ຂ່າວ: ລັດດາວັນ

ພາບ: ບານ

     ໃນວັນທີ 05-06 ທັນວາ 2023 ຄະນະຈັດຕັ້ງສູນກາງພັກ (ຄຈສພ) ໄດ້ຈັດກອງປະຊຸມ 2 ວາລະ ກ່ຽວກັບວຽກງານບໍລິຫານ-ການເງິນ ແລະ ບຸກຄະລາກອນພາຍໃນສຳນັກງານຂອງຕົນ, ຈັດຕັ້ງເຜີຍແຜ່, ເຊື່ອມຊຶມມະຕິກອງປະຊຸມຄົບຄະນະບໍລິຫານງານພັກ ຄັ້ງທີ 7 ສະໄໝທີ XI,  ປາຖະກະຖາວັນສ້າງຕັ້ງກອງທັບ ຄົບຮອບ 75 ປີ, ວັນຊາດທີ 2 ທັນວາ ຄົບຮອບ 48 ປີ,  ວັນເກີດປະທານ ໄກສອນ ພົມວິຫານ ຄົບຮອບ 103 ປີ ແລະ ປະທານ ຄຳໄຕ ສີພັນດອນ ຄົບຮອບ 100 ປີ ໂດຍການເປັນປະທານຂອງສະຫາຍ ນ. ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະພັກ ຄະນະຈັດຕັ້ງສູນກາງພັກ, ບັນດາຮອງຫົວໜ້າຄະນະຈັດຕັ້ງສູນກາງພັກ,  ຫົວໜ້າກົມ, ຮອງຫົວໜ້າກົມ ແລະ ພະນັກງານ-ລັດຖະກອນທົ່ວສຳນັກງານຄະນະຈັດຕັ້ງສູນກາງພັກ ເຂົ້າຮ່ວມ 154 ສະຫາຍ, ຍິງ 41 ສະຫາຍ.

     ກອງປະຊຸມໄດ້ດຳເນີນເປັນເວລາ 2 ວັນ ເຊິ່ງມື້ທຳອິດໄດ້ສະຫລຸບວຽກງານບໍລິຫານ-ການເງິນ ແລະ ວຽກງານບຸກຄະລາກອນໃນໄລຍະ 1  ປີຜ່ານມາ ໂດຍໄດ້ຍົກໃຫ້ເຫັນຜົນສຳເລັດທີ່ຕັ້ງໜ້າ, ຂໍ້ຄົງຄ້າງທີ່ຈະຕ້ອງແກ້ໄຂ ແລະ ທິດທາງແຜນການໃນຕໍ່ໜ້າ. ກອງປະຊຸມ ໄດ້ພ້ອມກັນແລກປ່ຽນຄຳຄິດຄຳເຫັນຢ່າງກົງໄປກົງມາ ມີທັງການຕັ້ງຄຳຖາມ ແລະ ຂໍ້ສະເໜີທີ່ໜ້າສົນໃຈຕໍ່ວຽກງານດັ່ງກ່າວ. ຈາກນັ້ນ, ປະທານກອງປະຊຸມ ໄດ້ມີຄຳເຫັນສະຫລຸບສັງລວມບັນຫາ ແລະ ມີທິດຊີ້ນຳ ຕໍ່ກອງປະຊຸມເພື່ອນຳເອົາບັນຫາທີ່ໄດ້ເອກະພາບກັນແລ້ວໄປຈັດຕັ້ງຜັນຂະຫຍາຍ ແລະ ບັນຫາທີ່ຍັງບໍ່ທັນໄດ້ເອກະພາບກັນກໍ່ຈະໄດ້ສືບຕໍ່ຄົ້ນຄວ້າພິຈາລະນາໃນຂັ້ນຕໍ່ໄປ.

     ມື້ທີ 2 ຂອງກອງປະຊຸມ ໄດ້ຈັດຕັ້ງເຜີຍແຜ່, ເຊື່ອມຊຶມມະຕິກອງປະຊຸມຄົບຄະນະບໍລິຫານງານພັກ ຄັ້ງທີ 7 ສະໄໝທີ XI,  ປາຖະກະຖາວັນສ້າງຕັ້ງກອງທັບ ຄົບຮອບ 75 ປີ, ວັນຊາດທີ 2 ທັນວາ ຄົບຮອບ 48 ປີ,  ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ແລະ ປະທານ ຄຳໄຕ ສີພັນດອນ ຄົບຮອບ 100 ປີ ໂດຍການໃຫ້ກຽດປາຖະກະຖາຂອງສະຫາຍ ນ. ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ທອງຈັນ ໂຂງພູມຄຳ ກຳມະການປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ.

     ຜ່ານການເຂົ້າຮ່ວມກອງປະຊຸມຄັ້ງນີ້ ໄດ້ເຮັດໃຫ້ສະມາຊິກພັກ, ພະນັກງານ-ລັດຖະກອນ ທົ່ວສຳນັກງານຄະນະຈັດຕັ້ງສູນກາງພັກ ໄດ້ມີຄວາມເຂົ້າໃຈເປັນເອກະພາບຕໍ່ກັບວຽກງານບໍລິຫານ-ການເງິນ ແລະ ວຽກງານບຸກຄະລາກອນ, ເຫັນໄດ້ບັນຫາທີ່ຕັ້ງໜ້າ ແລະ ບັນຫາທີ່ຍັງຄົງຄ້າງ ເພື່ອພ້ອມກັນຊອກຫາວີທີແກ້ໄຂຮ່ວມກັນ; ກຳໄດ້ມູນເຊື້ອອັນພິລະອາດຫານຂອງກອງທັບ ແລະ ກຳໄດ້ເນື້ອໃນຈິດໃຈກອງປະຊຸມຄົບຄະນະບໍລິຫານງານພັກ ຄັ້ງທີ 7 ສະໄໝທີ XI ເພື່ອນໍາໄປຈັດຕັ້ງປະຕິບັດໃຫ້ຖືກທິດ.