ພາບ: ພິດສະໄໝ, ແສງຄຳ; ຂ່າວໂດຍ: ສ. ສົດໃສ
ໃນວັນທີ 23 ມີນາ 2023 ຢູ່ທີ່ສະໂມສອນຄະນະຈັດຕັ້ງສູນກາງພັກ ໄດ້ຈັດກອງປະຊຸມເຜີຍແຜ່, ເຊື່ອມຊຶມເອກະສານສຳຄັນຂອງພັກ ຂອງຊາດຈຳນວນໜຶ່ງ ໃຫ້ກຽດເຜີຍແຜ່ໂດຍສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ທອງຈັນ ໂຂງພູມຄຳ ກຳມະການປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ, ມີຄະນະພັກ, ຄະນະກົມ, ຄະນະພະແນກ ແລະ ພະນັກງານ-ລັດຖະກອນ ທົ່ວສຳນັກງານຄະນະຈັດຕັ້ງສູນກາງພັກເຂົ້າຮ່ວມຈຳນວນ 168 ສະຫາຍ, ຍິງ 70 ສະຫາຍ.
ກອງປະຊຸມໃນພາກເຊົ້າ ສະຫາຍ ນາງ ບຸດສະດີ ທະນະເມືອງ ໄດ້ຂຶ້ນເຜີຍແຜ່ເອກະສານກ່ຽວກັບການຈັດຕັ້ງຜັນຂະຫຍາຍຜົນສຳເລັດການຢ້ຽມຢາມທາງລັດຖະກິດຢູ່ ສປ ຈີນ ຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ. ຕໍ່ຈາກນັ້ນ, ສະຫາຍ ວຽນທອງ ສິງຄຳພັນ ຄະນະພັກ ຫົວໜ້າກົມຈັດຕັ້ງພະນັກງານ ຂຶ້ນຜ່ານດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງອົງການກາແດງແຫ່ງຊາດລາວ.
ໃນຕອນບ່າຍຂອງວັນດຽວກັນ ສະຫາຍ ທອງຈັນ ໂຂງພູມຄຳ ໄດ້ໃຫ້ກຽດຂຶ້ນປາຖະກະຖາ ເລົ່າມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 68 ປີ (22/3/1955 - 22/3/2023) ແລະ ວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 68 ປີ (25/3/1955 - 25/3/2023) ເຊິ່ງໄດ້ຍົກໃຫ້ເຫັນມູນເຊື້ອການກຳເນີດຂອງພັກປະຊາຊົນ ປະຕິວັດລາວ ການເຄື່ອນໄຫວຕໍ່ສູ້ກູ້ຊາດຂອງບັນພະບູລຸດ ແລະ ປະຊາຊົນລາວບັນດາເຜົ່າ ພາຍໃຕ້ການນຳພາອັນສະຫຼາດສ່ອງໃສຂອງພັກ ປະຊາຊົນ ປະຕິວັດລາວ ຕະຫຼອດໄລຍະຜ່ານມາ ແລະ ຍົກໃຫ້ເຫັນຄວາມເປັນມາ, ວິລະກຳອັນລໍ້າເລີດ, ຜົນສຳເລັດອັນໃຫຍ່ຫຼວງ, ມີບົດຮຽນອັນລໍ້າຄ່າ, ລະອິດລະອ້ຽວ ເຕັມໄປດ້ວຍບົດທົດສອບ ແລະ ສິ່ງທ້າທາຍນາໆປະການ ໃນແຕ່ລະໄລຍະ ຂອງວິວັດທະນາການເຕີບໃຫຍ່ຂະຫຍາຍຕົວຂອງຄະນະຈັດຕັ້ງສູນກາງພັກ ກໍ່ຄືການປະຕິບັດບົດບາດການເປັນເສນາທິການໃຫ້ແກ່ກົມການເມືອງສູນກາງພັກໃນວຽກງານຈັດຕັ້ງ, ກໍ່ສ້າງພັກ-ພະນັກງານ.
ບັນດາເນື້ອໃນເອກະສານສຳຄັນທີ່ນຳມາເຜີຍແຜ່ໃນຄັ້ງນີ້ ແມ່ນເປັນບ່ອນອີງ, ເປັນທິດທາງ, ເປັນບົດຮຽນອັນລໍ້າຄ່າ, ເປັນມູນເຊື້ອອັນດີງາມໃຫ້ແກ່ພະນັກງານ-ສະມາຊິກພັກທົ່ວຄະນະຈັດຕັ້ງສູນກາງພັກ ເພື່ອພ້ອມກັນສືບຕໍ່ຈັດຕັ້ງຜັນຂະຫຍາຍ, ຮໍ່າຮຽນເອົາແບບຢ່າງອັນດີງາມ ແລະ ຈັດຕັ້ງປະຕິບັດເຂົ້າໃນວຽກງານ, ການເຄື່ອນໄຫວຕົວຈິງໃຫ້ມີປະສິດທິພາບ ແລະ ມີປະສິດທິຜົນ.
