ພາບ: ແສງອາລຸນ, ຂ່າວ: ສ.ສົດໃສ
ໃນວັນທີ 25 ເມສາ 2022 ຄະນະຈັດຕັ້ງສູນກາງພັກ ໄດ້ຈັດພິທີເຜີຍແຜ່, ເຊື່ອມຊຶມຈັນຍາບັນຂອງພະນັກງານ-ລັດຖະກອນ ໂດຍການເຂົ້າຮ່ວມຂອງສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະພັກ, ຄະນະນຳຂອງຄະນະຈັດຕັ້ງສູນກາງພັກ, ຫົວໜ້າກົມ-ຮອງກົມ ແລະ ຫົວໜ້າພະແນກ-ຮອງພະແນກທີ່ຂຶ້ນກັບຄະນະຈັດຕັ້ງສູນກາງພັກເຂົ້າຮ່ວມ.
ພິທີດັ່ງກ່າວ ສະຫາຍ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ, ໄດ້ຂຶ້ນເຜີຍແຜ່, ເຊື່ອມຊຶມເອກະສານສຳຄັນ 2 ສະບັບຄື: ດຳລັດວ່າດ້ວຍຈັນຍາບັນຂອງພະນັກງານ-ລັດຖະກອນ ເລກທີ 184/ລບ, ລົງວັນທີ 26/6/2019 ແລະ ຄຳແນະນຳການຈັດຕັ້ງປະຕິບັດວຽກງານຈັນຍາບັນຂອງພະນັກງານ-ລັດຖະກອນ ເລກທີ 04/ພນ, ລົງວັນທີ 2 ເມສາ 2021 ຈຸດປະສົງເພື່ອເປັນການເພີ່ມທະວີການຍົກສູງຈັນຍາບັນຂອງພະນັກງານ-ລັດຖະກອນທົ່ວສຳນັກງານ ຄະນະຈັດຕັ້ງສູນກາງພັກ ໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດໜັກແໜ້ນ, ມີຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນ, ມີສະຕິຕື່ນຕົວເຄົາລົບ, ປະຕິບັດກົດໝາຍ ແລະ ລະບຽບການຢ່າງເຂັ້ມງວດ, ມີປະສິດທິພາບປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດໃຫ້ມີຄວາມຈະເລີນ, ສີວິໄລຍິ່ງໆຂຶ້ນໄປ.
ຕອນທ້າຍຂອງພິທີ ບັນດາຜູ້ເຂົ້າຮ່ວມຍັງໄດ້ທາບທາມ ແລະ ປ່ອນບັດຄັດເລືອກເອົາບຸກຄະລາກອນເຂົ້າໃນຕຳແໜ່ງສຳຄັນຂອງຄະນະຈັດຕັ້ງສູນກາງພັກຕື່ມອີກ...ຯ
