ພາບ: ອານຸລັກ, ຂ່າວ: ສ.ສົດໃສ
ວັນທີ 13 ມັງກອນ 2023 ຄະນະຈັດຕັ້ງສູນກາງພັກ ໄດ້ປິດຊຸດຝຶກອົບຮົມວຽກງານປ້ອງກັນພັກ-ພະນັກງານຊຸດທີ IV ຢູ່ທີ່ສະຖາບັນການເມືອງ ແລະ ການປົກຄອງແຫ່ງຊາດ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ທອງຈັນ ໂຂງພູມຄຳ ກຳມະການປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ, ມີຄະນະພັກ ຄະນະຈັດຕັ້ງສູນກາງພັກ, ຫົວໜ້າກົມ-ຮອງກົມ, ວິທະຍາກອນ, ມີສຳມະນາກອນທີ່ມາຈາກກະຊວງ-ອົງການ, ແຂວງ ແລະ ນະຄອນຫຼວງ ຈຳນວນ 52 ທ່ານ, ຍິງ 17 ທ່ານ ພ້ອມດ້ວຍຄະນະຮັບຜິດຊອບຝຶກອົບຮົມເຂົ້າຮ່ວມ.
ຊຸດຝຶກອົບຮົມວຽກງານປ້ອງກັນພັກ-ພະນັກງານ ຄັ້ງນີ້ ເລີ່ມແຕ່ວັນທີ 9-13 ມັງກອນ 2023 ເປັນໄລຍະເວລາ 5 ວັນ ບັນດາສໍາມະນາກອນ ໄດ້ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນ, ຕັ້ງໜ້າເອົາໃຈໃສ່ປະຕິບັດຕາມຫຼັກສູດການຮຽນ-ການສອນ, ສົນທະນາແລກປ່ຽນບົດຮຽນລະຫວ່າງວິທະຍາກອນ ແລະ ສໍາມະນາກອນ ຊຶ່ງໄດ້ເຮັດໃຫ້ການຄົ້ນຄວ້າຮໍ່າຮຽນ ກໍຄືການຝຶກອົບຮົມຄັ້ງນີ້ ໄດ້ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້.
ຕອນທ້າຍຂອງພິທີ, ທ່ານ ທອງຈັນ ໂຂງພູມຄຳ ກຳມະການປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ມອບໃບຢັ້ງຢືນໃຫ້ສຳມະນາກອນຈຳນວນ 52 ທ່ານ, ຍິງ 17 ທ່ານ ຈາກນັ້ນ ໄດ້ມີຄຳເຫັນໂອ້ລົມຕໍ່ສຳມະນາກອນ ໂດຍໄດ້ຍ້ອງຍໍຊົມເຊີຍ ແລະ ຮຽກຮ້ອງໃຫ້ສຳມະນາກອນ ຈົ່ງພ້ອມກັນນຳເອົາບົດຮຽນຄັ້ງນີ້ ໄປໝູນໃຊ້ເຂົ້າໃນວຽກງານທີ່ຕົນຮັບຜິດຊອບໃຫ້ໄດ້ຮັບຜົນດີ ປະກອບສ່ວນກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນນຳພາຂອງພັກໃນໄລຍະໃໝ່ໃຫ້ມີຄຸນນະພາບສູງຂຶ້ນກວ່າເກົ່າ.
