ພາບ ແລະ ຂ່າວໂດຍ: ສ.ສົດໃສ

     ໂດຍປະຕິບັດຕາມມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງຫົວໜ້າກົມກໍ່ສ້າງພັກ ສະບັບເລກທີ 42/ຄລສພ, ລົງວັນທີ 01 ມີນາ 2024 ແລະ ມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງຫົວໜ້າກົມຈັດຕັ້ງ-ພະນັກງານ ສະບັບເລກທີ 44/ຄລສພ, ລົງວັນທີ 01 ມີນາ 2024.

     ໃນຕອນເຊົ້້າ ວັນທີ 28 ມີນາ 2024 ຢູ່ທີ່ສະໂມສອນຄະນະຈັດຕັ້ງສູນກາງພັກ ໄດ້ຈັດພິທີມອບ-ຮັບໜ້າທີ່ຫົວໜ້າກົມກໍ່ສ້າງພັກ ລະຫວ່າງ ທ່ານ ນາງ ສີບານ ສີສະອາດ ກຳມະການຄະນະພັກ, ຫົວໜ້າກົມກໍ່ສ້າງພັກ (ຜູ້ເກົ່າ) ກັບທ່ານ ພູຂົງ ພິລາເພັດ ກຳມະການຄະນະພັກ, ຫົວໜ້າກົມກໍ່ສ້າງພັກ (ຜູ້ໃໝ່) ໂດຍການເຂົ້າຮ່ວມຂອງທ່ານ ປອ. ວິສຸກ ພົມພິທັກ ກຳມະການຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ, ຜູ້ຊີ້ນຳກົມກໍ່ສ້າງພັກ, ມີພະນັກງານ-ລັດຖະກອນ ພາຍໃນກົມກໍ່ສ້າງພັກເຂົ້້າຮ່ວມເປັນສັກຄີພີຍານ.

     ພິທີດັ່ງກ່າວ ທ່ານ ນາງ ສີບານ ສີສະອາດ ໄດ້ສະຫຼຸບການນຳພາ-ຊີ້ນຳ ການປະຕິບັດໜ້າທີ່ການເມືອງໃນໄລຍະ 10 ເດືອນກວ່າຜ່ານມາ (2023-2024) ແລະ ທິດທາງແຜນການໃນປີ 2024. ຈາກນັ້ນ ໄດ້ເຊັນບົດບັນທຶກມອບ-ຮັບໜ້າທີ່ລະຫວ່າງຫົວໜ້າກົມກໍ່ສ້າງພັກຜູ້ເກົ່າ ແລະ ຜູ້ໃໝ່.

     ຕອນທ້າຍຂອງພິທີ ທ່ານ ປອ ວິສຸກ ພົມພິທັກ ກຳມະການຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ຜູ້ຊີ້ນຳກົມກໍ່ສ້າງພັກ ໄດ້ມີຄຳເຫັນໂອ້ລົມ ຍ້ອງຍໍ-ຊົມເຊີຍຜົນງານການປະກອບສ່ວນຂອງຫົວໜ້າກົມກໍ່ສ້າງພັກ ຜູ້ເກົ່າ ທີ່ນຳພາ-ຊີ້ນຳຈັດຕັ້ງປະຕິບັດຕາມພາລະບົດບາດຂອງກົມ ເປັນເສນາທິການໃຫ້ຄະນະຈັດຕັ້ງສູນກາງພັກ ໃນການຄົ້ນຄວ້າຍຸດທະສາດ ກ່ຽວກັບການປັບປຸງ, ຍົກສູງຄຸນນະພາບການຈັດຕັ້ງຮາກຖານພັກ, ສະມາຊິກພັກ ແລະ ປ້ອງກັນພັກ-ພະນັກງານແຕ່ລະໄລຍະໄດ້ເປັນຢ່າງດີ. ທ່ານ ປອ ວິສຸກ ພົມພິທັກ ຍັງໄດ້ຮຽກຮ້ອງໃຫ້ພະນັກງານພາຍໃນກົມກໍ່ສ້າງພັກ ຄະນະຈັດຕັ້ງສູນກາງພັກ ຈົ່ງພ້ອມກັນຮັດແໜ້ນຄວາມສາມັກຄີ, ສະໜັບສະໜູນ ແລະ ຊ່ວຍເຫຼືອຫົວໜ້າກົມກໍ່ສ້າງພັກ (ຜູ້ໃໝ່) ເຮັດໜ້າທີ່ອັນສໍາຄັນຕາມພາລະບົດບາດຂອງກົມກໍ່ສ້າງພັກ ໃຫ້ມີຜົນສໍາເລັດດ້ວຍຄຸນນະພາບໃໝ່ ຕອບສະໜອງໄດ້ການເລັ່ງທວງຂອງໜ້າທີ່ການເມືອງໃນໄລຍະໃໝ່, ແກ້ໄຂບັນຫາການຄົ້ນຄວ້າຍຸດທະສາດກ່ຽວກັບການປັບປຸງ, ຍົກສູງຄຸນນະພາບການຈັດຕັ້ງຮາກຖານພັກ, ສະມາຊິກພັກ ແລະ ປ້ອງກັນພັກ-ພະນັກງານໃນໄລຍະໃໝ່ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນເລື້ອຍໆ.