ຂ່າວ: ສ.ສົດໃສ
ພາບ: ສົມພອນ, ບຸນທີ.
ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ໃນລະຫວ່າງ ວັນທີ 19-20 ມັງກອນ 2022 ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງຫຼວງພະບາງ ໂດຍການຕ້ອນຮັບຂອງສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງຫຼວງພະບາງ ພ້ອມດ້ວຍຄະນະ.
ໃນໂອກາດດັ່ງກ່າວ ສະຫາຍ ນາງ ສີໃສ ລືເດດມູນສອນ ໄດ້ພົບປະກັບຄະນະປະຈຳພັກແຂວງຫຼວງພະບາງ, ຄະນະຈັດຕັ້ງແຂວງ, ຄະນະພັກນະຄອນຫຼວງພະບາງ ແລະ ຮາກຖານໜ່ວຍພັກອີກຈຳນວນໜຶ່ງ ເຊິ່ງການພົບປະເຮັດວຽກຢູ່ແຕ່ລະບ່ອນ ແມ່ນໄດ້ຮັບຟັງການລາຍງານສະພາບລວມການນຳພາຂອງຄະນະພັກແຕ່ລະຂັ້ນ ພ້ອມກັບມີຄຳເຫັນໂອ້ລົມ ໃຫ້ທິດຊີ້ນຳຕໍ່ການນຳພາຂອງຄະນະພັກ-ຄະນະນຳແຕ່ລະຂັ້ນໃຫ້ຖືກຕ້ອງຕາມແນວທາງນະໂຍບາຍລວມຂອງພັກ, ສອດຄ່ອງເໝາະສົມຕາມທ່າແຮງ-ເງື່ອນໄຂໃນທ້ອງຖິ່ນຂອງຕົນ, ເອົາໃຈໃສ່ນຳພາວຽກງານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນຳພາຂອງພັກ ຮັບປະກັນໄດ້ຄຸນນະພາບ ເຮັດໃຫ້ການຈັດຕັ້ງປະຕິບັດຖືກຕ້ອງ ແລະ ເປັນເອກະພາບກັນໃນທົ່ວພັກ, ສ້າງພັກໃຫ້ປອດໃສ ເຂັ້ມແຂງ ໜັກແໜ້ນ ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ຂັ້ນຂອງຕົນໃຫ້ປະກົດຜົນເປັນຈິງຕາມທີ່ໄດ້ກຳນົດໄວ້…ຯ
