ໃນຕອນເຊົ້າຂອງວັນທີ 11 ເມສາ 2017 ຄະນະຈັດຕັ້ງສູນກາງພັກ ໄດ້ຈັດກອງປະຊຸມສະຫຼຸບວຽກງານປະຈຳປີ 2017 ໂດຍການເປັນປະທານຂອງ ສະຫາຍ ຈັນສີ ໂພສີຄຳ ກຳມະການກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຄະນະພັກ ຄະນະ ຈັດຕັ້ງສູນກາງພັກ, ຫົວໜ້າກົມ, ຮອງກົມ ຕະຫຼອດຮອດພະນັກງານທົ່ວສຳນັກງານ ຄະນະຈັດຕັ້ງ ສູນກາງພັກທັງໝົດເຂົ້າຮ່ວມ.

        ກອງປະຊຸມ ໄດ້ຜ່ານບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານ ປະຈຳປີ 2017 ແລະ ທິດທາງແຜນການປະຈໍາປີ 2018 ເຊິ່ງນໍາສະເໜີໂດຍ ສະຫາຍ ວັນໄຊ ພອງສະຫວັນ ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ. ຜ່ານການຈັດຕັ້ງປະຕິບັດວຽກງານໃນໄລຍະ 1 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນການກໍ່ສ້າງພັກທາງດ້ານການເມືອງແນວຄິດ ຄະນະພັກແຕ່ລະຂັ້ນໄດ້ເປັນເຈົ້າການ ສຶກສາອົບຮົມນຳພາແນວຄິດສະມາຊິກພັກ-ພະນັກງານ ທີ່ຢູ່ໃນຄວາມຮັບຜິດຊອບຂອງຕົນເປັນປົກກະຕິ; ການກໍ່ສ້າງພັກທາງດ້ານການຈັດຕັ້ງ ໄດ້ເອົາໃຈໃສ່ປັບປຸງການເຄື່ອນໄຫວຂອງການຈັດຕັ້ງພັກ ໃຫ້ສອດຄ່ອງກັບສະພາບຕົວຈິງ ໂດຍສຸມໃສ່ການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ. ທາງດ້ານວຽກງານວິຊາສະເພາະໄດ້ສຸມໃສ່ຊີ້ນຳບັນດາກົມຄົ້ນຄວ້າປັບປຸງນິຕິກຳໃໝ່ຫຼາຍສະບັບ, ອະນຸມັດນຳສົ່ງໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານ ໄດ້ຈຳນວນ 7.567 ໃບ, ໄດ້ຄົ້ນຄວ້າອອກບັດ-ມອບບັດ ໃຫ້ສະມາຊິກພັກສົມບູນ ໄດ້ຈຳນວນ 44.824 ສະຫາຍ, ອະນຸມັດອອກຕາປະທັບໃຫ້ການຈັດຕັ້ງພັກແຕ່ລະຂັ້ນ ໄດ້ຈຳນວນ 4.705 ໜ່ວຍ, ເອົາໃຈໃສ່ປັບປຸງລະບົບສື່ຕ່າງໆຂອງຄະນະຈັດຕັ້ງສູນກາງພັກ, ຊຸກຍູ້ການສ້າງແຜນກຳນົດພະນັກງານນຳພາ-ຄຸ້ມຄອງຂັ້ນສູນກາງຄຸ້ມຄອງ, ພ້ອມທັງສົມທົບກັບທ້ອງຖິ່ນເຮັດທົດລອງການສ້າງແຜນກຳນົດພະນັກງານນຳ ພາ-ຄຸ້ມຄອງຂັ້ນບ້ານ ໄດ້ 16 ບ້ານ, ຄັດເລືອກເອົາພະນັກງານໄປກໍ່ສ້າງ-ບຳລຸງທາງດ້ານທິດສະດີການເມືອງ-ການປົກຄອງນັບທັງຢູ່ພາຍໃນ ແລະ ຕ່າງປະເທດ, ສົມທົບກັບຄະນະຈັດຕັ້ງກະຊວງ-ອົງການຈຳນວນໜຶ່ງປັບປຸງການຈັດຕັ້ງ ແລະ ພາລະບົດບາດ, ສິດໜ້າທີ່ຂອງແຕ່ລະພາກສ່ວນຄືນໃຫມ່ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນປະຈຸບັນ. ນອກຈາກນັ້ນຍັງໄດ້ຈັດຕັ້ງການມອບໃບຍ້ອງຍໍພະນັກງານ-ລັດຖະກອນຜູ້ທີ່ມີຜົນງານດີເດັ່ນ ປະຈຳປີ ຈຳນວນ 50 ສະຫາຍອີກດ້ວຍ.

        ໃນຕອນທ້າຍປະທານກອງປະຊຸມໄດ້ມີຄຳເຫັນໂອ້ລົມ ເຊິ່ງສະຫາຍໄດ້ຍ້ອງຍໍຊົມເຊີຍ ແລະ ໃຫ້ທິດຊີ້ນຳໃນການຈັດຕັ້ງປະຕິບັດວຽກງານໃນປີຕໍ່ໜ້າ, ໂດຍໃຫ້ນຳເອົາເນື້ອໃນຈິດໃຈກອງປະຊຸມ ຄັ້ງນີ້ໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ.