ພາບ: ພິດສະໄໝ, ຂ່າວ: ສ.ສົດໃສ
ວັນທີ 9 ມັງກອນ 2023 ຄະນະຈັດຕັ້ງສູນກາງພັກ ໄດ້ຈັດຊຸດຝຶກອົບຮົມວຽກງານປ້ອງກັນພັກ-ພະນັກງານ ຊຸດທີ IV ຢູ່ທີ່ສະຖາບັນການເມືອງ ແລະ ການປົກຄອງແຫ່ງຊາດ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ທອງຈັນ ໂຂງພູມຄຳ ກຳມະການປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ, ມີຄະນະພັກ ຄະນະຈັດຕັ້ງສູນກາງພັກ, ຫົວໜ້າກົມ-ຮອງກົມ, ວິທະຍາກອນ, ມີສຳມະນາກອນທີ່ມາຈາກກະຊວງ-ອົງການ, ແຂວງ ແລະ ນະຄອນຫຼວງ ຈຳນວນ 52 ທ່ານ, ຍິງ 17 ທ່ານ ພ້ອມດ້ວຍຄະນະຮັບຜິດຊອບຝຶກອົບຮົມເຂົ້າຮ່ວມ.
ຊຸດຝຶກອົບຮົມຄັ້ງນີ້ ເພື່ອຍົກສູງວຽກງານປ້ອງກັນພັກ-ພະນັກງານໃນໄລຍະໃໝ່ ໃຫ້ແກ່ຜູ້ທີ່ຮັບຜິດຊອບວຽກງານປ້ອງກັນພັກ-ພະນັກງານໃນທົ່ວປະເທດ ໄດ້ຮັບຮູ້-ເຂົ້າໃຈກ່ຽວກັບຄວາມໝາຍສຳຄັນ, ເນື້ອໃນ ແລະ ທິດທາງ, ວິທີການໃນວຽກງານປ້ອງກັນພັກ-ພະນັກງານຢ່າງເລິກເຊິ່ງ ແລະ ມີຄວາມໜັກແໜ້ນ-ເຂັ້ມແຂງ ເພື່ອສະກັດກັ້ນປະກົດການຫຍໍ້ທໍ້ຕ່າງໆພາຍໃນພັກ, ໃນຖັນແຖວພະນັກງານ-ສະມາຊິກພັກ ແນໃສ່ເຮັດໃຫ້ພັກມີຄວາມປອດໃສ, ເຂັ້ມແຂງ ໜັກແໜ້ນ ທັງເປັນການຍົກລະດັບທາງດ້ານວິຊາສະເພາະໃນວຽກງານປ້ອງກັນພັກ-ພະນັກງານ ໃຫ້ມີປະສິດທິພາບ ແລະ ປະສິດທິຜົນສູງ.
ບັນດາເອກະສານນຳໃຊ້ໃນການຝຶກອົບຮົມປະກອບມີ 05 ບົດຄື: 1. ພື້ນຖານວຽກງານປ້ອງກັນພັກ-ພະນັກງານ, 2. ວຽກງານກຳສະພາບການເມືອງພາຍໃນ, 3. ວຽກງານກວດກາ, ພິສູດ, ຢັ້ງຢືນກ່ຽວກັບການເມືອງພາຍໃນ ແລະ ເນື້ອໃນສຳນວນຈຳນວນໜຶ່ງ, 4. ວຽກງານກຳ ແລະ ຄຸ້ມຄອງສະພາບການເມືອງພາຍໃນ ແລະ 5. ສຳນວນເອກະສານວຽກງານປ້ອງກັນພັກ-ພະນັກງານ ໂດຍມີວິທະຍາກອນທີ່ມາຈາກຄະນະຈັດຕັ້ງສູນກາງພັກ, ກົມໃຫຍ່ການເມືອງປ້ອງກັນຄວາມສະຫງົບ ຜູ້ທີ່ມີປະສົບການ ແລະ ບົດຮຽນທາງດ້ານທິດສະດີ ແລະ ພຶດຕິກຳຕົວຈິງ ຂຶ້ນບັນຍາຍຖ່າຍທອດບົດຮຽນ ເຊິ່ງຈະໄດ້ມີການແລກປ່ຽນບົດຮຽນເຊິ່ງກັນ ແລະ ກັນຈາກປະສົບການຕົວຈິງ.
ໃນຕອນທ້າຍພິທີ ທ່ານ ທອງຈັນ ໂຂງພູມຄຳ ກຳມະການປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ໃຫ້ກຽດໂອ້ລົມ ເຊິ່ງໄດ້ຮຽກຮ້ອງສຳມະນາກອນ ຈົ່ງພ້ອມກັນຕັ້ງໜ້າຄົ້ນຄວ້າ-ກຳແໜ້ນ ບັນດາເນື້ອໃນເອກະສານນັບທັງພາກທິດສະດີ ແລະ ບົດຮຽນພຶດຕິກຳຕົວຈິງ ຊອກໃຫ້ເຫັນບັນຫາທີ່ຕົນເອງສົນໃຈ ເພື່ອນຳມາສົນທະນາແລກປ່ຽນນຳວິທະຍາກອນ. ພ້ອມນັ້ນ, ຈົ່ງນຳເອົາບົດຮຽນໃນຊຸດຝຶກອົບຮົມຄັ້ງນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງແຕ່ລະສະຫາຍ ປະກອບສ່ວນເຂົ້າໃນການເສີມຂະຫຍາຍບົດບາດການນຳພາຂອງພັກ ທັງຮັບປະກັນໃຫ້ວຽກງານປ້ອງກັນພັກ-ພະນັກງານ ໄດ້ຮັບການຈັດຕັ້ງປະຕິບັດເປັນປົກະຕິຕໍ່ເນື່ອງ ແລະ ມີຄຸນນະພາບດີຂຶ້ນກວ່າເກົ່າ.
ວຽກງານປ້ອງກັນພັກ-ພະນັກງານເປັນວຽກງານສຳຄັນຕົ້ນຕໍໜຶ່ງໃນວຽກງານກໍ່ສ້າງພັກ-ພະນັກງານໃນແຕ່ລະໄລຍະຂອງການປະຕິວັດ ເຊິ່ງຊຸດຝຶກອົບຮົມຈະໄດ້ດຳເນີນເປັນເວລາ 5 ວັນ ຈົນເຖິງວັນທີ 13 ມັງກອນ 2023 ຈິ່ງສຳເລັດ.
