ໂດຍ: ສັນຕິບານ

     ໃນວັນທີ 3 ເມສາ 2024  ຕາງໜ້າຄະນະຈັດຕັ້ງສູນກາງພັກ ນຳໂດຍທ່ານ ນາງ ບຸດສະດີ ທະນະເມືອງ ກຳມະການສູນກາງພັກ ຮອງເລຂາພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ເຂົ້າອວຍພອນ ນາຍ ແລະ ພົນຕຳຫຼວດ ຢູ່ກະຊວງປ້ອງກັນຄວາມສະຫງົບ ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 63 ປີ; ເປັນກຽດຕ້ອນຮັບໂດຍ ພົຕ ສົມວັນ ສາຍລ້ອງພາ ຄະນະປະຈຳພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ.

      ໃນໂອກາດນີ້ ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ ຮອງເລຂາພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ອວຍພອນໄຊອັນປະເສີດມາຍັງຄະນະພັກ, ຄະນະນໍາກະຊວງປ້ອງກັນຄວາມສະຫງົບ, ພ້ອມທັງນາຍ ແລະ ພົນຕຳຫຼວດ ທົ່ວກຳລັງປ້ອງກັນຄວາມສະຫງົບ ຈົ່ງມີສຸຂະພາບເຂັ້ມແຂງ, ປະສົບຜົນສໍາເລັດໃນໜ້າທີ່ການງານ ພ້ອມທັງສົ່ງຄວາມຢື້ຢາມຖາມຂ່າວ ແລະ ອວຍພອນໄຊມາຍັງນາຍ ແລະ ພົນຕຳຫຼວດທົ່ວກໍາລັງປ້ອງກັນຄວາມສະຫງົບ ທີ່ປະຕິບັດໜ້າທີ່ປ້ອງກັນຄວາມສະຫງົບ ຢູ່ເຂດຫ່າງໄກສອກຫຼີກ, ທ້ອງຖິ່ນຮາກຖານ ຈົ່ງມີສຸຂະພາບເຂັ້ມແຂງ ເອົາໃຈໃສ່ປົກປັກຮັກສາ ແລະ ສ້າງສາປະເທດຊາດ ໃຫ້ມີຄວາມສະຫງົບ, ມີຄວາມໝັ້ນຄົງ, ສ້າງເງື່ອນໄຂ ແລະ ອຳນວຍຄວາມສະດວກໃຫ້ແກ່ການພັດທະນາເສດຖະ ກິດ-ສັງຄົມຂອງຊາດໃຫ້ມີການເຕີບໃຫຍ່ເຂັ້ມແຂງ, ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ເຮັດລ້ອນໜ້າທີ່ ທີ່ພັກ-ລັດມອບໝາຍໃຫ້.

     ໃນຕອນທ້າຍ ພົຕ ສົມວັນ ສາຍລ້ອງພາ ຄະນະປະຈຳພັກກະຊວງ ຮອງລັດຖະມົນຕີກະຊວງ ປກສ ກໍ່ໄດ້ສະແດງຄວາມຂອບໃຈຕໍ່ຄະນະພັກ, ຄະນະນຳ ຈາກຄະນະຈັດຕັ້ງສູນກາງພັກ ທີ່ເຫັນໄດ້ຄວາມໝາຍຄວາມສຳຄັນຕໍ່ວຽກງານປ້ອງກັນຄວາມສະຫງົບ ພ້ອມທັງໃຫ້ການອູ້ມຊູຊ່ວຍເຫຼືອ ແລະ ຊຸກຍູ້ໃຫ້ແກ່ວຽກງານປ້ອງກັນຄວາມສະຫງົບ ເຊິ່ງເປັນການປະກອບສ່ວນທີ່ສໍາຄັນ ເຮັດໃຫ້ກໍາລັງ ປກສ ມີຄວາມເຂັ້ມແຂງ ສາມາດເຮັດໜ້າທີ່ການເມືອງຂອງຕົນໄດ້ເປັນຢ່າງດີ ເຮັດໃຫ້ປະເທດຊາດມີຄວາມສະຫງົບສຸກ, ສັງຄົມມີຄວາມເປັນລະບຽບຮຽບຮ້ອຍ ພ້ອມທັງອວຍພອນໄຊໃຫ້ຄະນະທຸກທ່ານ ຈົ່ງມີແຕ່ຄວາມຜາສຸກ ມີຄວາມຈະເລີນກ້າວໜ້າໃນໜ້າທີ່ວຽກງານ ມີຄວາມສຸກໃນຊີວິດສ່ວນຕົວ ແລະ ຄອບຄົວ.