ພາບ: ອານຸລັກ; ຂ່າວໂດຍ: ສ.ສົດໃສ

     ໃນວັນທີ 27 ມີນາ 2024 ຢູ່ທີ່ສຳນັກງານຄະນະຈັດຕັ້ງສູນກາງພັກ ໄດ້ຈັດພິທີມອບ-ຮັບໜ້າທີ່ຫົວໜ້າກົມກໍ່ສ້າງພະນັກງານ ລະຫວ່າງ ທ່ານ ວິລະພັນ ສິລິທຳ ກຳມະການຄະນະພັກ, ຫົວໜ້າກົມກໍ່ສ້າງພະນັກງານ (ຜູ້ເກົ່າ) ແລະ ທ່ານ ວຽງເພັດ ແສງທອງ ວ່າການແທນຫົວໜ້າກົມກໍ່ສ້າງພະນັກງານ (ຜູ້ໃໝ່) ໂດຍການເຂົ້າຮ່ວມຂອງທ່ານ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ ຜູ້ຊີ້ນຳກົມກໍ່ສ້າງພະນັກງານ, ມີພະນັກງານ-ລັດຖະກອນ ພາຍໃນກົມກໍ່ສ້າງພະນັກງານເຂົ້້າຮ່ວມຢ່າງພ້ອມພຽງ.

     ໃນພິທີ ທ່ານ ວິລະພັນ ສິລິທຳ ໄດ້ສະຫຼຸບການນຳພາ-ຊີ້ນຳ ການປະຕິບັດໜ້າທີ່ການເມືອງໃນໄລຍະຜ່ານມາ ເປັນເສນາທິການໃຫ້ຄະນະຈັດຕັ້ງສູນກາງພັກ ຕາມພາລະບົດບາດ ໜ້າທີ່ ຄວາມຮັບຜິດຊອບຂອງຕົນ, ຈາກນັ້ນ ໄດ້ເຊັນບົດບັນທຶກມອບ-ຮັບໜ້າທີ່ລະຫວ່າງຫົວໜ້າກົມກໍ່ສ້າງພະນັກງານຜູ້ເກົ່າ ແລະ ຜູ້ໃໝ່.

     ຕອນທ້າຍຂອງພິທີ ທ່ານ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ ຜູ້ຊີ້ນຳກົມກໍ່ສ້າງພະນັກງານ ໄດ້ມີຄຳເຫັນໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຜົນງານການປະກອບສ່ວນຂອງທ່ານ ວິລະພັນ ສິລິທຳ ກຳມະການຄະນະພັກ, ເລຂາໜ່ວຍພັກ, ຫົວໜ້າກົມກໍ່ສ້າງພະນັກງານ (ຜູ້ເກົ່າ) ທີ່ນຳພາ-ຊີ້ນຳຈັດຕັ້ງປະຕິບັດຕາມພາລະບົດບາດຂອງກົມ ເປັນເສນາທິການໃຫ້ຄະນະຈັດຕັ້ງສູນກາງພັກ ໃນການຫັນແນວທາງແຜນນະໂຍບາຍຂອງພັກ-ລັດ, ແຜນຍຸດທະສາດພັດທະນາຊັບພະຍາກອນມະນຸດເປັນແຜນຍຸດທະສາດ, ແຜນການ, ໂຄງການກໍ່ສ້າງ-ບຳລຸງພະນັກງານ ແລະ ດຳເນີນການຈັດຕັ້ງປະຕິບັດຕົວຈິງໄດ້ດີຕະຫຼອດໄລຍະດຳລົງຕຳແໜ່ງໃນໄລຍະຜ່ານມາ. ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ພະນັກງານພາຍໃນກົມກໍ່ສ້າງພະນັກງານ ຄະນະຈັດຕັ້ງສູນກາງພັກ ຈົ່ງພ້ອມກັນຮັກສາມູນເຊື້ອຮັດແໜ້ນຄວາມສາມັກຄີ, ສະໜັບສະໜູນ ແລະ ຊ່ວຍເຫຼືອ ວ່າການແທນຫົວໜ້າກົມກໍ່ສ້າງພະນັກງານ (ຜູ້ໃໝ່) ເຮັດໜ້າທີ່ຕາມພາລະບົດບາດຂອງກົມກໍ່ສ້າງພະນັກງານ ໃຫ້ມີຜົນສຳເລັດດ້ວຍຄຸນນະພາບໃໝ່ ຕອບສະໜອງໄດ້ການເລັ່ງທວງຂອງໜ້າທີ່ການເມືອງໃນແຕ່ລະໄລຍະ.