ຜົນສຳເລັດກອງປະຊຸມເຜີຍແຜ່ ແນະນຳນິຕິກຳກ່ຽວກັບວຽກງານກໍ່ສ້າງພັກ-ພະນັກງານ
ຈຳນວນຜູ້ອ່ານ: 185
ອະນຸມັດວັນທີ:
04/06/2018
ໃນລະຫວ່າງວັນທີ 10-11 ພຶດສະພາ 2018 ຜ່ານມານີ້ ຄະນະຈັດຕັ້ງສູນກາງພັກ ໄດ້ເປີດກອງປະຊຸມເຜີຍແຜ່ນິຕິກຳກ່ຽວກັບວຽກງານກໍ່ສ້າງພັກ-ພະນັກງານ ທີ່ສູນຝຶກອົບຮົມ ແລະ ຮ່ວມມືສາກົນ (ICTC), ໂດຍການເປັນປະທານຂອງ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ເລຂາທິ ການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີພະນັກງານຫຼັກແຫຼ່ງ, ວິຊາການທົ່ວສຳນັກງານຄະນະຈັດຕັ້ງສູນກາງພັກ, ມີຫົວໜ້າຄະນະຈັດຕັ້ງກະຊວງ-ອົງການ, ຫົວໜ້າຄະນະຈັດຕັ້ງແຂວງ ແລະ ຫົວໜ້າຄະນະຈັດຕັ້ງເມືອງໃນຂອບເຂດທົ່ວປະເທດເຂົ້າຮ່ວມ 351 ທ່ານ. ກອງປະຊຸມໄດ້ຮັບການເຜີຍແຜ່ແນະນຳການຈັດຕັ້ງປະຕິບັດເອກະສານ ກ່ຽວກັບວຽກງານກໍ່ສ້າງພັກ-ພະນັກງານຄື:
- ຄຳສັ່ງ ຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 03 ມັງກອນ 2018 ວ່າດ້ວຍ ການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 291/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 03 ມັງກອນ 2018 ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ.
- ຄຳສັ່ງ ຂອງຄະນະເລຂາທິການສູນກາງພັກ ສະບັບເລກທີ 04/ຄລສພ, ລົງວັນທີ 07 ພຶດສະ ພາ 2018 ວ່າດ້ວຍການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນຫຼວງ, ອົງຄະນະພັກເມືອງ-ນະຄອນ ແລະ ຮາກຖານພັກໃນຂອບເຂດທົ່ວປະເທດ; ຜ່ານຮ່າງຄຳແນະນຳຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດຄຳສັ່ງ ຂອງຄະນະເລຂາທິການສູນກາງພັກ ວ່າດ້ວຍການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນຫຼວງ, ອົງຄະນະພັກເມືອງ-ນະຄອນ ແລະ ຮາກຖານພັກໃນຂອບເຂດທົ່ວປະເທດ, ເປັນ ກຽດເຜີຍແຜ່ເອກະສານດັ່ງກ່າວໂດຍ ທ່ານ ວັນໄຊ ພອງສະຫວັນ ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ.
- ມະຕິ ຂອງກົມການເມືອງສູນກາງພັກ ສະບັບເລກທີ 032/ກມສພ, ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ; ມະຕິ ສະບັບເລກທີ 030/ກມສພ, ລົງວັນທີ 03 ມັງກອນ 2018 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ; ມະຕິ ສະບັບເລກທີ 031/ກມສພ, ລົງວັນທີ 03 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ ແລະ ຄຳສັ່ງແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກ ງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ: ເປັນກຽດເຜີຍແຜ່ເອກະສານດັ່ງກ່າວໂດຍ ທ່ານ ທອງຈັນ ໂຂງພູມຄຳ ກຳມະການປະຈຳຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ
ໃນຕອນທ້າຍກອງປະຊຸມໄດ້ຮັບກຽດຟັງການໂອ້ລົມຈາກ ທ່ານ ຈັນສີ ໂພສີຄຳ ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ທ່ານໄດ້ເນັ້ນໜັກຫຼາຍບັນຫາຄື:
- ເປັນເຈົ້າການສືບຕໍ່ຄົ້ນຄວ້າເຊື່ອມຊຶມ, ກຳແໜ້ນເນື້ອໃນ ບັນດາມະຕິ, ຄຳສັ່ງ, ບົດແນະນຳເຫຼົ່ານີ້ ໃຫ້ເລິກເຊິ່ງ, ເຖິງຖອງ ແລະ ຈັດຕັ້ງຜັນຂະຫຍາຍຢູ່ຂະແໜງການແລະ ທ້ອງຖິ່ນຂອງຕົນ, ເຮັດໃຫ້ເນື້ອໃນຂອງມະຕິດັ່ງກ່າວກາຍເປັນການກະທຳຕົວຈິງ, ມີຜົນສຳເລັດຕົວຈິງ.
- ຄະນະພັກເອົາໃຈໃສ່ຊຸກຍູ້ການກໍ່ສ້າງຮາກຖານພັກ, ໜ່ວຍພັກ ຕາມທິດກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ ໂດຍໂດຍຊີ້ນຳທຸກໜ່ວຍພັກເປັນເຈົ້າການສ້າງແຜນການຂອງໜ່ວຍພັກ, ກຳນົດຄາດໝາຍສູ້ຊົນແຕ່ອົງຄະນະພັກໃຫ້ຈະແຈ້ງ. ສຳ ລັບຄະນະຈັດຕັ້ງແຕ່ລະຂັ້ນ ຕ້ອງສ້າງແຜນການຕິດຕາມຊຸກຍູ້ການຈັດຕັ້ງປະຕິບັດຢ່າງໄກ້ຊິດ, ປົກກະຕິ, ຕໍ່ເນື່ອງ ເພື່ອເຮັດໃຫ້ການກໍ່ສ້າງໜ່ວຍພັກ ປະຕິບັດໃຫ້ຖືກ ຕ້ອງຕາມເນື້ອໃນ, ບາດກ້າວ, ຂັ້ນຕອນ ທີ່ກຳນົດໄວ້ໃນຄຳສັ່ງຂອງກົມການເມືອງສູນກາງພັກ, ຮັບປະກັນທາງດ້ານຄຸນນະພາບໃນການນຳພາວຽກງານຮອບດ້ານຢູ່ຂັ້ນຮາກຖານ, ໃຫ້ເອົາໃຈໃສ່ແຕ່ຫົວທີ ເລີ່ມແຕ່ການສ້າງແຜນການໃຫ້ແທດກັບສະ ພາບຄວາມເປັນຈິງ, ຮູ້ນຳພາຈັດຕັ້ງປະຕິບັດແຜນການ, ຮູ້ສະຫຼຸບຕີລາຄາການຈັດຕັ້ງປະຕິບັດແຜນການ, ຮູ້ຕີລາຄາຄຸນນະພາບ ແລະ ແບ່ງປະເພດສະມາຊິກພັກ ແລະ ໜ່ວຍພັກ; ຫຼີກເວັ້ນການກໍ່ສ້າງ ແລະ ຮັບຮອງ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ທີ່ບໍ່ມີຄຸນນະພາບ, ໄດ້ແຕ່ທາງດ້ານຈຳນວນ; ການຕີລາຄາແບ່ງປະເພດສະ ມາຊິກພັກ, ໜ່ວຍພັກ ຕ້ອງເອົາຜົນສຳເລັດການເຄື່ອນໄຫວຊີ້ນຳ-ນຳພາເປັນຕົວຊີ້ວັດເຖິງຄຸນນະພາບສະມາຊິກພັກ ແລະ ໜ່ວຍພັກ.
- ຮີບຮ້ອນຈັດຕັ້ງກະກຽມດຳເນີນກອງປະຊຸມໃຫຍ່ຮາກຖານພັກ, ເຮັດໃຫ້ຂະບວນ ການ ກະກຽມດຳເນີນກອງປະຊຸມ ຄັ້ງນີ້ກາຍເປັນບັ້ນປັບປຸງ ພາຍໃນພັກໃຫ້ມີຄວາມໜັກ ແໜ້ນ, ເຂັ້ມແຂງ ໃຫ້ເປັນການຍົກສູງຄວາມສາມາດນຳພາຂອງຄະນະພັກຢູ່ຂັ້ນຮາກຖານຢ່າງແທ້ຈິງ ແລະ ໃຫ້ຕິດພັນກັບການປັບປຸງອົງການປົກຄອງບ້ານ.
- ອື່ນໝົດຕ້ອງຈັດຕັ້ງເຊື່ອມຊຶມ ຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ, ອົງການ, ແຂວງ -ນະຄອນຫຼວງ; ອົງຄະນະພັກເມືອງ-ນະຄອນ ແລະ ຮາກຖານພັກ ໃນຂອບເຂດທົ່ວປະເທດ ສະບັບເລກທີ 04/ຄລສພ, ລົງວັນທີ 7/5/2018 ແລະ ອອກມະຕິຕົກລົງແຕ່ງຕັ້ງຄະນະຮັບຜິດຊອບລວມ, ອະນຸກຳມະການຊ່ວຍວຽກກະກຽມດຳເນີນກອງປະຊຸມໃຫຍ່ຂັ້ນຂອງຕົນ; ຄົ້ນຄ້ວາຂຶ້ນແຜນງົບປະມານ; ສ້າງແຜນການລະອຽດໃນການກະກຽມ ແລະ ດຳເນີນກອງປະຊຸມໃຫຍ່ ໃຫ້ທັນເວລາທີ່ກຳນົດໄວ້.
- ກະກຽມ ແລະ ດຳເນີນກອງປະຊຸມໃຫຍ່ ດ້ານພື້ນຖານແມ່ນໃຫ້ອີງໃສ່ກົດລະ ບຽບພັກ ແລະ ຄຳສັ່ງຂອງຄະນະເລຂາທິການສູນກາງພັກ, ເອົາໃຈໃສ່ຍູ້ຂະບວນການວຽກງານແຕ່ລະດ້ານໃຫ້ກາຍເປັນຂະບວນການຂອງມະຫາຊົນ, ໃຫ້ມະຫາຊົນເປັນເຈົ້າການຈັດຕັ້ງປະຕິບັດ, ສຳຄັນແມ່ນໃຫ້ຖືເອົາການປັບປຸງກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດພັນກັບຂະບວນການການດຳເນີນກອງປະຊຸມໃຫຍ່ຂັ້ນຮາກຖານພັກ, ພ້ອມນັ້ນ ກໍ່ໃຫ້ເອົາໃຈໃສ່ກະກຽມທາງດ້ານເນື້ອໃນໃຫ້ສອດຄ່ອງກັບສະພາບຕົວຈິງ, ສຳລັບຄະນະຈັດຕັ້ງພວກເຮົາ ຕົ້ນຕໍແມ່ນການກະກຽມທາງດ້ານບຸກຄະລາກອນ ເພາະວ່າບັນຫານີ້ເປັນບັນຫາສຳຄັນທີ່ສຸດ ຂອງການດຳເນີນກອງປະຊຸມໃຫຍ່ຂອງຄະນະພັກແຕ່ລະຂັ້ນ. ຕ້ອງເລືອກເຟັ້ນບຸກຄະລາກອນ ປະກອບເຂົ້າໃນໂຄງປະກອບຂອງຄະນະພັກ ໃຫ້ຖືກຕ້ອງຕາມມາດຕະຖານ, ເງື່ອນໄຂ ທີ່ໄດ້ກຳນົດໄວ້ໃນມະຕິຂອງກົມການເມືອງສູນກາງພັກ ເລກທີ 030 ລົງວັນທີ 03 ມັງກອນ 2018 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ ເພື່ອຍົກສູງຄວາມສາມາດນຳພາຂອງຄະນະພັກ ໃນການປະຕິບັດໜ້າທີ່ການເມືອງຂອງຕົນ ໃຫ້ສົມຄູ່ກັບການເລັ່ງທວງໃນໄລຍະໃໝ່. ສະເໜີໃຫ້ບັນດາສະຫາຍ ຈົ່ງພ້ອມກັນຖອດຖອນບົດຮຽນໃນການດຳເນີນກອງປະຊຸມຄັ້ງຜ່ານມາວ່າ ພວກເຮົາເຮັດມີດ້ານດີ-ດ້ານອ່ອນ ຂໍ້ຄົງຄ້າງຫຍັງແດ່ ເພື່ອຈະເຮັດໃຫ້ການດຳເນີນກອງປະຊຸມໃຫຍ່ຄັ້ງນີ້ມີຜົນສຳເລັດຕາມຈຸດປະສົງ ແລະ ຄາດ ໝາຍທີ່ວາງໄວ້.
- ຜ່ານມາສັງເກດເຫັນວ່າ ການສ້າງແຜນກຳນົດພະນັກງານນຳພາ-ຄຸ້ມຄອງ ຍັງພົບຄວາມຫຍຸ້ງຍາກ, ບໍ່ທັນຮັບປະກັນທາງດ້ານມາດຕະຖານ, ເງື່ອນໄຂ ຕາມທີ່ໄດ້ກຳ ນົດໄວ້; ການປະເມີນ ແຜນກຳນົດພະນັກງານ ບໍ່ໄດ້ເຮັດເປັນປົກກະຕິແຕ່ລະປີ, ສະນັ້ນ ພວກເຮົາຕ້ອງສູ້ຊົນສ້າງແຜນກຳນົດພະນັກງານໃຫ້ມີຄຸນນະພາບໃໝ່ ຕາມມະຕິເລກທີ 032 ຂອງກົມການເມືອງສູນກາງພັກ, ລົງວັນທີ 03 ມັງກອນ 2018, ວ່າດ້ວຍການສ້າງແຜນກຳນົດພະນັກງານຢ່າງເຂັ້ມງວດ, ການສ້າງແຜນກຳນົດພະນັກ ງານຕ້ອງເຮັດເປັນໝູ່ຄະນະ, ອີງໃສ່ການເລັ່ງທວງຂອງໜ້າທີ່ການເມືອງໃນສະເພາະໜ້າ ແລະ ຍາວນານ ເລີ່ມຈາກສະພາບຄວາມເປັນຈິງຂອງຖັນແຖວພະນັກ ງານ, ຮັບປະກັນລັກສະນະເປີດກ້ວາງ ແລະ ເຄື່ອນເໜັງ, ຄຳນຶງເຖີງໂຄງປະກອບເພດ, ເຜົ່າ ຢ່າງສົມເຫດສົມຜົນ ແລະ ເລັ່ງໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ-ຄຸ້ມຄອງ ແຕ່ລະຂັ້ນ, ແຕ່ລະຂະ ແໜງການ ໃນການຄາດຄະເນສັບຊ້ອນ ແລະ ຈັດວາງພະນັກງານຢ່າງສົມເຫດສົມຜົນ.
- ຫຼັງຈາກມີແຜນກຳນົດພະນັກງານນຳພາ, ຄຸ້ມຄອງແລ້ວ ກໍ່ຂຶ້ນແຜນກໍ່ສ້າງ ແລະ ບຳ ລຸງພະນັກງານ ຢ່າງຮອບດ້ານ, ເນັ້ນໃສ່ຄຸນນະພາບເປັນຕົ້ນຕໍ. ການກໍ່ສ້າງ-ບຳລຸງພະນັກງານ ຕ້ອງອີງໃສ່ແຜນກຳນົດພະນັກງານ, ໝາຍວ່າຕ້ອງສ້າງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ຫຼີກເວັ້ນການສ້າງຕາມຄ່ານິຍົມ ຫຼື ຄວາມ ຕ້ອງການຂອງສ່ວນບຸກຄົນ, ຮູບການກໍ່ສ້າງ, ບຳລຸງ ພະນັກງານ ນອກຈາກສ້າງຢູ່ສະຖາບັນການສຶກສາທັງພາຍໃນ ແລະ ຕ່າງປະເທດແລ້ວ ໃຫ້ເນັ້ນໃສ່ສ້າງໃນຂະບວນວຽກງານຕົວຈິງ, ສ້າງຢູ່ຮາກຖານ ແລະ ສ້າງໃນຂະບວນການມະຫາຊົນເປັນຕົ້ນຕໍ.
- ໃນແງ່ການແຕ່ງຕັ້ງ, ຍົກຍ້າຍ, ສັບຊ້ອນ, ຈັດວາງ ພະນັກງານ ຜ່ານມາກໍ່ເຫັນວ່າມີບາງກໍລະນີບໍ່ປະຕິບັດຕາມຂັ້ນຕອນຢ່າງເຂັ້ມງວດ; ບໍ່ໄດ້ມີການປະເມີນຕີລາຄາ, ສຳຫຼວດກວດກາ ກ່ອນຈະມີການແຕ່ງຕັ້ງ, ຍົກຍ້າຍ ຈາກຕຳແໜ່ງນີ້ໄປຮັບຜິດຊອບຕຳແໜ່ງອື່ນ; ການຕົກລົງບັນຫາຕ່າງໆຂອງພະນັກງານ ບາງບ່ອນບໍ່ເປັນໝູ່ຄະນະ ແລະ ບໍ່ໄປຕາມການແບ່ງຂັ້ນຄຸ້ມຄອງ.
- ກ່ອນຈະມີການສັບຊ້ອນ, ຍົກຍ້າຍພະນັກງານທຸກລະດັບ ຈາກຕຳແໜ່ງໜຶ່ງໄປສູ່ຕຳແໜ່ງໜຶ່ງຈະແມ່ນກໍລະນີໃດກໍຕາມ ຕ້ອງດຳເນີນການສຳຫຼວດກວດກາ, ຕີລາຄາຄຸນນະພາບຂອງພະນັກງານຜູ້ນັ້ນໃຫ້ຈະແຈ້ງ; ການສັບຊ້ອນ, ຈັດວາງພະນັກ ງານ-ລັດຖະກອນ ເຂົ້າໃສ່ຕຳແໜ່ງງານໃຫ້ຖືກກັບວຽກຕົວຈິງ, ແກ້ໄຂໃຫ້ໄດ້ສະ ພາບພະນັກງານເຫຼືອບໍ່ພໍ ຢູ່ໃນການຈັດຕັ້ງ.ເພີ່ມທະວີການຄຸ້ມຄອງ ແລະ ກຳແໜ້ນ ຄຸນນະພາບ ແລະ ການເຄື່ອນໄຫວຂອງພະນັກງານທີ່ຂຶ້ນກັບສິດຄຸ້ມຄອງ ຂອງຄະນະພັກຂັ້ນຕົນ. ຜ່ານມາການຄຸ້ມຄອງພະ ນັກງານບໍ່ທັນເຮັດໄດ້ດີ, ກຳພະນັກງານບໍ່ແໜ້ນ.
ກອງປະຊຸມໄດ້ປິດລົງໃນຕອນບ່າຍຂອງວັນທີ 11 ພຶດສະພາ 2018 ດ້ວຍຜົນສຳເລັດອັນຈົບງາມ.
ໂດຍ: ພະແນກຂໍ້ມູນຂ່າວສານ
