ໂດຍ: ພອນສະຫວັນ
ວັນທີ 20 ພຶດສະພາ 2024 ຄະນະຈັດຕັ້ງສູນກາງພັກ ໄດ້ຈັດພິທີປິດໂຄງການ "ສ້າງຄວາມເຂັ້ມແຂງໃຫ້ແກ່ພະນັກງານນໍາພາ-ຄຸ້ມຄອງຂະແໜງຈັດຕັ້ງຂອງ ສປປ ລາວ" ຢູ່ທີ່ໂຮງແຮມ ເສດຖາປາຣາຊ໌ ໂດຍໃຫ້ກຽດເຂົ້າຮ່ວມເປັນປະທານຂອງສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ມີຫົວໜ້າຄະນະຮັບຜິດຊອບໂຄງການສ້າງຄວາມເຂັ້ມແຂງໃຫ້ແກ່ພະນັກງານນຳພາ-ຄຸ້ມຄອງຂະແໜງຈັດຕັ້ງຂອງ ສປປ ລາວ, ມີຄະນະພັກ ຄະນະຈັດຕັ້ງສູນກາງພັກ, ມີຕາງໜ້າສະຖານທູດ ສປ ຈີນ ປະຈໍາລາວ, ບັນດາສະຫາຍຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ, ອາຈານຈາກມະຫາວິທະຍາໄລແຫ່ງຊາດ, ມີຕາງໜ້າຈາກກົມເສດຖະກິດ ກະຊວງການຕ່າງປະເທດ, ຕະຫຼອດຮອດຫົວໜ້າກົມ, ຫ້ອງການ, ສູນພັດທະນາວຽກງານຈັດຕັ້ງ ຄະນະຈັດຕັ້ງສູນກາງພັກ ພ້ອມດ້ວຍຄະນະຮັບຜິດຊອບ ເຂົ້າຮ່ວມຢ່າງພ້ອມພຽງ.
ພິທີດັ່ງກ່າວ ສະຫາຍ ນາງ ວິໄລວັນ ເພັງສະຫວັດ ຫົວໜ້າສູນພັດທະນາວຽກງານຈັດຕັ້ງ ຄະນະຈັດຕັ້ງສູນກາງພັກ, ຮອງຫົວໜ້າຄະນະຮັບຜິດຊອບໂຄງການ ໄດ້ລາຍງານກ່ຽວກັບໂຄງການ "ສ້າງຄວາມເຂັ້ມແຂງໃຫ້ແກ່ພະນັກງານນໍາພາ-ຄຸ້ມຄອງຂະແໜງຈັດຕັ້ງຂອງ ສປປ ລາວ" ໂດຍຫຍໍ້ ເຊິ່ງໂຄງການດັ່ງກ່າວນີ້ ແມ່ນພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຂອງລັດຖະບານ ສປ ຈີນ, ເປັນໂຄງການທີ່ມີຄວາມໝາຍສໍາຄັນທີ່ສຸດຕໍ່ການພັດທະນາຊັບພະຍາກອນມະນຸດ ເວົ້າລວມ, ເວົ້າສະເພາະ ແມ່ນສ້າງຂີດຄວາມສາມາດ ໃຫ້ພະນັກງານຂົງເຂດວຽກງານຈັດຕັ້ງ ໂດຍພາຍຫຼັງໂຄງການຖືກຮັບຮອງ ວັນທີ 7/6/2022 ຄະນະຮັບຜິດຊອບໂຄງການ ຮ່ວມກັບກອງເລຂາຂອງໂຄງການ ໂດຍຜ່ານກົມເສດຖະກິດຂອງກະຊວງການຕ່າງປະເທດ ໄດ້ເປັນເຈົ້າການສ້າງແຜນງານ, ບັນດາໜ້າວຽກ, ກິດຈະກໍາທີ່ຈະໄດ້ຈັດຕັ້ງປະຕິບັດ, ແຜນງົບປະມານລະອຽດ, ເນື້ອໃນບົດປື້ມຄູ່ມືການຝຶກອົບຮົມ ແລະ ບັນດາເອກະສານຕ່າງໆຮັບໃຊ້ຊຸດຝຶກອົບຮົມ; ນອກນີ້ຄະນະຮັບຜິດຊອບໂຄງການ ໄດ້ຈັດກອງປະຊຸມທົບທວນຄວາມຄືບໜ້າການຈັດຕັ້ງປະຕິບັດໂຄງການ, ຂໍ້ຄົງຄ້າງ ແລະ ທິດທາງຕະຫຼອດໄລຍະຈັດຕັ້ງປະຕິບັດໂຄງການໃຫ້ມີປະສິດທິຜົນ ແລະ ຖືກຕ້ອງກັບຈຸດປະສົງຂອງໂຄງການ ໂດຍໂຄງການຄັ້ງນີ້ ມີເປົ້າໝາຍຜູ້ເຂົ້າຮ່ວມຝຶກອົບຮົມ ແມ່ນພະນັກງານບໍລິຫານລັດປະເພດ 4-5 ແລະ ປະເພດ 5-8 ຂອງ 8 ແຂວງ ຄື: ໄຊສົມບູນ, ບໍລິຄໍາໄຊ, ອຸດົມໄຊ, ໄຊຍະບູລີ, ຜົ້ງສາລີ, ຫຼວງນໍ້າທາ, ບໍ່ແກ້ວ ແລະ ຫົວພັນ; ນອກນັ້ນ ຍັງໄດ້ຈັດຝຶກອົບຮົມຢູ່ທີ່ ສປ ຈີນ 02 ຊຸດ ແລະ ສສ ຫວຽດ ນາມ 02 ຊຸດ ເຊິ່ງໄດ້ເສີມສ້າງຂີດຄວາມສາມາດ ຂອງສະມາຊິກພັກ-ພະນັກງານ ໃນຂົງເຂດວຽກງານຈັດຕັ້ງ ແລະ ສ້າງສາຍພົວພັນຮ່ວມມືອັນດີກັບສະມາຊິກພັກ-ພະນັກງານ ແລະ ຄູອາຈານ ຈາກສະຖາບັນການເມືອງແຫ່ງຊາດຂອງ ສປ ຈີນ ແລະ ສສ ຫວຽດນາມ.
ໃນຕອນທ້າຍພິທີ ສະຫາຍ ນາງ ບຸດສະດີ ທະນະເມືອງ ປະທານກອງປະຊຸມ ໄດ້ມີຄຳເຫັນ ຕີລາຄາສູງ ທີ່ພັກ-ລັດຖະບານ ສປ ຈີນ ເຫັນໄດ້ຄວາມສຳຄັນຂອງວຽກງານຈັດຕັ້ງ ແລະ ອະນຸມັດທຶນຮອນ ພັດທະນາການນຳຂອງຂະແໜງຈັດຕັ້ງ ໂດຍການຮ່ວມມືຂອງສອງພັກ-ສອງລັດ ທີ່ມີການພົວພັນຮ່ວມມືຮອບດ້ານ ບົນຈິດໃຈ 4 ດີ ແລະ ເປັນຄູ່ຮ່ວມຊະຕາກຳ ລາວ-ຈີນ; ການຊ່ວຍເຫຼືອຂອງລັດຖະບານ ສປ ຈີນ ໃນຄັ້ງນີ້ ແມ່ນການໃຫ້ທຶນທີ່ມີຄຸນຄ່າສຳຄັນຕໍ່ກັບຂະແໜງຈັດຕັ້ງ ເຊິ່ງຂະແໜງຈັດຕັ້ງ ເປັນຂະແໜງການໜຶ່ງ ທີ່ມີຄວາມສໍາຄັນໃນການປະກອບສ່ວນ ກໍ່ສ້າງບຸກຄະລາກອນຂັ້ນນໍາພາ-ຄຸ້ມຄອງ ເພື່ອຕອບສະໜອງໃຫ້ແກ່ການພັດທະນາເສດຖະກິດ-ສັງຄົມ ໃນແຕ່ລະໄລຍະ, ຖ້າພະນັກງານຂະແໜງຈັດຕັ້ງມີຄຸນນະພາບ ກໍ່ຈະມີຜົນເຮັດໃຫ້ພະນັກງານນໍາພາ-ຄຸ້ມຄອງຢູ່ຂະແໜງການອື່ນມີຄຸນນະພາບ ເວົ້າລວມ, ເວົ້າສະເພາະແມ່ນການໃຫ້ຄວາມຮ່ວມມື, ອຳນວຍຄວາມສະດວກຈາກຄະນະພັກ ຄະນະນຳຂອງ 8 ແຂວງ, ກົມເສດຖະກິດ ແລະ ອາຈານຈາກມະຫາວິທະຍາໄລແຫ່ງຊາດ ທີ່ມາຊ່ວຍໂຄງການດັ່ງກ່າວນີ້ ນັບແຕ່ເລີ່ມຂຽນໂຄງການ ແລະ ຈັດຕັ້ງປະຕິບັດໂຄງການຈົນສຳເລັດ, ພ້ອມນີ້ ສະຫາຍ ຍັງໄດ້ສະເໜີມາທາງສະຖານທູດ ສປ ຈີນ ປະຈຳລາວ ແລະ ກະຊວງການຕ່າງປະເທດ ເພື່ອສະໜອງແຫຼ່ງທຶນໃນການສືບຕໍ່ໂຄງການຕື່ມອີກ 10 ແຂວງ, ນະຄອນຫຼວງ ແລະ 36 ກະ ຊວງ-ອົງການທີ່ຍັງບໍ່ທັນໄດ້ຮັບການຝຶກອົບຮົມ ແລະ ຮຽກຮ້ອງມາຍັງຄະນະພັກ, ຄະນະນໍາ ໃນ 8 ແຂວງທີ່ສຳເລັດການຝຶກອົບຮົມ ສືບຕໍ່ຜັນຂະຫຍາຍເນື້ອໃນຈິດໃຈຂອງບົດສອນເຂົ້າສູ່ພາກປະຕິບັດຕົວຈິງ ເຮັດໃຫ້ວຽກງານພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ຢູ່ທ້ອງຖິ່ນຂອງຕົນໄດ້ຮັບການພັດທະນາ ແລະ ມີຜົນສຳເລັດໃໝ່; ບັນດາຄະນະກົມ, ຫ້ອງການ ແລະ ສູນ ພາຍໃນຄະນະຈັດຕັ້ງສູນກາງພັກ ຈົ່ງເພີ່ມທະວີຄວາມຮັບຜິດຊອບ, ເປັນເຈົ້າການແນະນໍາ ປັບປຸງຄູ່ມືຝຶກອົບຮົມວຽກງານຈັດຕັ້ງໃຫ້ສອດຄ່ອງກັບໜ້າທີ່ການເມືອງ ແລະ ສ້າງວິທະຍາກອນຂອງຕົນໃຫ້ເປັນມືອາຊີບທີ່ແທ້ຈິງ.
