ໂດຍ: ລັດດາວັນ
ໃນວັນທີ 7 ມີນາ 2024 ທີ່ສຳນັກງານຄະນະຈັດຕັ້ງສູນກາງພັກ (ຄຈສພ) ໄດ້ຈັດພິທີປະກາດການຈັດຕັ້ງພາຍໃນຄະນະຈັດຕັ້ງສູນກາງພັກ ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະປະຈຳພັກ, ຄະນະພັກ, ເລຂາໜ່ວຍພັກ, ຫົວໜ້າກົມ-ຮອງກົມ, ຫົວໜ້າພະແນກ-ຮອງຫົວໜ້າພະແນກ ແລະ ພະນັກງານ-ລັດຖະກອນພາຍໃນຄະນະຈັດຕັ້ງສູນກາງພັກເຂົ້າຮ່ວມ.
ໃນພິທີ ໄດ້ສະເໜີກ່າວຈຸດປະສົງຂອງກອງປະຊຸມ ແລະ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ແລະ ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງຫົວໜ້າກົມ ແລະ ຫົວໜ້າຫ້ອງການ ຄຈສພ, ມະຕິຕົກລົງຂອງຄະນະປະຈຳພັກ ຄະນະຈັດຕັ້ງສູນກາງພັກວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກ ແລະ ຂໍ້ຕົກລົງຂອງຄະນະຈັດຕັ້ງສູນກາງພັກ ວ່າດ້ວຍການຊັບຊ້ອນພະນັກງານພາຍໃນ ຄຈສພ ລາຍລະອຽດມີດັ່ງນີ້: ຍົກຍ້າຍ ສະຫາຍ ວິລະພັນ ສີລິທຳ ກຳມະການຄະນະພັກ ຫົວໜ້າກົມກໍ່ສ້າງພະນັກງານ ຄຈສພ ໄປຮັບໜ້າທີ່ໃໝ່ຢູ່ສະພາແຫ່ງຊາດ; ແຕ່ງຕັ້ງ ສະຫາຍ ພູຂົງ ພິລາເພັດ ເລຂາໜ່ວຍພັກ ຫົວໜ້າຫ້ອງການ ຄຈສພ ເປັນເລຂາໜ່ວຍພັກ ຫົວໜ້າກົມກໍ່ສ້າງພັກ ຄຈສພ; ແຕ່ງຕັ້ງ ສະຫາຍ ວຽນທອງ ສິງຄຳພັນ ເລຂາໜ່ວຍພັກ ຫົວໜ້າກົມຈັດຕັ້ງພະນັກງານ ເປັນເລຂາໜ່ວຍພັກ ຫົວໜ້າຫ້ອງການ ຄຈສພ; ແຕ່ງຕັ້ງ ສະຫາຍ ນາງ ສີບານ ສີສະອາດ ເລຂາໜ່ວຍພັກ ຫົວໜ້າກົມກໍ່ສ້າງພັກ ເປັນເລຂາໜ່ວຍພັກ ຫົວໜ້າກົມຈັດຕັ້ງພະນັກງານ; ແຕ່ງຕັ້ງ ສະຫາຍ ວຽງເພັດ ແສງທອງ ຮອງຫົວໜ້າກົມກໍ່ສ້າງພະນັກງານ ເປັນວ່າການແທນຫົວໜ້າກົມກໍ່ສ້າງພະນັກງານ; ສັບຊ້ອນ ສະຫາຍ ວິລັດ ສຸນີຈັນ ຮອງຫົວໜ້າກົມໂຄສະນາກໍ່ສ້າງພັກ-ພະນັກງານ ໄປຮັບໜ້າທີ່ໃໝ່ເປັນຮອງຫົວໜ້າກົມກໍ່ສ້າງພັກ; ສັບຊ້ອນ ສະຫາຍ ເພັດສະຫວ່າງ ດວງວິໄລ ຮອງຫົວໜ້າກົມກໍ່ສ້າງພັກ ໄປຮັບໜ້າທີ່ໃໝ່ເປັນຮອງຫົວໜ້າກົມກົງຈັກການຈັດຕັ້ງ ແລະ ກົດລະບຽບພັກ, ສັບຊ້ອນ ສະຫາຍ ສາຍເພັດ ຈັນທະວົງ ຮອງຫົວໜ້າກົມກົງຈັກການຈັດຕັ້ງ ແລະ ກົດລະບຽບພັກ ໄປຮັບໜ້າທີ່ໃໝ່ເປັນຮອງຫົວໜ້າກົມກໍ່ສ້າງພະນັກງານ.
ໂອກາດທີ່ມີຄວາມໝາຍສໍາຄັນນີ້ ສະຫາຍ ນາງ ສີໃສ ລືເດດມູນສອນ ໄດ້ໃຫ້ກຽດມີຄຳເຫັນໂອ້ລົມ ຍ້ອງຍໍຊົມເຊີຍຜົນງານ ແລະ ເນັ້ນໃຫ້ບັນດາສະຫາຍທີ່ຖືກແຕ່ງຕັ້ງ-ສັບຊ້ອນຮັບໜ້າທີ່ໃໝ່ ຈົ່ງກຳແໜ້ນພາລະບົດບາດ, ໜ້າທີ່ຂອງຕົນ, ປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ, ເຂັ້ມງວດຕໍ່ລະບຽບວິໄນ, ມີຄວາມເປັນແບບຢ່າງນຳໜ້າໃນການຈັດຕັ້ງປະຕິບັດລະບຽບຂອງພັກ, ກົດໝາຍຂອງລັດ, ສ້າງຄວາມເປັນແບບຢ່າງໃນການນຳພາ ແລະ ປອດໃສໃນການດຳລົງຊີວິດ, ມີຄວາມເປັນເອກະພາບສູງພາຍໃນໝູ່ຄະນະ, ຮັກສາຄຸນທາດການເມືອງຂອງພະນັກງານຈັດຕັ້ງ, ມີວິໄສທັດພັດທະນາວຽກງານຈັດຕັ້ງຢ່າງບໍ່ຢຸດຢັ້ງ ແລະ ເຮັດສຳເລັດໜ້າທີ່ ທີ່ພັກ-ລັດ ກໍ່ຄືການຈັດຕັ້ງມອບໝາຍໃຫ້.
