ໂດຍ: ວິລະສະໄໝ ຍົດບຸນມີ
ໃນວັນທີ 21 ກໍລະກົດ 2021 ໜ່ວຍພັກກົມກໍ່ສ້າງພະນັກງານ ຄະນະຈັດຕັ້ງສູນກາງພັກ ໄດ້ຈັດພິທີເລື່ອນສະມາຊິກພັກສຳຮອງເປັນສົມບູນ 1 ສະຫາຍ ເຂົ້າເປັນກຳລັງແຮງໃນການປະຕິບັດໜ້າທີ່ການເມືອງຊ່ວຍໜ່ວຍພັກ ໂດຍການເປັນປະທານຂອງສະຫາຍ ວິລະພັນ ສິລິທຳ ຮັກສາການເລຂາໜ່ວຍພັກກົມກໍ່ສ້າງພະນັກງານ ໃຫ້ກຽດເຂົ້າຮ່ວມຂອງສະຫາຍ ນາງ ວິໄລວັນ ເພັງສະຫວັດ ຄະນະພັກ ຄະນະຈັດຕັ້ງສູນກາງພັກ, ມີຜູ້ຕາງໜ້າຈາກບັນດາໜ່ວຍພັກ ແລະ ອົງການຈັດຕັ້ງມະຫາຊົນ ອ້ອມຂ້າງຄະນະຈັດຕັ້ງສູນກາງພັກ ພ້ອມດ້ວຍສະມາຊິກພັກພາຍໃນໜ່ວຍພັກເຂົ້າຮ່ວມ.
ໃນພິທີດັ່ງກ່າວ ໄດ້ຜ່ານມະຕິຕົກລົງຂອງຄະນະພັກ ຄະນະຈັດຕັ້ງສູນກາງພັກ ວ່າດ້ວຍການເລື່ອນສະມາຊິກພັກສຳຮອງເປັນສະມາຊິກພັກສົມບູນ, ຈາກນັ້ນ ສະມາຊິກພັກສົມບູນ ຂຶ້ນສະເໜີໂຕກ່າວຄຳປະຕິຍານ ແລະ ສະຫາຍເລຂາໜ່ວຍພັກໄດ້ຂຶ້ນກ່າວຄຳເຫັນ ແລະ ຈັບມືຮັບເອົາເຂົ້າເປັນກຳລັງແຮງໃນການປະຕິບັດໜ້າທີ່ການເມືອງຊ່ວຍໜ່ວຍພັກຂອງຕົນສືບເນື່ອງຕໍ່ໄປ.
ໃນຕອນທ້າຍຂອງພິທີ ສະຫາຍ ນາງ ວິໄລວັນ ເພັງສະຫວັດ ໄດ້ມີຄຳເຫັນໂອ້ລົມຕໍ່ສະມາຊິກພັກ ໂດຍສະເພາະສະມາຊິກພັກໃໝ່ ກ່ອນອື່ນສະຫາຍໄດ້ຍ້ອງຍໍຊົມເຊີຍຕໍ່ໜ່ວຍພັກທີ່ສາມາດສ້າງໄດ້ສະມາຊິກພັກໃໝ່ເພື່ອປະກອບເປັນກຳລັງແຮງໃຫ້ກັບໜ່ວຍພັກ, ນອກນັ້ນ ຍັງໄດ້ເນັ້ນໃຫ້ສະມາຊິກພັກທັງໝົດ ສືບຕໍ່ຝຶກຝົນຫຼໍ່ຫຼອມຕົນເອງໃນທຸກດ້ານ, ເອົາໃຈໃສ່ຄົ້ນຄວ້າຮໍ່າຮຽນ ກຳແໜ້ນແນວທາງນະໂຍບາຍຂອງພັກ ເປັນເຈົ້າການປະຕິບັດກົດລະບຽບຂອງພັກຢ່າງເຂັ້ມງວດ ເພື່ອເຮັດລ້ອນໜ້າທີ່ການເມືອງທີ່ໄດ້ຮັບມອບໝາຍ.
