ຂ່າວໂດຍ: ວິລະສະໄໝ, ພາບ: ພິດສະໄໝ

     ໃນວັນທີ 28 ມີນາ 2024 ຄະນະຈັດຕັ້ງສູນກາງພັກ (ຄຈສພ) ໄດ້ຈັດພິທີປະຖະກະຖາ ໂຄສະນາເຜີຍແຜ່ ມູນເຊື້ອວັນສຳຄັນຂອງພັກ-ຂອງຊາດ ຄື: ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ (21 ມີນາ 1946-21 ມີນາ 2024), ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ (22 ມີນາ 1955-22 ມີນາ 2024) ແລະ ວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 69 ປີ (25 ມີນາ 1955-25 ມີນາ 2024).

     ໃຫ້ກຽດປະຖະກະຖາ ບັນຍາຍ ແລະ ເລົ່າມູນເຊື້ອວັນສໍາຄັນຄັ້ງນີ້ ມີສະຫາຍ ພົ.ຕ ແສງນວນ ຈັນຍາລາດ ປະທານສະຫະພັນນັກຮົບເກົ່າແຫ່ງຊາດລາວ, ອະດີດຄະນະເລຂາທິການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຮອງປະທານສະພາແຫ່ງຊາດ ແລະ ສະຫາຍ ທອງຈັນ ໂຂງພູມຄຳ ກຳມະການປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ; ມີຄະນະພັກ ຄະນະຈັດຕັ້ງສູນກາງພັກ, ຄະນະກົມ ແລະ ພະນັກງານ-ລັດຖະກອນທົ່ວສຳນັກງານຄະນະຈັດຕັ້ງສູນກາງພັກ ເຂົ້າຮ່ວມ.

     ເນື້ອໃນການບັນຍາຍ ປະຖະກະຖາເລົ່າມູນເຊື້ອວັນສຳຄັນດັ່ງກ່າວ ໄດ້ຍົກໃຫ້ເຫັນເຖິງມູນເຊື້ອທາງປະຫວັດສາດ, ການນຳພາອັນປີຊາສາມາດຂອງພັກ, ນໍ້າໃຈເສຍສະຫຼະຕໍ່ສູ້ຢ່າງພິລະອາດຫານບໍ່ຍອມຈຳນົນຂອງນັກຮົບ ແລະ ປະຊາຊົນລາວບັນດາເຜົ່າ ເພື່ອກອບກູ້ເອກະລາດ-ປົດປ່ອຍປະເທດຊາດອອກຈາກການເປັນຫົວເມືອງຂຶ້ນ ແລະ ການກົດຂີ່ຂົມເຮັງຂອງຕ່າງຊາດຜູ້ຮຸກຮານ ພ້ອມນີ້ກໍ່ຍົກໃຫ້ເຫັນປະຫວັດວັນສ້າງຕັ້ງຄະນະຈັດຕັ້ງສູນກາງພັກ ທີ່ມີຕົ້ນກໍາເນີດມາຈາກຫ້ອງການພະນັກງານທົ່ວປະເທດ ເລີ່ມແຕ່ປີ 1955 ເປັນຕົ້ນມາ ແລະ ມີຊື່ເອີ້ນປ່ຽນໄປຕາມແຕ່ລະໄລຍະ ຄື: ຫ້ອງການພະນັກງານທົ່ວປະເທດ (1955–1959), ຫ້ອງການຈັດຕັ້ງສູນກາງ (1960–1972), ຄະນະຈັດຕັ້ງສູນກາງ (1972–11/1988), ກະຊວງຈັດຕັ້ງ ແລະ ກວດກາ (12/1988–11/1989), ຄະນະຈັດຕັ້ງສູນກາງພັກ (ທັນວາ 1989 - ປະຈຸບັນ)  ເຊິ່ງນັບແຕ່ມື້ສ້າງຕັ້ງຈົນມາຮອດປະຈຸບັນ ມີຫົວໜ້ານຳພາ 10 ສະຫາຍ ຄື: 1. ສະຫາຍ ຄຳແສງ ສີວິໄລ, 2. ສະຫາຍ ສີສົມພອນ ລໍວັນໄຊ, 3. ສະຫາຍ ໜູຮັກ ພູມສະຫວັນ, 4. ສະຫາຍ ສະໝານ ວິຍະເກດ, 5. ສະຫາຍ ໄມຈັນຕານ ແສງມະນີ, 6. ສະຫາຍ ອຸດົມ ຂັດຕິຍະ, 7. ສະຫາຍ ທອງສິງ ທຳມະວົງ, 8. ສະຫາຍ ບຸນທອງ ຈິດມະນີ, 9. ສະຫາຍ ຈັນສີ ໂພສີຄຳ ແລະ 10. ສະຫາຍ ນາງ ສີໃສ ລືເດດມູນສອນ.

     ການໂຄສະນາ ປະຖະກະຖາເລົ່າມູນເຊື້ອວັນສຳຄັນດັ່ງກ່າວ ເປັນການສຶກສາອົບຮົມການເມືອງແນວຄິດ ເຮັດໃຫ້ສະມາຊິກພັກ, ພະນັກງານ-ລັດຖະກອນ ໄດ້ຮັບຮູ້ເຂົ້າໃຈແຈ້ງຂຶ້ນຕື່ມ ແລະ ມີຄວາມເປັນເອກະພາບຕໍ່ກັບປະຫວັດສາດຂອງພັກ ຂອງຊາດ ເວົ້າລວມ, ເວົ້າສະເພາະແມ່ນປະຫວັດຄວາມເປັນມາ ແລະ ຄວາມເຕີບໃຫຍ່ເຂັ້ມແຂງຂອງຄະນະຈັດຕັ້ງສູນກາງພັກໃນແຕ່ລະໄລຍະ ເພື່ອນໍາສຶກສາຄົ້ນຄວ້າເປັນບົດຮຽນ ແລະ ຮູ້ໝູນໃຊ້ເຂົ້າໃນໜ້າທີ່ວຽກງານໃນໄລຍະໃໝ່ໃຫ້ສອດຄ່ອງ.