ຄະນະຈັດຕັ້ງສູນກາງພັກ ຈັດກອງປະຊຸມ ສ່ອງແສງວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ກະຊວງ-ອົງການ ປະຈຳໄຕມາດ III ປີ 2023
ຈຳນວນຜູ້ອ່ານ: 231
ອະນຸມັດວັນທີ:
04/10/2023
ພາບ: ແສງຄຳ; ຂ່າວໂດຍ: ສ.ສົດໃສ
ໃນວັນທີ 2 ຕຸລາ 2023 ຄະນະຈັດຕັ້ງສູນກາງພັກ ຈັດກອງປະຊຸມສ່ອງແສງວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງກະຊວງ-ອົງການ ປະຈຳໄຕມາດ III ປີ 2023 ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍ ຫົວໜ້າກົມຈັດຕັ້ງ-ພະນັກງານ ກະຊວງ-ອົງການ, ມີຄະນະກົມ, ຫ້ອງການ, ສູນພັດທະນາວຽກງານຈັດຕັ້ງ ທີ່ຂຶ້ນກັບຄະນະຈັດຕັ້ງສູນກາງພັກ ເຂົ້າຮ່ວມລວມທັງໝົດ 49 ສະຫາຍ, ຍິງ 15 ສະຫາຍ.
ກອງປະຊຸມໃນຄັ້ງນີ້ ຄະນະຈັດຕັ້ງສູນກາງພັກ ໄດ້ແນະນຳການຈັດຕັ້ງເຊື່ອມຊຶມນິຕິກຳ ກ່ຽວກັບກອງປະຊຸມ 3 ຂັ້ນຂອງພັກ, ການປະກອບເອກະສານການຍົກຍ້າຍ, ແຕ່ງຕັ້ງ, ເລື່ອນຊັ້ນ, ເລື່ອນຕຳແໜ່ງຂອງພະນັກງານຂັ້ນສູນກາງຄຸ້ມຄອງ ແລະ ທຽບລະດັບທິດສະດີ. ຕໍ່ຈາກນັ້ນ, ປະທານກອງປະຊຸມ ໄດ້ມີຄຳຖາມເຈາະຈິ້ມຈຳນວນໜຶ່ງ ແລະ ບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳເຫັນຢ່າງເລິກເຊິ່ງ ແລະ ກົງໄປກົງມາຕາມການເຈາະຈິ້ມຂອງປະທານ.
ຕອນທ້າຍຂອງກອງປະຊຸມ ສະຫາຍ ນາງ ສີໃສ ລືເດດມູນສອນ ປະທານກອງປະຊຸມ ໄດ້ມີຄຳເຫັນເນັ້ນຕື່ມບາງບັນຫາດັ່ງນີ້:
- ໃຫ້ສືບຕໍ່ເປັນເສນາທິການຊ່ວຍຄະນະພັກ ໃນການຈັດຕັ້ງການເຜີຍແຜ່, ເຊື່ອມຊຶມ ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 411, ຄຳແນະນຳ ຂອງຄະນະຈັດຕັ້ງສູນກາງພັກ ເລກທີ 211 ກ່ຽວກັບການກະກຽມ ແລະ ດຳເນີນກອງປະຊຸມ 3 ຂັ້ນຂອງພັກ, ຂໍ້ກຳນົດ ຂອງຄະນະເລຂາທິການສູນກາງພັກ ສະບັບເລກທີ 416/ຄລສພ, ລົງວັນທີ 25/8/2023 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະພັກຮາກຖານກຸ່ມບ້ານ ຫຼື ບ້ານໃຫຍ່ ແລະ ນິຕິກຳອື່ນໆ ໃຫ້ທົ່ວເຖິງ ແລະ ເລິກເຊິ່ງ ໃຫ້ແທດເໝາະ ແລະ ແກ້ໄຂ, ຕ້ານປະກົດການຫຍໍ້ທໍ້ ທີ່ເກີດຂຶ້ນໃນຖັນແຖວພະນັກງານ-ລັດຖະກອນ ແລະ ສະມາຊິກພັກ ໃນສະພາບການທີ່ມີຜົນກະທົບທາງດ້ານເສດຖະກິດແບບນີ້, ພວກເຮົາຍິ່ງຕ້ອງເພີ່ມທະວີ ໃນການເຮັດວຽກງານການເມືອງ-ແນວຄິດ ພາຍໃນອົງຄະນະພັກ ກະຊວງ-ອົງການ ຂອງຕົນ ໃຫ້ພະນັກງານ-ລັດຖະກອນ, ສະມາຊິກພັກ ມີແນວຄິດອຸ່ນອ່ຽນ, ທຸ່ນທ່ຽງ ສືບຕໍ່ເປັນຫຼັກແຫຼ່ງແກ່ນສານ ໃຫ້ແກ່ຄະນະພັກ, ຄະນະນຳ ໃນການປະຕິບັດໜ້າທີ່ການເມືອງ ແລະ ວຽກງານວິຊາສະເພາະ ໃຫ້ສຳເລັດຕາມແຜນການ.
- ວຽກງານກໍ່ສ້າງພັກ ເອົາໃຈໃສ່ປັບປຸງກໍ່ສ້າງພັກຮອບດ້ານ ຕິດພັນກັບການປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ສ້າງແຜນດຳເນີນລະອຽດໃນການຈັດຕັ້ງປະຕິບັດຕົວຈິງ, ມີການແຕ່ງຕັ້ງຄະນະຮັບຜິດຊອບຕິດຕາມ, ຊຸກຍູ້ ໃຫ້ມີການດຳເນີນຢ່າງເປັນຂະບວນ ແລະ ຕາມນິຕິກຳກຳນົດໄວ້, ທີ່ສຳຄັນແມ່ນຕ້ອງຖືເອົາຄຸນນະພາບເປັນກົກ, ພ້ອມດຽວກັນ ກໍ່ເອົາໃຈໃສ່ຊຸກຍູ້ ໃຫ້ບັນດາໜ່ວຍພັກ ໄດ້ດຳເນີນຊີວິດການເມືອງເປັນປົກກະຕິ ຮັບປະກັນ 3 ລັກສະນະ ຂອງການຮ່ວມຊີວິດພັກ ໃນນີ້ ໃຫ້ເອົາໃຈໃສ່ຫຼັກການຕຳນິສົ່ງຂ່າວເຊິ່ງກັນ ແລະ ກັນ ເພື່ອເປັນການກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເພື່ອເປັນການຮັບປະກັນການຄົງຕົວ ແລະ ຂະຫຍາຍຕົວຂອງພັກ, ການຂະຫຍາຍພັກ ກໍຮັບປະກັນດ້ານຄຸນນະພາບເປັນຫຼັກ, ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ຕ້ອງມີການກະກຽມແຕ່ຫົວທີ, ກະກຽມດຳເນີນກອງປະຊຸມໃຫຍ່ຂອງພັກ ຕ້ອງຖືເອົາຂະບວນການດັ່ງກ່າວນີ້ ເປັນບັ້ນປັບປຸງປົວແປງພັກເຮົາຢ່າງແຂງແຮງ. ຕົ້ນຕໍແມ່ນກະກຽມ 3 ດ້ານຄື: ດ້ານຂະບວນການ, ດ້ານເນື້ອໃນ ແລະ ດ້ານບຸກຄະລາກອນ.
- ວຽກງານພະນັກງານ ເອົາໃຈໃສ່ກຳແໜ້ນຖັນແຖວພະນັກງານ ແລະ ບຸກຄົນພະນັກງານ ປະຕິບັດທຸກຂອດວຽກງານພະນັກງານ ຕາມມະຕິ 04 ຂອງຄະນະບໍລິຫານງານສູນກາງພັກ ວ່າດ້ວຍເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ; ພ້ອມທັງໃຫ້ເອົາໃຈໃສ່ແກ້ໄຂຂອດພະນັກງານເຫຼືອບໍ່ພໍ, ສຸມໃສ່ສ້າງພະນັກງານສືບທອດປ່ຽນແທນ ຢ່າງຕໍ່ເນື່ອງ ແລະ ເປັນລະບົບ ຕາມແຜນກຳນົດພະນັກງານ ໃນນີ້ຮັບປະກັນໃຫ້ມີຄວາມຊ່ຽວຊານທາງດ້ານວິຊາການ, ມີລະດັບທິດສະດີການເມືອງ.
- ກະກຽມສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈຳປີ 2023 ແລະ ວາງທິດທາງຕໍ່ໜ້າ ສົ່ງໃຫ້ຄະນະຈັດຕັ້ງສູນກາງພັກ.
