ພາບ: ວິລະສະໄໝ; ໂດຍ: ສ. ສົດໃສ
ໃນວັນທີ 10 ເມສາ 2023 ຢູ່ທີ່ສະໂມສອນໃຫຍ່ຄະນະຈັດຕັ້ງສູນກາງພັກ ໄດ້ຈັດພິທີສະຫຼຸບວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ທິດທາງແຜນການ ປີ 2023 ໂດຍການເປັນປະທານ ຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະປະຈຳພັກ, ບັນດາກຳມະການພັກ, ເລຂາ-ຮອງເລຂາໜ່ວຍພັກ, ບັນດາສະມາຊິກພັກສົມບູນ-ສຳຮອງ ພາຍໃນຄະນະຈັດຕັ້ງສູນກາງພັກເຂົ້າຮ່ວມທັງໝົດ ຈຳນວນ 120 ສະຫາຍ, ຍິງ 47 ສະຫາຍ.
ພິທີດັ່ງກ່າວ ຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023 ເຊິ່ງໄລຍະ 1 ປີຜ່ານມາ ບັນດາໜ່ວຍພັກທີ່ຂຶ້ນກັບອົງຄະນະພັກຄະນະຈັດຕັ້ງສູນກາງພັກ ຈຳນວນ 8 ໜ່ວຍພັກ ໄດ້ ເປັນເຈົ້າການຈັດຕັ້ງຜັນຂະຫຍາຍແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2022 ໂດຍການຫັນເປັນແຜນງານ, ໂຄງການໃນການຈັດຕັ້ງປະຕິບັດໜ້າທີ່ການເມືອງຂອງບັນດາໜ່ວຍພັກເປັນແຕ່ລະເດືອນ ແລະ ພ້ອມກັນຈັດຕັ້ງປະຕິບັດດ້ວຍຄວາມຮັບຜິດຊອບສູງ ໃນການຕີລາຄາປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ສ້າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີ 2023 ຂອງໜ່ວຍພັກຕົນ ໂດຍສອດຄ່ອງກັບລະບຽບ, ຫຼັກການ, ບາດກ້າວ, ຂັ້ນຕອນ, ວິທີການທີ່ກຳນົດໄວ້. ຖືສຳຄັນໃນການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 30 ມັງກອນ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 291/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງເຂັ້ມງວດ ແລະ ເປັນເອກະພາບກັນໃນທົ່ວອົງຄະນະພັກ ຄະນະຈັດຕັ້ງສູນກາງພັກ.
ຜ່ານການຕີລາຄາປະເມີນ ຕາມ 5 ເນື້ອໃນຂອງການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກ ແໜ້ນ ປະຈຳປີ 2022 ຮັບຮອງເອົາ 04 ໜ່ວຍພັກຄື: ໜ່ວຍພັກຫ້ອງການ, ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກກົມກົງຈັກການຈັດຕັ້ງ ແລະ ກົດລະບຽບພັກ, ໜ່ວຍພັກກົມຄຸ້ມຄອງພະນັກງານເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ເທົ່າກັບ 50% ຂອງຈຳນວນໜ່ວຍພັກ, ໜ່ວຍພັກແຂງ 03 ໜ່ວຍພັກຄື: ໜ່ວຍພັກກົມໂຄສະນາກໍ່ສ້າງພັກ-ພະນັກງານ, ໜ່ວຍພັກກົມກໍ່ສ້າງພະ ນັກງານ ແລະ ໜ່ວຍພັກກົມກໍ່ສ້າງພັກ ເທົ່າກັບ 37.5% ແລະ 1 ໜ່ວຍພັກແມ່ນບໍ່ໄດ້ຈັດແບ່ງປະເພດ ( ໜ່ວຍພັກສູນພັດທະນາວຽກງານຈັດຕັ້ງ ຊຶ່ງຖືກສ້າງຕັ້ງຂຶ້ນໃໝ່). ສະມາຊິກພັກທີ່ໄດ້ປະເມີນຕີລາຄາຈັດປະເພດ ມີທັງໝົດ 125 ສະຫາຍ, ຍິງ 53 ສະຫາຍ ເທົ່າກັບ 70%, ມີສະມາຊິກພັກແຂງ 105 ສະຫາຍ, ຍິງ 42 ສະຫາຍ ເທົ່າກັບ 84%, ກາງ 20 ສະຫາຍ, ຍິງ 11 ສະຫາຍ ເທົ່າກັບ 16% ຂອງຈຳນວນສະມາຊິກພັກ ແລະ ບໍ່ໄດ້ປະເມີນ 55 ສະຫາຍ, ຍິງ 18 ສະຫາຍ ເທົ່າກັບ 30% (ສະມາຊິກພັກບຳນານ ແລະ ສຳຮອງ). ໃນພີທີໄດ້ມອບ-ຮັບໃບຢັ້ງຢືນ ແລະ ໃບຍ້ອງຍໍໃຫ້ແກ່ບັນດາໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ຈຳນວນ 4 ໜ່ວຍພັກ ແລະ ໄດ້ມອບ-ຮັບໃບຊົມເຊີຍໃຫ້ແກ່ບັນດາໜ່ວຍພັກທີ່ໄດ້ຮັບຮອງເປັນໜ່ວຍພັກແຂງ ຈຳນວນ 3 ໜ່ວຍພັກ.
ຕອນທ້າຍຂອງພິທີສະຫາຍ ນາງ ສີໃສ ລືເດດມູນສອນ ໄດ້ມີຄຳເຫັນໂອ້ລົມ ແລະ ຢັ້ງຢືນຄືນເຖິງຜົນສຳເລັດຂອງການນຳພາຂອງຄະນະປະຈຳພັກ, ບັນດາກຳມະການພັກ, ຄະນະໜ່ວຍພັກ ພາຍໃນອົງຄະນະພັກ ຄະນະຈັດຕັ້ງສູນກາງພັກ ເຊິ່ງສະຫາຍໄດ້ຍ້ອງຍໍຊົມເຊີຍຜົນສຳເລັດການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ມີທິດຊີ້ນຳເພີ່ມທະວີຄວາມຮັບຜິດຊອບຂອງຄະນະຊີ້ນຳ, ຄວາມເປັນເຈົ້າການໃນການຕິດຕາມ, ກວດກາ, ຊຸກຍູ້ຢ່າງຕໍ່ເນື່ອງ, ສືບຕໍ່ແຕ່ງຕັ້ງຄະນະຮັບຜິດຊອບກວດກາການປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2023 ເພື່ອສ້າງແຜນການເຄື່ອນໄຫວຊຸກຍູ້, ຕິດຕາມໃນການຈັດຕັ້ງປະຕິບັດວຽກງານດັ່ງກ່າວໃຫ້ມີບາດກ້າວໃໝ່ ພ້ອມທັງຮຽກຮ້ອງໃຫ້ບັນດາໜ່ວຍພັກ ຈົ່ງສືບຕໍ່ເສີມຂະຫຍາຍຜົນງານດ້ານຕັ້ງໜ້າ ແລະ ປັບປຸງບັນຫາໃດທີ່ຍັງບໍ່ທັນໄດ້ຕາມມາດຕະຖານ-ເງື່ອນໄຂ ໃຫ້ພ້ອມກັນຄົ້ນຄວ້າສູ້ຊົນແກ້ໄຂໃຫ້ເໝາະສົມ ແລະ ກາຍເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ໃນປີ 2023.
