ໂດຍ: ແສງອາລຸນ
ໃນລະຫວ່າງວັນທີ 1-5 ມີນາ 2023 ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫົວພັນ ເພື່ອຕິດຕາມ ແລະ ຊຸກຍູ້ການກະກຽມກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຂວງ ແລະ ການນໍາພາ-ຊີ້ນຳຂອງພັກ ກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໂດຍເປັນກຽດຕ້ອນຮັບຢ່າງອົບອຸ່ນຂອງສະຫາຍ ວັນໄຊ ແພງຊຸມມາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ ພ້ອມດ້ວມພະນັກງານການນຳຂອງແຂວງ.
ໃນການເຄື່ອນໄຫວ ແລະ ເຮັດວຽກຢູ່ແຂວງຫົວພັນ ຄັ້ງນີ້, ສະຫາຍພ້ອມດ້ວຍຄະນະ ໄດ້ຮັບຟັງການລາຍງານໂດຍຫຍໍ້ຈາກສະຫາຍ ວັນໄຊ ແພງຊຸມມາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ ກ່ຽວກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX ພາຍໃນແຂວງ, ການກະກຽມກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຂວງ ແລະ ການນຳພາ-ຊີ້ນໍາຂອງພັກ ກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຂອງແຂວງ ຫົວພັນ ໂດຍໄດ້ຍົກໃຫ້ເຫັນເຖິງຜົນງານ ແລະ ຜົນສໍາເລັດໃນການຊີ້ນໍາ-ນໍາພາຈັດຕັ້ງປະຕິບັດເປັນຕົ້ນ: ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວແຂວງ ວຽກງານພັກ. ຄະນະພັກ, ຄະນະຈັດຕັ້ງແຕ່ລະເມືອງ ເອົາໃຈໃສ່ໃນການປະຕິບັດຕາມກົດລະບຽບພັກ, ຄຳສັ່ງ, ແນະນໍາຂອງສູນກາງ, ທິດທາງແຜນການ 5 ປີ ແລະ ແຜນການປະຈຳ ປີ 2022 ຂອງແຂວງຫົວພັນ, (ສຸມໃສ່ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມຄຳສັ່ງຂອງກົມການເມືອງສູນກາງພັກ ເລກທີ 01 ແລະ ຄໍາແນະນໍາຂອງຄະນະຈັດຕັ້ງສູນກາງພັກເລກທີ 291 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດພັນກັບການສະຫຼຸບ, ປະເມີນຜົນປະຈຳປີ 2022 ສາມາດປະເມີນໄດ້ໜ່ວຍພັກປອດໃສ ໄດ້ທັງໝົດມີ ຈໍານວນ 841 ໜ່ວຍພັກ, ໜ່ວຍພັກກາງມີ 5 ໜ່ວຍ, ໜ່ວຍພັກບໍ່ໄດ້ປະເມີນມີຈຳນວນ 303 ໜ່ວຍ ( ໜ່ວຍພັກບໍ່ໄດ້ປະເມີນສ່ວນຫຼາຍແມ່ນໜ່ວຍພັກຢູ່ເຂດຫ່າງໄກສອກຫຼີກ ). ການຂະຫຍາຍພັກຫຼາຍໜ່ວຍພັກ, ຮາກຖານພັກໄດ້ດຳເນີນຖືກຕ້ອງຕາມກົດລະບຽບພັກ, ຄຳສັ່ງແນະນຳຂອງກົມການເມືອງ, ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບວຽກງານການຂະຫຍາຍພັກຕິດພັນກັບການປ້ອງກັນພັກ, ໂດຍມີການຄົ້ນຄວ້າ, ເລືອກເຟັ້ນ, ຕິດຕາມປະເມີນຜົນການເຄື່ອນໄຫວຕົວຈິງຂອງບັນດາເປົ້າໝາຍຕາມຂະບວນການ, ຂັ້ນຕອນ ເຊິ່ງສະແດງອອກປີ 2022 ສາມາດຂະຫຍາຍສະມາຊິກພັກໄດ້ 906 ສະຫາຍ, ຍິງ 681 ສະຫາຍເທົ່າກັບ 4,39%(ທຽບໃສ່ແຜນການປີລື່ນຄາດໝາຍ 1,39%) ມາເຖິງປະຈຸບັນນີ້ທົ່ວແຂວງມີສະມາຊິກພັກທັງໝົດ 20.636 ສະຫາຍ ຍິງ 4.963 ສະຫາຍ. ວຽກງານກອງປະຊຸມໃຫຍ່ຂອງບັນດາໜ່ວຍພັກ, ຮາກຖານພັກ ຢູ່ອ້ອມຂ້າງແຂວງ ແລະ ບັນດາເມືອງ ໄດ້ສຳເລັດກອງປະຊຸມໃຫ່ຍຂັ້ນໜ່ວຍພັກ ຈຳນວນ 204 ໜ່ວຍພັກ, ໃນນັ້ນ ຂັ້ນແຂວງ ຈຳນວນ 2 ໜ່ວຍພັກ ແລະ ຂັ້ນເມືອງ ຈຳນວນ 202 ໜ່ວຍພັກ. ວຽກງານພະນັກງານ: ພາຍຫຼັງທີ່ສໍາເລັດການດຳເນີນກອງປະຊຸມໃຫຍ່ ຂອງແຂວງ ຄັ້ງທີ X. ຄະນະພັກ, ຄະນະນໍາແຕ່ລະຂັ້ນໄດ້ເປັນເຈົ້າການໃນການຈັດຕັ້ງປະຕິບັດຕາມມະຕິຕົກລົງ ຂອງກົມການເມືອງສູນກາງພັກເລກທີ 030, 031, 032 ແລະ ຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 292 ກ່ຽວກັບວຽກງານພະນັກງານ ເປັນຕົ້ນແມ່ນໄດ້ສໍາເລັດການສ້າງແຜນກຳນົດພະນັກງານນຳພາ-ຄຸ້ມຄອງໄລຍະ 5 ປີ 2021 - 2025 ທົ່ວແຂວງສໍາເລັດ 100% ຄັດເລືອກເຂົ້າໃນແຜນທັງໝົດ 1,402 ທ່ານ, ຍິງ 320 ທ່ານ, ຂັ້ນສູນກາງຄຸ້ມຄອງ 73 ທ່ານ, ຍິງ 12 ທ່ານ. ວຽກງານການປັບປຸງກົງຈັກການຈັດຕັ້ງໂດຍຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຫົວພັນໄດ້ແຕ່ງຕັ້ງຄະນະຮັບຜິດຊອບປັບປຸງກົງຈັກຂັ້ນແຂວງ. ສຳເລັດການປັບປຸງຄະນະໂຄສະນາອົບຮົມແຂວງ, ພະແນກກະສິກຳ, ພະແນກສາທາ, ໂຮງໝໍ, ອະນຸສອນສະຖານ, ຄະນະຈັດຕັ້ງ ແລະ ຄະນະກວດກາພັກ-ລັດແຂວງ, ສຳເລັດການຍຸບໂຮມບັນດາຂະແໜງການຕາມເລກທີ 190 ເພື່ອຫຼຸດຜ່ອນທາງດ້ານໂຄງປະກອບ, ຂະແໜງການ ແລະ ບັນດາໜ້າວຽກທີ່ມີລັກຄ້າຍຄືກັນເຂົ້າກັນມີ: ພະແນກແຜນການແລະ ການລົງທຶນ ( ໂຮມສູນສະຖິຕິມາເຂົ້າກັບພະແນກ), ພະແນກກະສິກຳແຂວງ.
ຄຽງຄູ່ກັບຜົນງານ ແລະ ຜົນສໍາເລັດໃນການຈັດຕັ້ງປະຕິບັດກໍຍັງມີບາງຂໍ້ຫຍຸ້ງຍາກ ແລະ ສິ່ງທ້າທາຍ ຈໍານວນໜຶ່ງທີ່ຈະຕ້ອງໄດ້ສືບຕໍ່ປັບປຸງ ແລະ ຈັດຕັ້ງປະຕິບັດ ການສຶກສາອົບຮົມທາງດ້ານການເມືອງ-ແນວຄິດ ເຖິງວ່າໄດ້ເຮັດດ້ວຍຫຼາຍຮູບ, ຫຼາຍວິທີແຕ່ການຫັນປ່ຽນຕົວຈິງຍັງມີໜ້ອຍເຫັນໄດ້ທາງດ້ານແນວຄິດຂອງຖັນແຖວພະນັກງານ-ສະມາຊິກພັກ, ປະກົດການຫຍໍ້ທໍ້ຍັງເກີດຂຶ້ນຢູ່ໃນພະນັກງານຂັ້ນນຳພາ-ຄຸ້ມຄອງ, ສະມາຊິກພັກ ແລະ ພະນັກ ງານຈຳນວນໜຶ່ງ ເຊື່ອມຖອຍທາງດ້ານຄຸນສົມບັດ, ຂາດຄວາມເປັນແບບຢ່າງໃນການປະຕິບັດກົດໝາຍ, ກົດລະບຽບພັກ, ຄວາມຮັບຜິດຊອບຕໍ່ໜ້າທີ່ວຽກງານບໍ່ສູງ.
ໃນໂອກາດທີ່ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້, ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ກໍໄດ້ມີຄໍາເຫັນກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງໃນບາງບັນຫາຄື: ຄະນະພັກທຸກຂັ້ນຕ້ອງເພີ່ມທະວີການນໍາພາການເມືອງ-ແນວຄິດ ໃຫ້ຫຼາຍຂຶ້ນກວ່າເກົ່າ, ສ້າງເງື່ອນໄຂໃຫ້ຖັນແຖວພະນັກງານນຳພາ, ພະນັກງານຫຼັກແຫຼ່ງແຕ່ລະຂັ້ນ ໄດ້ຮັບການປະກອບຄວາມຮູ້ລັດທິມາກ-ເລນິນ, ແນວຄິດ ປະທານ ໄກສອນ ພົມວິຫານ ແລະ ມູນເຊື້ອອັນດີງາມຂອງພັກ, ຂອງຊາດ, ສ້າງຄວາມເຊື່ອໝັ້ນຕໍ່ການນໍາພາຂອງພັກໃນແຕ່ລະໄລຍະເພື່ອສ້າງໃຫ້ພະນັກງານນໍາພາ, ຫຼັກແຫຼ່ງ ຂອງພັກ-ລັດ ມີຄວາມເປັນເອກະພາບສູງ ດ້ານແນວຄິດ ແລະ ການກະທຳ. ພ້ອມກັນນັ້ນ ພະນັກງານນໍາພາ, ຫຼັກແຫຼ່ງ ຍັງຕ້ອງຍົກສູງຄວາມຮັບຜິດຊອບທາງດ້ານການເມືອງ, ຄວາມເປັນແບບຢ່າງນໍາໜ້າ ໃນການຄົ້ນຄວ້າ, ສ້າງ ແລະ ປັບປຸງນິຕິກໍາ ທີ່ກ່ຽວຂ້ອງກັບວຽກງານກໍ່ສ້າງພັກ ໃຫ້ຖືກຕ້ອງ, ຮັບປະກັນ ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ; ຄະນະພັກ ຕ້ອງຍົກສູງຄວາມຮັບຜິດຊອບຕໍ່ການເຄື່ອນໄຫວຂອງຕົນ ໄປຕາມສິດ ແລະ ໜ້າທີ່ ຊຶ່ງໄດ້ກໍານົດໃນກົດລະບຽບຂອງພັກ ສະໄໝທີ XI, ເອົາໃຈໃສ່ກໍ່ສ້າງ ແລະ ປັບປຸງຕົນເອງຕາມ 05 ຫຼັກການ ແລະ 03 ທິດນໍາ ຂອງພັກ, ໂດຍສະເພາະ ຖືເອົາການຕິຊົມຕົນເອງ, ຕິຊົມກັນ ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງຄະນະພັກທຸກຂັ້ນ; ເພີ່ມທະວີຄວາມຮັບຜິດຊອບ ເພື່ອຊີ້ນໍາ-ນໍາພາ ບັນດາຮາກຖານພັກ ໃນການກໍ່ສ້າງໜ່ວຍພັກ, ສະມາຊິກພັກໃຫ້ ປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ, ແນວຄິດ, ການຈັດຕັ້ງ, ແບບແຜນນໍາພາຂອງໜ່ວຍພັກ; ຂອງສະມາຊິກພັກ, ພ້ອມທັງແກ້ໄຂຈຸດອ່ອນ ແລະ ຂໍ້ຄົງຄ້າງຂອງແຕ່ລະເປົ້າໝາຍຢ່າງທັນການ ແລະ ເດັດຂາດ.
ຈາກນັ້ນ, ໄດ້ເດີນທາງໄປເມືອງພົບປະ ແລະ ເຮັດວຽກກັບຄະນະປະຈໍາພັກເມືອງວຽງໄຊ, ກໍາມະການພັກເມືອງ.ຄະນະຫ້ອງການ-ອົງການຂອງເມືອງ, ຄະນະນໍາຂອງອົງການແນວລາວສ້າງຊາດ, ສະຫະພັນນັກຮົບເກົ່າ ແລະອົງການຈັດຕັ້ງມະຫາຊົນຂອງເມືອງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ວຽງໄຊ, ພະນັກງານທັງໝົດຂອງຄະນະຈັດຕັ້ງເມືອງ ແລະ ໄດ້ໄປຢ້ຽມຊົມອະນຸສອນສະຖານຖໍ້າງູ ສໍານັກງານຫ້ອງການຄະນະຈັດຕັ້ງສູນກາງພັກ ແຫ່ງທໍາອິດ ພ້ອມທັງປຸກຕົ້ນໄມ້ເປັນທີ່ລະນຶກ.
