ພາບ ແລະ ຂ່າວໂດຍ: ສ.ສົດໃສ
ໃນວັນທີ 17 ມີນາ 2023 ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ລົງເຄື່ອນໄຫວພົບປະ ແລະ ເຮັດວຽກຢູ່ແຂວງຈຳປາສັກ ໂດຍການຕ້ອນຮັບຂອງສະຫາຍ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ພ້ອມດ້ວຍຄະນະ.
ໃນໂອກາດນີ້, ສະຫາຍ ວິໄລວົງ ບຸດດາຄຳ ໄດ້ລາຍງານໂດຍສັງເຂບ ກ່ຽວກັບການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ, ການດຳເນີນກອງປະຊຸມກາງສະໄໝຂອງ 12 ອົງຄະນະພັກເມືອງ ແລະ ການນຳພາ-ຊີ້ນຳວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໄດ້ສຳເລັດການສ້າງແຜນກຳນົດພະນັກງານນຳພາ-ຄຸ້ມຄອງໃນທົ່ວແຂວງ ໄປພ້ອມກັບການສັບຊ້ອນ, ຈັດວາງພະນັກງານທີ່ຢູ່ໃນແຜນກຳນົດຂັ້ນເມືອງ-ນະຄອນຄຸ້ມຄອງ; ສຳເລັດການປັບປຸງກົງຈັກການຈັດຕັ້ງ ພະແນກການ, ກົມກອງອ້ອມຂ້າງແຂວງ ແລະ ເມືອງ, ປັບປຸງຂະແໜງການທີ່ຂຶ້ນກັບພະແນກ 191 ຂະແໜງ ເປັນ 151 ຂະແໜງ ແລະ 4 ໜ່ວຍງານ ສຳເລັດຕາມແຜນ; ຢູ່ຂັ້ນເມືອງ ສຳເລັດການປັບປຸງບັນດາໜ່ວຍງານ ທີ່ຂຶ້ນກັບຫ້ອງການຂອງເມືອງ, ນະຄອນ ພ້ອມນັ້ນ ກໍໄດ້ຈັດວາງສັບຊ້ອນບຸກຄະລາກອນເຂົ້າໃສ່ຕຳແໜ່ງງານຕ່າງໆ ຕາມທິດກະທັດຮັດ ສົມເຫດສົມຜົນ.
ຈາກນັ້ນ, ສະຫາຍ ນາງ ສີໃສ ລືເດດມູນສອນ ໄດ້ມີບາງຄຳເຫັນໂອ້ລົມຕໍ່ຄະນະພັກ, ຄະນະນຳຂອງແຂວງຈຳປາສັກ ໂດຍສະເພາະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ມີຜົນສຳເລັດຫຼາຍດ້ານ ແຕ່ກໍບໍ່ສາມາດຫຼີກລ້ຽງໄດ້ຈຸດອ່ອນ, ຂໍ້ບົກຜ່ອງ ໃນການປະຕິບັດວຽກງານໃນໄລຍະຜ່ານມາ ແລະ ເພື່ອຮັບປະກັນ ເປັນເອກະພາບຕໍ່ທິດທາງວຽກງານໃນຕໍ່ໜ້າ ໂດຍສະເພາະ ວຽກງານການກະກຽມດຳເນີນກອງປະຊຸມຄົບຄະນະກາງສະໄໝຂອງອົງຄະນະພັກແຂວງ, ກະກຽມຊີ້ນຳ-ນຳພາການດຳເນີນກອງປະຊຸມ 03 ຂັ້ນ ແລະ ບັນຫາອື່ນໆ. ເຊິ່ງສະຫາຍ ໄດ້ເນັ້ນໃຫ້ຄະນະພັກ, ຄະນະນຳທຸກຂັ້ນພາຍໃນແຂວງຈຳປາສັກ ຕ້ອງເອົາໃຈໃສ່ວຽກງານກໍ່ສ້າງພັກ-ພະນັກງານ ໂດຍສະເພາະ ຕ້ອງເພີ່ມທະວີການນຳພາການເມືອງ-ແນວຄິດໃຫ້ຫຼາຍຂຶ້ນ, ສ້າງເງື່ອນໄຂໃຫ້ຖັນແຖວພະນັກງານນຳພາ, ພະນັກງານຫຼັກແຫຼ່ງແຕ່ລະຂັ້ນ ໄດ້ຮັບການປະກອບຄວາມຮູ້ລັດທິມາກ-ເລນິນ, ແນວຄິດປະທານ ໄກສອນ ພົມວິຫານ ແລະ ມູນເຊື້ອອັນດີງາມຂອງພັກ, ຂອງຊາດ, ສ້າງຄວາມເຊື່ອໝັ້ນຕໍ່ການນຳພາຂອງພັກໃນແຕ່ລະໄລຍະ ເພື່ອສ້າງໃຫ້ພະນັກງານນຳພາ, ຫຼັກແຫຼ່ງຂອງພັກ-ລັດ ມີຄວາມເປັນເອກະພາບສູງ ດ້ານແນວຄິດ ແລະ ການກະທຳ. ພ້ອມກັນນັ້ນ, ພະນັກງານນຳພາ, ຫຼັກແຫຼ່ງ ຍັງຕ້ອງຍົກສູງຄວາມຮັບຜິດຊອບທາງດ້ານການເມືອງ, ຄວາມເປັນແບບຢ່າງນຳໜ້າໃນການຄົ້ນຄວ້າ, ສ້າງ ແລະ ປັບປຸງນິຕິກຳທີ່ກ່ຽວຂ້ອງກັບວຽກງານສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ. ຕ້ອງປະຕິບັດລະບອບຄຸ້ມຄອງພະນັກງານຢ່າງເຂັ້ມງວດ, ເປັນລະບົບຕໍ່ເນື່ອງ ນັບແຕ່ການເກັບກຳບັນຊີ, ສະຖິຕິ, ປະຫວັດຕົ້ນກຳເນີດ, ປະຫວັດການເຄື່ອນໄຫວ ແລະ ການປ່ຽນແປງຂອງສະມາຊິກພັກ-ພະນັກງານ ແລະ ລັດຖະກອນ, ສ້າງກົນໄກກວດກາ, ຄວບຄຸມການໃຊ້ສິດອຳນາດ ໃນການປະຕິບັດໜ້າທີ່ຂອງພະນັກງານນຳພາ-ຄຸ້ມຄອງແຕ່ລະຂັ້ນຢ່າງມີປະສິດທິຜົນ. ສຳລັບການກະກຽມກອງປະຊຸມຄົບຄະນະກາງສະໄໝ ໃຫ້ຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ເລກທີ 268/ຄລສພ, ລົງວັນທີ 20 ມັງກອນ 2023 ແລະ ຄໍາແນະນໍາ ຂອງຄະນະຈັດຕັ້ງສູນກາງພັກ ວ່າດ້ວຍການຈັດຕັ້ງປະຕິບັດຄໍາສັ່ງດັ່ງກ່າວ ເລກທີ 25/ຄຈສພ, ລົງວັນທີ 24 ມັງກອນ 2023 ເພື່ອຮັບປະກັນການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງຈໍາປາສັກຮັບປະກັນຄຸນນະພາບ ແລະ ມີປະສິດທິຜົນ.
ໃນການເຄື່ອນໄຫວພົບປະ ແລະ ເຮັດວຽກຄັ້ງນີ້ ສະຫາຍ ນາງ ສີໃສ ລືເດດມູນສອນ ພ້ອມດ້ວຍຄະນະ ຍັງໄດ້ພົບປະ ແລະ ເຮັດວຽກຢູ່ເມືອງໂພນທອງ ແຂວງຈຳປາສັກ ໂດຍການຕ້ອນຮັບຂອງສະຫາຍ ສຸພາບ ທຳມະຮັກສາ ກຳມະການພັກແຂວງ, ເລຂາພັກເມືອງ, ເຈົ້າເມືອງໂພນທອງ, ມີຮອງເລຂາພັກເມືອງ, ຄະນະປະຈຳພັກເມືອງ, ພະນັກງານຫຼັກແຫຼ່ງ ແລະ ເລຂາຄະນະພັກຮາກຖານ ຕະຫຼອດຮອດນາຍບ້ານ 70 ກວ່າບ້ານພາຍໃນເມືອງ ເຂົ້າຮ່ວມຢ່າງພ້ອມພຽງ.
