູດຽວກັນ ​ທີ່ເຕັມໄປດ້ວຍຄວາມເສຍສະຫຼະ ແລະ ນໍ້າໃຈມິດຕະພາບຂອງອ້າຍນ້ອງ ລະຫວ່າງ ປະຊາຊົນສອງປະເທດ. ມາຮອດປະຈຸບັນ ຄົບຮອບ 62 ປີ ແຫ່ງການສ້າງຕັ້ງສາຍພົວພັນການທູດ ແລະ 47 ປີ ແຫ່ງສົນທິສັນຍາມິດຕະພາບ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ ເຊິ່ງເປັນການທົບທວນຄືນປະຫວັດສາດຄວາມສາມັກຄີມິດຕະພາບພິເສດຂອງ​ສອງ​ຊາດ ​ລາວ-ຫວຽດນາມ ໃຫ້ແກ່ບັນດາຄົນຮຸ່ນໃໝ່ ມີຄວາມເຂົ້າໃຈ ແລະ ເສີມຂະຫຍາຍໝາກຜົນ ແລະ ມູນເຊື້ອມິດຕະພາບ ລາວ-ຫວຽດນາມ ໃຫ້ແໜ້ນແຟ້ນຍິ່ງໆຂຶ້ນ ແລະ ຈະເລີນ ສວຍສົດ ງົດງາມຕະລອດໄປ.