ໃນທ້າຍເດືອນກໍລະກົດ ແລະ ຕົ້ນເດືອນສິງຫາ 2020 ໜ່ວຍພັກກົມໂຄສະນາກໍ່ສ້າງພັກ-ພະນັກງານ ແລະ ໜ່ວຍພັກກົມປ້ອງກັນພັກ-ພະນັກງານ ຄະນະຈັດຕັ້ງສູນກາງພັກ ໄດ້ຈັດພິທີຮັບສະມາຊິກພັກສຳຮອງ 2 ສະຫາຍ (ໜ່ວຍພັກລະ 1 ສະຫາຍ) ເຂົ້າເປັນລັງແຮງໃນການປະຕິບັດໜ້າທີ່ການເມືອງຊ່ວຍໜ່ວຍພັກຂອງຕົນ ໃນນີ້ ໜ່ວຍພັກ ກົມໂຄສະນາກໍ່ສ້າງພັກ-ພະນັກງານ ໄດ້ຈັດຂຶ້ນວັນທີ 31 ກໍລະກົດ 2020 ແລະ ໜ່ວຍພັກກົມປ້ອງກັນພັກ-ພະນັກງານ ໄດ້ຈັດຂຶ້ນວັນທີ 5 ສິງຫາ 2020, ໂດຍໃຫ້ກຽດເຂົ້າຮ່ວມ ແລະ ມີຄຳເຫັນໂອ້ລົມຂອງສະຫາຍ ວັນໄຊ ພອງສະຫວັນ ຮອງເລຂາຄະນະພັກ ຄະນະຈັດຕັ້ງສູນກາງພັກ, ສະຫາຍເລຂາໜ່ວຍພັກ ພ້ອມດ້ວຍສະມາຊິກພັກພາຍໃນໜ່ວຍ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

          ໃນພິທີດັ່ງກ່າວ ໄດ້ຜ່ານມະຕິຕົກລົງຂອງຄະນະພັກ ຄະນະຈັດຕັ້ງສູນກາງພັກ ວ່າດ້ວຍການຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງ, ຈາກນັ້ນ ມະຫາຊົນກ້າວໜ້າຂຶ້ນມາສະເໜີໂຕ, ສະຫາຍເລຂາໜ່ວຍພັກໄດ້ມີຄຳເຫັນ ແລະ ຈັບມືຕ້ອນຮັບສະມາຊິກພັກໃໝ່ ເພື່ອສືບຕໍ່ກໍ່ສ້າງໃຫ້ຜ່ານສະໄໝສຳຮອງ 12 ເດືອນ ແລະ ກ້າວໄປສູ່ການເປັນສະມາຊິກພັກສົມບູນໃນຂັ້ນຕໍ່ໄປ.

          ໃນຕອນທ້າຍຂອງພິທີ ຕາງໜ້າຄະນະພັກຄະນະຈັດຕັ້ງສູນກາງພັກ ໄດ້ມີຄຳເຫັນໂອ້ລົມຕໍ່ສະມາຊິກພັກໃໝ່ທີ່ຈະຕ້ອງໄດ້ເພີ່ມຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ, ພ້ອມທັງໄດ້ເນັ້ນໃຫ້ຄະນະໜ່ວຍພັກຕະຫຼອດຮອດສະມາຊິກພັກທຸກສະຫາຍພາຍໃນໜ່ວຍພັກ ພ້ອມກັນກໍ່ສ້າງສະມາຊິກພັກໃໝ່ໃຫ້ກາຍເປັນສະມາຊິກພັກສົມບູນທີ່ມີຄຸນນະພາບ, ມີຄວາມຈົງຮັກພັກດີຕໍ່ອຸດົມການຂອງພັກ ແລະ ເຮັດລ້ອນໜ້າທີ່ການເມືອງຂອງຕົນໃຫ້ມີຜົນສຳເລັດເປັນກ້າວໆ.

ໂດຍ: ວິລະສະໄໝ ຍົດບຸນມີ