ໂດຍ: ສົມໄຊ ຫຼ້າດວງມະນີ

ນັກຂ່າວຄະນະຈັດຕັ້ງແຂວງຊຽງຂວາງ

        ເພື່ອປະຕິບັດຕາມທິດຊີ້ນຳການຫັນເປັນທັນສະໄໝເທື່ອລະກ້າວໃນທຸກຂົງເຂດວຽກງານ, ຄະນະນຳແຕ່ລະຂັ້ນໄດ້ພະຍາຍາມໝູນໃຊ້ເຄື່ອງມືທີ່ທັນສະໄໝເຂົ້າໃນການປະຕິບັດໜ້າທີ່ການເມືອງ ກໍ່ຄືວຽກງານວິຊາສະເພາະຂອງຕົນຕາມຄວາມອາດສາມາດ ແລະ ເງື່ອນໄຂຕົວຈິງ. ໃນນີ້ ຄະນະຈັດຕັ້ງສູນກາງພັກ ແລະ ອົງການສາຍຕັ້ງຂັ້ນທ້ອງຖິ່ນ ກໍ່ຄືແຂວງຊຽງຂວາງ ໄດ້ເອົາໃຈໃສພັດທະນາວຽກງານໃນຄວາມຮັບຜິດຊອບຂອງຕົນ ເປັນຕົ້ນແມ່ນຂົງເຂດວຽກງານຈັດຕັ້ງ ໄດ້ສົມທົບກັນ ຍົກລະດັບຄວາມກ້າວໜ້າວຽກງານຄູ້ມຄອງສະມາຊິກພັກ ນໍາໃຊ້ໂປຼແກຼມຄຸ້ມຄອງສະມາຊິກພັກທີ່ຂຽນຂຶ້ນເພື່ອຮັບໃຊ້ວຽກງານພາຍໃນ ໂດຍທີມງານພະແນກເຕັກໂນໂລຊີຂໍ້ມູນຂ່າວສານ ຂອງຫ້ອງການ ຄະນະຈັດຕັ້ງສູນກາງພັກ ເຊິ່ງໄດ້ສືບຕໍ່ພັດທະນາໂປຼແກຼມດັ່ງກ່າວມາເປັນແຕ່ລະໄລຍະ ເພື່ອຮັບໃຊ້ວຽກງານໃຫ້ມີຄວາມສະດວກ, ຖືກຕ້ອງ, ວ່ອງໄວ, ທັນສະໄໝ, ຊັດເຈນໃນການເກັບກຳສະຖິຕິສະມາຊິກພັກ ແລະ ການຄຸ້ມຄອງສະມາຊິກພັກ.

        ໃນລະຫວ່າງວັນທີ 01-14 ພະຈິກ 2024 ນີ້, ຄະນະຮັບຜິດຊອບວຽກງານດັ່ງກ່າວ ໄດ້ສົມທົບກັນເຄື່ອນໄຫວປະຕິບັດໜ້າທີ່ວຽກງານຂອງຕົນຢູ່ແຂວງຊຽງຂວາງ, ເມືອງແປກ, ເມືອງພູກູດ, ເມືອງຄໍາ, ເມືອງໜອງແຮດ, ເມືອງຜາໄຊ, ເມືອງຄູນ, ເມືອງໝອກ, ກອງບັນຊາການທະຫານແຂວງ ແລະ ກອງບັນຊາການປ້ອງກັນຄວາມສະຫງົບແຂວງ. ການຕິດຕັ້ງ ແລະ ນໍາໃຊ້ໂປຼແກຼມດັ່ງກ່າວ ຈະຊ່ວຍໃຫ້ການລາຍງານຕົວເລກສະຖິຕິສະມາຊິກພັກ ແລະ ການຈັດຕັ້ງພັກ ມີຄວາມສະດວກ ຖືກຕ້ອງ-ວ່ອງໄວ-ທັນສະໄໝຂຶ້ນກວ່າເກົ່າ ພ້ອມທັງສາມາດເກັບຮັກສາຂໍ້ມູນໄວ້ນໍາໃຊ້ໄດ້ຍາວນານ.

        ຜ່ານການຕິດຕັ້ງ ແລະ ນຳໃຊ້ໂປຣແກຣມຕົວຈິງ ເຫັນວ່າ: ຄະນະນໍາແຕ່ລະພາກສ່ວນ ມີຄວາມພາກພູມໃຈ ແລະ ສະແດງຄວາມຊົມເຊີຍເປັນຢ່າງສູງທີ່ຄະນະຈັດຕັ້ງສູນກາງພັກ ໃຫ້ຄວາມສໍາຄັນຕໍ່ວຽກງານພັກ-ພະນັກງານ ພັດທະນານໍາໃຊ້ເຄື່ອງມືທີ່ທັນສະໄໝເຂົ້າໃນການເກັບກໍາສະຖິຕິພັກ, ຊີວະປະຫວັດສະມາຊິກພັກ ແລະ ຫັນວຽກງານຄຸ້ມຄອງສະມາຊິກພັກ ສູ່ຄວາມທັນສະໄໝໃນໄລຍະໃໝ່ເທື່ອລະກ້າວ. ຢູ່ແຕ່ລະບ່ອນທີ່ເຮັດວຽກຮ່ວມກັນ ຄະນະຮັບຜິດຊອບໄດ້ຈັດຝຶກອົບຮົມ, ຕິດຕັ້ງໂປຼແກຼມ, ແນະນຳຂັ້ນຕອນວິທີການນໍາໃຊ້, ການປ້ອນຂໍ້ມູນເຂົ້າໂປຣແກຣມ ແລະ ຮ່ວມກັນຄົ້ນຄວ້າແລກປ່ຽນບົດຮຽນເຊິ່ງກັນ ແລະ ກັນ.

        ໂຄງການຈັດຝຶກອົບຮົມ ຕິດຕັ້ງ ແລະ ນຳໃຊ້ໂປຼແກຼມຄຸ້ມຄອງສະມາຊິກພັກ ດັ່ງກ່າວນີ້ ໄດ້ເລີ່ມມາແຕ່ປີ 2023 ເຊິ່ງໄລຍະຜ່ານມາ ໄດ້ຈັດຝຶກອົບຮົມໃນລັກສະນະດຽວກັນນີ້ໃຫ້ກະຊວງ-ອົງການແລ້ວ 26 ພາກສ່ວນ, ຢູ່ທ້ອງຖິ່ນສຳເລັດແລ້ວ 2 ແຂວງ ແລະ ຈະສືບຕໍ່ດຳເນີນໂຄງການໄປຈົນກວ່າຈະບັນລຸເປົ້າໝາຍທີ່ວາງໄວ້ໃຫ້ສຳເລັດຜົນ.