ໂດຍ: ແສງອາລຸນ ຈັນທາທອນ
ໃນໂອກາດທີ່ທົ່ວພັກ ແລະ ທົ່ວປວງຊົນລາວທັງຊາດ ພວມອອກແຮງແຂ່ງຂັນສ້າງຂະບວນການຕ່າງໆຕ້ອນຮັບວັນສໍາຄັນຂອງພັກ ຂອງຊາດ ກໍ່ຄືການສ້າງຂະບວນການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ຢູ່ກະຊວງ-ອົງການ ແລະ ທ້ອງຖິ່ນໃນທົ່ວປະເທດ; ໃນລະຫວ່າງວັນທີ 9-12 ກໍລະກົດ 2024 ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງຄໍາມ່ວນ ແລະ ແຂວງສະຫວັນນະເຂດ ເພື່ອຕິດຕາມ ແລະ ກວດກາຄືນການຈັດຕັ້ງປະຕິບັດຄຳສັ່ງ ເລກທີ 411 ຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ, ຄຳແນະນຳ ເລກທີ 211 ຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ແລະ ນິຕິກຳຕ່າງໆທີ່ກ່ຽວຂ້ອງກັບການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ໃນການກະກຽມດຳເນີນກອງປະຊຸມໃຫຍ່ອົງຄະນະພັກເມືອງທີ່ຈະດໍາເນີນໃນຕົ້ນປີ 2025.
ໃນການເຄື່ອນໄຫວ ແລະ ເຮັດວຽກຢູ່ 2 ແຂວງພາກກາງຄັ້ງນີ້ ໄດ້ຮັບຟັງການລາຍງານຂອງສະຫາຍ ເລຂາຄະນະບໍລິຫານງານພັກແຂວງ ກ່ຽວກັບສະພາບການພັດທະນາເສດຖະກິດ-ສັງຄົມ, ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ການຈັດຕັ້ງປະຕິບັດ 2 ວາລະແຫ່ງຊາດຂອງແຂວງ ໂດຍໄດ້ຍົກໃຫ້ເຫັນເຖິງການນຳພາ-ຊີ້ນໍາວຽກງານຮອບດ້ານຂອງແຂວງ ເຊິ່ງເປັນປີທີ່ 4 ຂອງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ເປັນຕົ້ນແມ່ນດ້ານການລົງທຶນ, ການສົ່ງອອກສິນຄ້າ, ການນຳເຂົ້າສິນຄ້າ ແລະ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ; ໄດ້ສຸມທຶນຮອນ, ງົບປະມານ ເຂົ້າໃນການປັບປຸງພື້ນຖານໂຄງລ່າງ ແລະ ຍົກລະດັບການບໍລິການ ເພື່ອແກ້ໄຂຄວາມທຸກຍາກຂອງປະຊາຊົນ; ວຽກງານສຶກສາໄດ້ປັບປຸງຂະຫຍາຍພື້ນຖານໂຄງລ່າງການສຶກສາ ພ້ອມທັງປັບປຸງຄຸນນະພາບການຮຽນ ການສອນ ຢູ່ສະຖານການສຶກສາຕ່າງໆອອກສູ່ເຂດຊົນນະບົດໄດ້ເພີ່ມຂື້ນ; ພ້ອມທັງສູ້ຊົນປະຕິບັດເປົ້າໝາຍການພັດທະນາໃນຂະແໜງສຶກສາ, ເອົາໃຈໃສ່ສະກັດກັ້ນ-ປ້ອງກັນການລະບາດຂອງພະຍາດຕາມລະດູການ, ປັບປຸງຄຸນນະພາບການປິ່ນປົວໃນເຂດຊົນນະບົດຫ່າງໄກສອກຫລີກ ໂດຍການລົງທຶນກໍ່ສ້າງສຸກສາລາ, ພັດທະນາໂຮງໝໍນ້ອຍ, ສ້າງຄວາມເຂັ້ມແຂງໃຫ້ອາສາສະໝັກສາທາລະນະສຸກບ້ານ.
ພາຍຫຼັງໄດ້ຮັບຟັງການລາຍງານສະພາບການນໍາພາລວມຂອງແຂວງແລ້ວ, ສະຫາຍຕາງໜ້າໃຫ້ກົມການເມືອງສູນກາງພັກ, ຄະນະເລຂາທິການສູນກາງພັກ ແລະ ຄະນະຈັດຕັ້ງສູນກາງພັກ ກໍໄດ້ມີຄໍາເຫັນເຈາະຈິ້ມຕໍ່ຄະນະບໍລິຫານງານພັກແຂວງບາງດ້ານເປັນຕົ້ນແມ່ນ: ພາຍຫຼັງສໍາເລັດກອງປະຊຸມຮາກຖານພັກແລ້ວ ຢູ່ຂັ້ນບ້ານໄດ້ເປີດກອງປະຊຸມອົງການປົກຄອງບ້ານແລ້ວບໍ?, ສໍາລັບເມືອງທີ່ຈະດໍາເນີນກອງປະຊຸມໃຫຍ່ໃນອະນາຄົດອັນໃກ້ນີ້ ມີຄວາມພ້ອມແລ້ວບໍ? ການຄັດເລືອກຜູ້ແທນສົມບູນທີ່ຈະເຂົ້າຮ່ວມກອງປະຊຸມໃຫຍ່ຂອງພັກແຕ່ລະຂັ້ນ ໄດ້ຕາມມາດຕະຖານ-ເງື່ອນໄຂແລ້ວບໍ່? ເພື່ອຮັບປະກັນໃຫ້ກອງປະຊຸມດໍາເນີນໄປດ້ວຍຜົນສໍາເລັດ ແລະ ມີຄຸນນະພາບ. ພ້ອມນີ້, ຄະນະບໍລິຫານງານ ກໍຄືພາກສ່ວນທີ່ຮັບຜິດຊອບ ໄດ້ມີການປະກອບຄໍາເຫັນ ແລະ ຊີ້ແຈງຕໍ່ເນື້ອໃນຂໍ້ເຈາະຈີ້ມດັ່ງກ່າວ.
ຈາກນັ້ນ, ຫົວໜ້າຄະນະຈັດຕັ້ງສູນກາງພັກ ໄດ້ສືບຕໍ່ມີຄໍາເຫັນຊີ້ນໍາໃນການກະກຽມກອງປະຊຸມໃຫຍ່ຄະນະພັກແຕ່ລະຂັ້ນ ເຊິ່ງມີເນື້ອໃນດັ່ງນີ້:
ໃນໂອກາດເຄື່ອນໄຫວເຮັດວຽກຢູ່ສອງແຂວງດັ່ງກ່າວ, ສະຫາຍ ນາງ ສີໃສ ລືເດດມູນສອນ ພ້ອມດ້ວຍຄະນະ ຍັງໄດ້ພົບປະໂອ້ລົມບາງໜ່ວຍພັກ ແລະ ຂະແໜງການອ້ອມຂ້າງແຂວງ ຕື່ມອີກ.
