ພາບ ແລະ ຂ່າວໂດຍ: ສ.ສົດໃສ
ເພື່ອສືບຕໍ່ປະຕິບັດຕາມຄຳສັ່ງຂອງຄະນະເລຂາທິການສູນກາງພັກ ເລກທີ 04/ຄລສພ, ລົງວັນທີ 07 ພຶດສະພາ 2018 ວ່າດ້ວຍການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນຫຼວງ, ເມືອງ-ນະຄອນ ແລະ ຮາກຖານພັກ ໃນທົ່ວປະເທດ; ໃນວັນທີ 9 ກັນຍາ 2021 ຢູ່ທີ່ຄະນະຈັດຕັ້ງສູນກາງພັກ ໄດ້ຈັດກອງປະຊຸມແນະນຳວຽກງານກ່ຽວກັບການກະກຽມດຳເນີນກອງປະຊຸມໃຫຍ່ອົງຄະນະພັກ 19 ກະຊວງ-ອົງການ ໂດຍພາຍໃຕ້ການເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ມີສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກຄະນະຈັດຕັ້ງສູນກາງພັກ ແລະ ມີຄະນະຮັບຜິດຊອບໜ່ວຍງານລົງຊຸກຍູ້, ຕິດຕາມການກະກຽມດຳເນີນກອງປະຊຸມໃຫຍ່ອົງຄະນະພັກ 19 ກະຊວງ-ອົງການເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງການລາຍງານສະພາບການກະກຽມດຳເນີນກອງປະຊຸມໃຫຍ່ອົງຄະນະພັກ 19 ພາກສ່ວນ ພາຍຫຼັງທີ່ໄດ້ສຳເລັດກອງປະຊຸມໃຫຍ່ ຄັ້ງທີ XI ຂອງພັກ ຄະນະຈັດຕັ້ງສູນກາງພັກໄດ້ເຮັດແຈ້ງການເຖິງອົງຄະນະພັກ ແລະ ໄດ້ແຕ່ງຕັ້ງຄະນະຮັບຜິດຊອບຕິດຕາມ, ຊຸກຍູ້ການກະກຽມດຳເນີນກອງປະຊຸມດັ່ງກ່າວ ເຊິ່ງມາຮອດປະຈຸບັນນີ້ ແມ່ນໄດ້ສຳເລັດໄປແລ້ວ 2 ພາກສ່ວນຄື: ອົງຄະນະພັກຄະນະໂຄສະນາອົບຮົມສູນກາງພັກ, ອົງຄະນະພັກສານປະຊາຊົນສູງສຸດ ແລະ ມີ 5 ພາກສ່ວນໄດ້ລາຍງານຄວາມພ້ອມແລ້ວ.
ໃນຕອນທ້າຍຂອງກອງປະຊຸມ ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນຳຄະນະຮັບຜິດຊອບໜ່ວຍງານຊຸກຍູ້, ຕິດຕາມການກະກຽມດຳເນີນກອງປະຊຸມໃຫຍ່ອົງຄະນະພັກ 19 ກະຊວງ-ອົງການ ເອົາໃຈໃສ່ຈັດຕັ້ງປະຕິບັດໃຫ້ຖືກຕ້ອງຕາມກົດລະບຽບຂອງພັກ, ຖືກຕ້ອງຕາມຄຳສັ່ງ, ຄຳແນະນຳ ແລະ ນິຕິກຳທີ່ກ່ຽວຂ້ອງ ເປັນຕົ້ນດ້ານຂະບວນການໃຫ້ແຕ່ລະອົງຄະນະພັກສືບຕໍ່ຍູ້ຂະບວນການຮອບດ້ານພາຍໃນອົງຄະນະພັກຂອງຕົນ, ເອົາໃຈໃສ່ເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ, ກົດລະບຽບຂອງພັກ ສະໄໝທີ XI ຕັ້ງແຕ່ຫົວທີ່; ເອົາໃຈໃສ່ປະຕິບັດຂະບວນການ 2 ວາລະແຫ່ງຊາດ; ຂະບວນການປະຕິບັດໜ້າທີ່ການເມືອງຕິດພັນກັບການແກ້ໄຂປະກົດການຫຍໍ້ທໍ້ຂອງແຕ່ລະພາກສ່ວນ. ດ້ານບຸກຄະລາກອນແມ່ນໃຫ້ລົງເລິກການກຳແໜ້ນການເຄື່ອນໄຫວຂອງພະນັກງານ-ສະມາຊິກພັກ, ການເຮັດຊີວິດການເມືອງສຳຫຼວດກວດກາໃຫ້ເລິກເຊິ່ງ, ເອົາໃຈໃສ່ບັນຫາໂຄງປະກອບໃຫ້ຄົບຖ້ວນຮັບປະກັນ 3 ລຸ້ນ ຖືສຳຄັນມາດຖານ, ເພດ-ເຜົ່າ, ການແຈກຢາຍໃນໜ່ວຍງານຕ່າງໆ ຮັບປະກັນຄວາມເປັນເອກະພາບພາຍຫຼັງສຳເລັດກອງປະຊຸມແລ້ວ ຕ້ອງມີຄວາມສາມັກຄີເປັນກຳລັງແຮງໃນການນຳພາຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂັ້ນຂອງຕົນໃຫ້ເກີດໝາກເກີດຜົນ…ຯ
