ຂ່າວ: ນ. ຄຳສະຫວັນ
ພາບ:ນ. ວິລັດດາ
ໃນວັນທີ 8 ສິງຫາ 2024 ໜ່ວຍພັກກົມກໍ່ສ້າງພະນັກງານ ຄະນະຈັດຕັ້ງສູນກາງພັກ ໄດ້ຈັດພິທີຮັບສະມາຊິກພັກສົມບູນໃໝ່ 1 ສະຫາຍ ຢູ່ທີ່ຫ້ອງປະຊຸມຄະນະຈັດຕັ້ງສູນກາງພັກ ໂດຍການເປັນປະທານຂອງສະຫາຍ ວຽງເພັດ ແສງທອງ ເລຂາໜ່ວຍພັກກົມກໍ່ສ້າງພະນັກງານ, ໃຫ້ກຽດເຂົ້າຮ່ວມມີສະຫາຍ ທອງຈັນ ໂຂງພູມຄຳ ກຳມະການປະຈຳພັກ, ປະທານກວດກາຄະນະພັກ ຄະນະຈັດຕັ້ງສູນກາງພັກ, ມີຕາງໜ້າຈາກບັນດາໜ່ວຍພັກ ທີ່ຂຶ້ນກັບຄະນະຈັດຕັ້ງສູນກາງພັກ ພ້ອມດ້ວຍສະມາຊິກພັກພາຍໃນໜ່ວຍພັກກົມກໍ່ສ້າງພະນັກງານເຂົ້າຮ່ວມ.
ໃນພິທີດັ່ງກ່າວ ສະຫາຍ ມະນີ ກ່ານສີລາ ຮອງເລຂາໜ່ວຍພັກກົມກໍ່ສ້າງພະນັກງານ ໄດ້ຜ່ານ ມະຕິຕົກລົງ ເລກທີ 59/ຄປພ.ຄຈສພ ວ່າດ້ວຍການເລື່ອນສະມາຊິກພັກສຳຮອງເປັນສະມາຊິກພັກສົມບູນ ຈໍານວນ 1 ສະຫາຍ ເຊິ່ງໃນໄລຍະ ຜ່ານການຝຶກຝົນຫຼໍ່ຫຼອມ ແລະ ທົດສອບໃນຂະບວນການວຽກງານຕົວຈິງ ເຫັນວ່າຜູ້ກ່ຽວມີຜົນງານດີເດັ່ນ ໄດ້ຮັບຄວາມເຊື່ອຖື ແລະ ໄວ້ວາງໃຈຈາກມະຫາຊົນ ແລະ ມີມາດຖານເງື່ອນໄຂສາມາດເລື່ອນເປັນສະມາຊິກພັກສົມບູນໄດ້. ຈາກນັ້ນ, ສະຫາຍ ວຽງເພັດ ແສງທອງ ໄດ້ມີຄຳເຫັນກ່າວຮັບ ແລະ ມອບຂໍ້ຕົກລົງໃຫ້ສະມາຊິກພັກສົມບູນໃໝ່.
ໃນຕອນທ້າຍຂອງພິທີ ສະຫາຍ ທອງຈັນ ໂຂງພູມຄຳ ໄດ້ມີຄຳເຫັນໂອ້ລົມຕໍ່ພິທີ ໂດຍສະເພາະຕໍ່ສະມາຊິກພັກສົມບູນໃໝ່ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານການກໍ່ສ້າງ ແລະ ຝຶກຝົນຫຼໍ່ຫຼອມຂອງສະມາຊິກພັກສົມບູນໃໝ່, ສະຫາຍມີຄວາມເຊື່ອໝັ້ນ ແລະ ຮຽກຮ້ອງໃຫ້ສະມາຊິກພັກສົມບູນໃໝ່ ຈົ່ງເອົາໃຈໃສ່ຄົ້ນຄວ້າຮ່ຳຮຽນ, ກຳແໜ້ນແນວທາງນະໂຍບາຍ, ກົດລະບຽບຂອງພັກ, ກົດໝາຍຂອງລັດໃຫ້ເລິກເຊິ່ງ, ມີຄວາມຫ້າວຫັນຕໍ່ໜ້າທີ່ວຽກງານ ແລະ ບຸກບືນຜ່ານຜ່າທຸກຂໍ້ຫຍຸ້ງຍາກໃນການປະຕິບັດໜ້າທີ່ວຽກງານຂອງຕົນເອງດ້ວຍຄວາມຮັບຜິດຊອບສູງ, ມີນ້ຳໃຈເສຍສະຫຼະ, ມີຄວາມອົດທົນ, ຖືຜົນປະໂຫຍດສ່ວນລວມສູງກວ່າຜົນປະໂຫຍດສ່ວນຕົວ, ມີຄວາມເປັນແບບຢ່າງໃນການດຳລົງຊີວິດທີ່ປອດໃສຂາວສະອາດ, ມີຄວາມສາມັກຄີພາຍໃນໝູ່ຄະນະ, ຍຶດໝັ້ນແນວທາງ ແລະ ອຸດົມການຂອງພັກ, ຮັກສາຄຸນທາດການເມືອງ, ຄຸນສົມບັດ-ສິນທໍາປະຕິວັດ ແລະ ທາດແທ້ຂອງສະມາຊິກພັກ ປປ ລາວ ໄວ້ໃຫ້ໝັ້ນຄົງຕະຫຼອດໄປ…ຯ
