ໃນຕອນເຊົ້າຂອງວັນທີ 21 ມີນາ 2018 ຢູ່ທີ່ຫ້ອງປະຊຸມໃຫຍ່ ຄະນະຈັດຕັ້ງສູນກາງພັກ ໄດ້ຈັດພິ ທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ, ພາຍໃຕ້ການເປັນປະທານຂອງ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ເລຂາທີການສູນກາງພັກ, ເລຂາຄະນະພັກ,  ຫົວໜ້າຄະນະຈັດຕັ້ງສູນກາງພັກ. ມີຫົວໜ້າກົມ, ຮອງກົມ ຕະຫຼອດຮອດພະນັກງານລັດຖະກອນທົ່ວສຳນັກງານຄະນະຈັດຕັ້ງສູນກາງພັກເຂົ້າຮ່ວມທັງໝົດ 154 ຄົນ.

          ໃນກອງປະຊຸມໄດ້ຮັບກຽດການເລົ່າຄືນມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ໂດຍທ່ານ ຈັນສີ ໂພສີຄຳ ທ່ານໄດ້ຍົກໃຫ້ເຫັນ ຊາດລາວເປັນຊາດໜຶ່ງ ທີ່ມີປະຫັວດແຫ່ງກຳເນີດອັນເກົ່າແກ່ທີ່ມີມູນເຊື້ອສະຫງ່າອົງອາດກ້າຫານ, ມູນເຊື້ອດຸໝັ້ນໃນການອອກແຮງງານ, ມູນເຊື້ອສາມັກຄີປອງດອງ, ມູນເຊື້ອຮັກເຊື້ອແພງຊາດ ແລະ ມູນເຊື້ອຮັກວັດທະນະທຳທີ່ເປັນເອກະລັກອັນຈົບງາມ ອັນພົ້ນເດັ່ນກວ່າໝູ່ແມ່ນມູນເຊື້ອແຫ່ງການຕໍ່ສູ້ບໍ່ຍອມຈຳນົນ ຕ້ານການຮຸກຮານຂອງສັດຕູຢ່າງເດັດດ່ຽວໝຽວແໜ້ນຂອງບັນພະບູລຸດລາວເຮົາໃນການທ້ອນໂຮມ, ປົກປັກຮັກສາ ແລະ ສ້າງສາປະເທດຊາດ ເພື່ອຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.

         ໃນທ້າຍສັດຕະວັດທີ XIX 3 ປະເທດອິນດູຈິນ ລາວ, ຫວຽດນາມ ແລະ ກໍາປູເຈຍ ໄດ້ຖືກ ຈັກກະພັດລ່າເມືອງຂື້ນຝຣັ່ງເຂົ້າມາຮຸກຮານ ປຸ້ນສະດົມຢ່າງໂຫດຮ້າຍປາເຖື່ອນ ປະຊາຊົນຖືກກົດຂີ່ຂູດຮິດຢ່າງໝັກໜ່ວງອັນແສນສາຫັດ ດັ່ງນັ້ນປະຊາຊົນຢູ່ໃນ 3 ປະເທດ ຈຶ່ງໄດ້ລຸກຂຶ້ນຕໍ່ສູ້ຢ່າງພິລະອາດຫານ, ເດັດຂາດບໍ່ຍອມເປັນຂ້ອຍຂ້າ ບໍ່ຍອມເສຍບ້ານເສຍເມືອງ ຈິ່ງມີຫຼາຍຂະບວນການລຸກຂື້ນຕໍ່ສູ້ນັບແຕ່ນ້ອຍຫາໃຫຍ່ແຕ່ແຄບຫາກວ້າງຕ່າງກັນ ແລະ ບາງຂະບວນການກໍ່ຍືດເຍື້ອຍາວນານ ແຕ່ຂະບວນການເລົ່ານັ້ນລ້ວນແຕ່ຖືກປາບປາມຍ້ອນບໍ່ມີພັກນຳພາ, ບໍ່ມີແນວທາງອັນຖືກຕ້ອງ.

          ວັນທີ 2/3/1930  ພັກຄອມມູນນິດອິນດູຈິນໄດ້ຮັບການສ້າງຕັ້ງຂື້ນ ພາຍໃຕ້ການຊີ້ນຳໂດຍກົງຮອບດ້ານຂອງ ປະທານໂຮຈິມິນ ພັກໄດ້ວາງແນວທາງຍຸດທະສາດ, ຍຸດໂທບາຍຂອງການປະຕິວັດອິນດູຈິນອອກຢ່າງລະອຽດ, ຊີ້ໃຫ້ເຫັນຊາຕາກຳຂອງປະຊາຊົນ 3 ປະເທດທີ່ຕົກເປັນຫົວເມືອງຂື້ນຂອງຈັກກະພັດລ່າເມືອງຂື້ນຝຣັ່ງ, ຍົກໃຫ້ເຫັນຂໍ້ຂັດແຍ່ງພື້ນຖານໃນອິນດູຈິນ ແມ່ນຂໍ້ຂັດແຍ່ງລະຫວ່າງກຳມະກອນ-ຊາວນາ ແລະ ປະຊາຊົນຜູ້ອອກແຮງງານ ກັບຈັກກະພັດຝຣັ່ງ, ສັກດີນາ, ເຈົ້າທີ່ດິນ ແລະ ນາຍທຶນ, ໜ້າທີ່ພື້ນຖານແມ່ນໂຄ່ນລົ້ມຈັກກະພັດຝຣັ່ງ ເຮັດໃຫ້ອິນດູຈິນເປັນເອກະລາດສົມບູນລົບລ້າງລະບອບສັກດີນາ, ກຳລັງຕົ້ນຕໍຂອງການປະຕິວັດ ແມ່ນກຳມະກອນ ແລະ ຊາວນາ ພາຍໃຕ້ການນຳພາຂອງຊົນຊັ້ນກຳມະກອນ ປັດໃຈຕັດສິນໄຊຊະນະຂອງການປະຕິວັດ ແມ່ນພັກຄອມມູນນິດ ທີ່ມີແນວທາງການເມືອງທີ່ຖືກຕ້ອງສອດຄ່ອງກັບສະພາບຕົວຈິງຂອງການປະຕິວັດ.

        ພາຍໃຕ້ການນຳພາຂອງພັກຄອມມູນນິດອິນດູນຈິນ ການປະຕິວັດປະເທດເຮົາເຕີບໃຫຍ່ຂື້ນເລື້ອຍໆ ເປັນຕົ້ນແມ່ນ ປີ 1934 ອົງຄະນະພັກແຄ້ວນລາວໄດ້ຮັບການສ້າງຕັ້ງຂື້ນ ເຊິ່ງເປັນບາດກ້າວທຳອິດທີ່ມີການປັບປຸງ ແລະ ຂະຫຍາຍການຈັດຕັ້ງພັກ ແລະ ອົງການຈັດຕັ້ງມະຫາຊົນ, ພັກໄດ້ຍູ້ແຮງວຽກງານປຸກລະດົມຂົນຂວາຍມະຫາຊົນຢູ່ເຂດຊົນນະບົດ ແລະ ບໍລິເວນຊົນເຜົ່າ ຖືຊາວໄຮ່ນາເປັນກຳລັງແຮງພື້ນຖານຂອງການປະຕິວັດ. ສະນັ້ນ, ຈື່ງເຮັດໃຫ້ຂະບວນການຕໍ່ສູ້ກຳເນີດຂື້ນແຕ່ຕໍ່າຫາສູງໃນທົ່ວປະເທດ,  ສາມາດຍຶດອຳນາດ 23 ສີງຫາ 1945, ປະກາດເອກະລາດ ປະຫວັດສາດຂອງຄວາມເປັນຊາດລາວໃນວັນທີ 12 ຕຸລາ 1945, ສ້າງຕັ້ງກອງທັບປະຊາຊົນລາວຂື້ນໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະຫລະຂື້ນໃນວັນທີ 13 ສີງຫາ 1950 ເຊິ່ງໄດ້ກາຍເປັນຄັນທຸງເຕົ້າໂຮມ, ດຶງດູດເອົາທຸກຊັ້ນຄົນເຂົ້າຮ່ວມການປະຕິວັດໄດ້ຢ່າງກວ້າງຂວາງ ແລະ ແຂງແຮງ, ເປັນເວທີເຄື່ອນໄຫວຕໍ່ສູ້ແບບເປີດເຜີຍຂອງພັກເຮົາເພາະເວລານັ້ນ ພັກເຮົາໄດ້ເຄື່ອນໄຫວປິດລັບຖືເອົາແນວລາວອິດສະຫລະ ແລະ ຕໍ່ມາແມ່ນແນວລາວຮັກຊາດອອກໜ້າເຄື່ອນໄຫວຕໍ່ສູ້ ແລະ ພົວພັນກັບສາກົນ ໂດຍມີແກນນຳຂອງພັກ ແລະ ສະມາຊິກພັກນອນຢູ່ໃນຄະນະນຳຂອງແນວລາວຮັກຊາດ.

           ກອງປະຊຸມໃຫ່ຍຄັ້ງທີ່ II ຂອງພັກກອມມູນິດອິນດູຈີນ ປີ 1951 ໄດ້ມີມະຕິຕົກລົງໃຫ້ແຕ່ລະປະເທດສ້າງຕັ້ງພັກຂອງໃຜລາວຂື້ນ. ສະນັ້ນ, ບັນດາສະຫາຍສະມາຊິກພັກກອມມູນິດອິນດູຈີນທີ່ເປັນຄົນລາວໄດ້ຈັດຕັ້ງ “ຄະນະກຳມະການປະຊາຊົນລາວ” ຂື້ນເພື່ອສຶບຕໍ່ດໍາເນີນການພາກປະຕິວັດຢູ່ລາວ ແລະ ໄດ້ກະກຽມດ້ານຄວາມພ້ອມຕ່າງໆຢ່າງລະອຽດເປັນເວລາ 4 ປີ ຈື່ງໄດ້ດຳເນີນກອງປະຊຸມໃຫ່ຍຄັ້ງທຳອິດ (ຄັ້ງທີ I ) ຂອງຕົນຂື້ນໃນວັນທີ 22 ມີນາ 1955 ທີ່ບ້ານນາແມວ, ເມືອງວຽງໄຊ, ແຂວງຫົວພັນ ຊື່ງເປັນເຂດທີ່ໝັ້ນຂອງການປະຕິວັດໃນເວລານັ້ນ ແລະ ໄດ້ເອີ້ນຊື່ວ່າ: “ພັກປະຊາຊົນລາວ” ໂດຍແມ່ນປະທານ ໄກສອນ ພົມວິຫານ ເປັນເລຂາທິການໃຫ່ຍຂອງຄະນະບໍລິຫານງານສູນກາງພັກ. ເຂົ້າຮ່ວມກອງປະຊຸມຄັ້ງປະຫວັດສາດນີ້ມີຜູ້ແທນສົມບູນ 20 ສະຫາຍ ຕາງໜ້າໃຫ້ສະມາຊິກພັກເກືອບ 400 ສະຫາຍໃນທົ່ວປະເທດ.

        ທ່ານ ໄດ້ຍົກໃຫ້ເຫັນທາດແທ້ ແລະ ອຸດົມການຂອງພັກປະຊາຊົນປະຕິວັດລາວແມ່ນພັກຂອງຊົນຊັ້ນກຳມະກອນ, ເປັນຕົວແທນທີ່ຈົງຮັກພັກດີຕໍ່ສິດຜົນປະໂຫຍດຂອງຊົນຊັ້ນກຳມະກອນ, ຊາວຜູ້ອອກແຮງງານລາວຜູ້ຮັກຊາດ ແລະ ຂອງຊາດລາວທັງໝົດ, ພັກປະຊາຊົນປະຕິວັດລາວຍຶດໝັ້ນລັດທິມາກ-ເລນິນ ເປັນພື້ນຖານແຫ່ງແນວຄິດ, ເປັນເຂັມຊີ້ທິດໃຫ້ແກ່ແນວທາງການຈັດຕັ້ງ ແລະ ການເຄື່ອນໄຫວຂອງພັກ; ເສີມຂະຫຍາຍລັດທິຮັກຊາດອັນແທ້ຈີງສົມທົບກັບລັດທິສາກົນອັນຜ່ອງໃສຂອງຊົນຊັ້ນກຳມະກອນ; ຮັບເອົາສິ່ງຍອດຍິ່ງທາງດ້ານສະຕິປັນຍາທີ່ກ້າວໜ້າຂອງມວນມະນຸດ ເພື່ອກຳນົດແນວທາງ, ແຜນນະໂຍບາຍຂອງພັກ; ຍົກສູງຄວາມສາມາດ ແລະ ຄຸນນະພາບການນຳພາຂອງພັກ; ຕ້ານລະບອບຫລາຍເຄົ້າ, ຫລາຍພັກ, ລັດທິເອກະຊົນ ແລະ ລັດທິສວຍໂອກາດໃນທຸກຮູບແບບ, ນັບແຕ່ມື້ສ້າງຕັ້ງຂື້ນ ພັກປະຊາຊົນປະຕິວັດລາວໄດ້ກຳນົດອຸດົມການຂອງຕົນຢ່າງຈະແຈ້ງຄື: ນຳພາປວງຊົນລາວດຳເນີນການຕໍ່ສຸ້ພວກຈັກກະພັດລ່າເມືອງຂື້ນ ເພື່ອນຳເອົາຄວາມເປັນເອກະລາດມາໃຫ້ແກ່ປະເທດຊາດ ແລະ ສິດເປັນເຈົ້າມາໃຫ້ປະຊາຊົນ,  ສ້າງສາປະເທດຊາດສູ່ຈຸດໝາຍສັງຄົມນິຍົມ.

          ນອກຈາກການຟັງປາຖະກະຖາການເລົ່າມູນເຊື້ອຂອງພັກປະຊາຊົນປະຕິວັດລາວແລ້ວ ພະນັກງານທັງໝົດພາຍໃນຄະນະຈັດຕັ້ງສູນກາງພັກ  ຍັງໄດ້ເຂົ້າຮ່ວມວາງກະຕ່າດອກໄມ້ຢູ່ຫໍພິພິທະພັນ ປະທານ ໄກສອນ ພົມວິຫານ ແລະ ຢ້ຽມຊົມອານຸສອນສະຖານ ປະທານ ໄກສອນ ພົມວິຫານ ອີກດ້ວຍ.