ໃນວັນທີ 28 ມັງກອນ 2020 ຄະນະຈັດຕັ້ງສູນກາງພັກໄດ້ຈັດກອງປະຊຸມສະຫຼຸບຕີລາຄາສະພາບການຈັດຕັ້ງປະຕິບັດວຽກງານຂອງຕົນ ປະຈຳປີ 2019 ແລະ ທິດທາງ ປີ 2020 ພ້ອມນີ້ຍັງໄດ້ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ X ໃຕ້ການເປັນປະທານຂອງສະຫາຍ ຈັນສີ ໂພສີຄຳ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະພັກຄະນະຈັດຄັ້ງສູນກາງພັກ, ຫົວໜ້າກົມ, ຮອງກົມ, ພະນັກງານອາວຸໂສບຳນານ ແລະ ສະມາຊິກພັກ-ພະນັກງານທົ່ວ ຄຈສພ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ສະຫຼຸບຕີລາຄາສະພາບການຈັດຕັ້ງປະຕິບັດວຽກງານ ປະຈຳປີ 2019 ແລະ ທິດທາງແຜນການປີ 2020 ສະເໜີໂດຍສະຫາຍ ວັນໄຊ ພອງສະຫວັນ ຮອງເລຂາຄະນະພັກ, ຮອງຫົວໜ້າ ຄຈສພ. ໃນໜຶ່ງປີຜ່ານມາ, ຄະນະຈັດຕັ້ງສູນກາງພັກ ໄດ້ເປັນເຈົ້າການນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ແລະ ທິດທາງແຜນການປີ 2019 ໂດຍການຫັນເປັນແຜນການເຄື່ອນໄຫວປະຈຳເດືອນຂອງຕົນ. ຄະນະພັກ ຄະນະຈັດຕັ້ງສູນກາງພັກ ໄດ້ເອົາໃຈໃສ່ນຳພາວຽກງານການເມືອງ-ແນວຄິດພະນັກງານ, ສະມາຊິກພັກ ຢ່າງເປັນປົກກະຕິຕໍ່ເນື່ອງ ເປັນຕົ້ນແມ່ນ: ໄດ້ຊີ້ນໍາບັນດາໜ່ວຍພັກ, ບັນດາກົມ ແລະ ອົງການຈັດຕັ້ງມະຫາຊົນ ໃຫ້ເອົາໃຈໃສ່ສຶກສາອົບຮົມສະມາຊິກພັກ, ພະນັກງານ-ລັດຖະກອນ ທີ່ຂຶ້ນກັບຄວາມຮັບຜິດຊອບຂອງຕົນຢ່າງໃກ້ຊິດ ແລະ ເປັນປົກກະຕິ ເພື່ອຍົກສູງສະຕິຄວາມຮັບຜິດຊອບຕໍ່ໜ້າທີ່ການເມືອງ, ສະຕິຕໍ່ການຈັດຕັ້ງປະຕິບັດລະບຽບວິໄນ ຕິດພັນກັບການຮ່ວມຊີວິດພັກຂອງບັນດາໜ່ວຍພັກ ແລະ ວຽກງານວິຊາສະເພາະປະຈໍາເດືອນຂອງບັນດາກົມ ແລະ ອົງການຈັດຕັ້ງມະຫາຊົນ; ຈັດຕັ້ງເຊື່ອມຊຶມມະຕິ 7 ຂອງຄະນະບໍລິຫານງານສູນກາງພັກ ສະໄໝທີ X ແລະ ຈັດຕັ້ງປາຖະກະຖາເລົ່າມູນເຊື້ອວັນສໍາຄັນຕ່າງໆຂອງພັກ-ຂອງຊາດ.
ຜ່ານການສຶກສາອົບຮົມການເມືອງ-ແນວຄິດຄືດັ່ງກ່າວ ເຮັດໃຫ້ສະມາຊິກພັກ, ພະນັກງານ-ລັດຖະກອນ ມີຄວາມເຊື່ອໝັ້ນ, ເປັນເອກະພາບຕໍ່ແນວທາງນະໂຍບາຍ ແລະ ການນຳພາຂອງພັກສູງຂຶ້ນ, ມີຄວາມອຸ່ນອຽນທຸ່ນທ່ຽງ, ມີຄວາມຮັບຜິດຊອບ, ມີສະຕິຕໍ່ການຈັດຕັ້ງ, ລະບຽບວິໄນ; ຈໍາກັດ ແລະ ຕີຖອຍໄດ້ສະພາບແນວຄິດການກະທຳທີ່ບໍ່ຖືກຕ້ອງຂອງສະມາຊິກພັກ-ພະນັກງານຈຳນວນໜຶ່ງ. ບັນດາໜ່ວຍພັກໃຫ້ເອົາໃຈໃສ່ກໍ່ສ້າງພັກຕິດແໜ້ນກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ປັບປຸງຄຸນນະພາບຂອງການຂະຫຍາຍພັກ, ເຮັດໃຫ້ວຽກງານຂະຫຍາຍພັກໄດ້ດໍາເນີນຢ່າງຕໍ່ເນື່ອງ ແລະ ຖືກຕາມກົດລະບຽບຂອງພັກ. ໃນ 1 ປີຜ່ານມາ ໄດ້ຂະຫຍາຍມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ 04 ສະຫາຍ, ຍິງ 4 ສະຫາຍ; ເລື່ອນສະມາຊິກພັກສໍາຮອງ ເປັນສະມາຊິກພັກສົມບູນ 12 ສະຫາຍ, ຍິງ 4 ສະຫາຍ. ຮັບເອົາສະມາຊິກພັກມາຮ່ວມຊີວິດພັກຢູ່ອົງຄະນະພັກຄະນະຈັດຕັ້ງສູນກາງພັກ 02 ສະຫາຍ, ຍົກຍ້າຍສະມາຊິກພັກໄປຮ່ວມຊີວິດພັກຢູ່ໜ່ວຍພັກໃໝ່ ຈໍານວນ 18 ສະຫາຍ, ຍິງ 03 ສະຫາຍ, ອອກບັດ-ມອບບັດໃຫ້ສະມາຊິກພັກສົມບູນ 14 ສະຫາຍ, ຍິງ 06 ສະຫາຍ; ປະຈຸບັນຄະນະຈັດຕັ້ງສູນກາງພັກ ມີສະມາຊິກພັກທັງໝົດ 151 ສະຫາຍ, ຍິງ 57 ສະຫາຍ.
ໄດ້ສຸມໃສ່ການຄົ້ນຄວ້າສ້າງ ແລະ ປັບປຸງນິຕິກໍາກ່ຽວກັບວຽກງານພັກ-ພະນັກງານ ສະເໜີກົມການເມືອງ, ຄະນະເລຂາທິການສູນກາງພັກ ແລະ ຄະນະຈັດຕັ້ງສູນກາງພັກຮັບຮອງ ແລະ ລົງລາຍເຊັນປະກາດໃຊ້ຢ່າງເປັນທາງການ ເຊັ່ນ: ອອກຄຳສັ່ງ ເລກທີ 064 ວ່າດ້ວຍວຽກງານຂະຫຍາຍພັກ, ມະຕິຂອງກົມການເມືອງສູນກາງພັກ ເລກທີ 072 ວ່າດ້ວຍລະບອບການຮໍ່າຮຽນທິດສະດີການເມືອງ; ມະຕິຂອງກົມການເມືອງສູນກາງພັກ ເລກທີ 073 ວ່າດ້ວຍການສ້າງແຜນກໍ່ສ້າງ-ບຳລຸງພະນັກງານນຳພາ-ຄຸ້ມຄອງ; ຄຳສັ່ງ ຂອງຄະນະເລຂາທິການສູນກາງພັກເລກທີ 03 ວ່າດ້ວຍການປັບປຸງຫຼັກສູດການຮຽນ-ການສອນທິດສະດີການເມືອງ ໃນລະບົບໂຮງຮຽນພັກ ແລະ ລະບົບການສຶກສາແຫ່ງຊາດ, ຂໍ້ກຳນົດ ເລກທີ 01 ຂອງຄະນະເລຂາທິການສູນກາງພັກ ວ່າດ້ວຍການຢັ້ງຢືນລະດັບທິດສະດີການເມືອງ ແລະ ຄຳແນະນຳຂອງຄະນະຈັດຕັ້ງສູນກາງພັກ ເລກທີ 201, 204 ກ່ຽວກັບການຈັດຕັ້ງປະຕິບັດບັນດານິຕິກຳດັ່ງກ່າວ.
ນອກຈາກນັ້ນ, ຍັງໄດ້ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝ 10 ສະເໜີໂດຍ ສະຫາຍ ທອງຈັນ ໂຂງພູມຄຳ ຄະນະພັກ, ຮອງຫົວໜ້າ ຄຈສພ ເພື່ອໃຫ້ສະມາຊິກພັກ-ພະນັກງານໄດ້ຮັບຮູ້ ເຂົ້າໃຈຢ່າງຈະແຈ້ງກ່ຽວກັບມະຕິດັ່ງກ່າວໃຫ້ເລິກເຊິ່ງ ແລະ ນຳໄປຈັດຕັ້ງຜັນຂະຫຍາຍເຂົ້າສູ່ໜ້າທີ່ວຽກງານຂອງຕົນຕາມເນື້ອໃນ ແລະ ທິດຊີ້ນຳຂອງນິຕິກຳດັ່ງກ່າວ.
ພ້ອມນີ້ ໃນວາລະກອງປະຊຸມຍັງໄດ້ມີພິທີມອບໃບຍ້ອງຍໍຜົນງານໃຫ້ພະນັກງານດີເດັ່ນ ໃນການປະຕິບັດໜ້າທີ່ວຽກງານຢ່າງມີຜົນສຳເລັດ ປະຈຳປີ 2019; ເດັ່ນປະເພດ 1 ມີ 34 ສະຫາຍ ແລະ ເດັ່ນປະເພດ 2 ມີ 48 ສະຫາຍ.
ຕອນທ້າຍກອງປະຊຸມ, ສະຫາຍ ຈັນສີ ໂພສີຄຳ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໜ້າທີ່ວຽກງານໃນປີ 2019 ແລະ ສະແດງຄວາມເປັນຫ່ວງເປັນໃຍຕໍ່ຂໍ້ຄົງຄ້າງ ພ້ອມທັງໃຫ້ທິດຊີ້ນຳໃນການແກ້ໄຂຂໍ້ຄົງຄ້າງໃນຕໍ່ໜ້າ; ສະຫາຍໄດ້ຮຽກຮ້ອງມາຍັງສະມາຊິກພັກ-ພະນັກງານທຸກສະຫາຍ ໃຫ້ພ້ອມກັນຕັ້ງໜ້າປະຕິບັດໜ້າທີ່ວຽກງານທີ່ຕົນຮັບຜິດຊອບໃຫ້ມີຜົນສຳເລັດໃໝ່ລື່ນຄາດໝາຍທີ່ວາງໄວ້.
ໂດຍ: ລັດດາວັນ
