ພາບ-ຂ່າວ ໂດຍ: ແສງຄຳ
ໃນວັນທີ 3 ທັນວາ 2024 ຢູ່ທີ່ສະໂມສອນຄະນະຈັດຕັ້ງສູນກາງພັກ ໄດ້ມີພິທີປິດຊຸດຝຶກອົບຮົມການເປັນຄູຝຶກທີ່ດີໃຫ້ແກ່ພະນັກງານ-ລັດຖະກອນຄະນະຈັດຕັ້ງສູນກາງພັກ ໂດຍການເປັນປະທານຮ່ວມຂອງສະຫາຍ ຄໍາສອນ ສຸເທບມະນີ ຮອງຫົວໜ້າກົມຈັດຕັ້ງ-ພະນັກງານ ແລະສະຫາຍ ປອ ນ. ຈັນທາ ອ່ອນໄຊວຽງ ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ, ໃນພິທີມີບັນດາວິທະຍາກອນຈາກສະຖາບັນ ສວປຝ ກະຊວງພາຍໃນ, ຄະນະຮັບຜິດຊອບຊຸດຝຶກອົບຮົມສູນພັດທະນາວຽກງານຈັດຕັ້ງ ແລະ ສຳມະນາກອນທັງໝົດເຂົ້າຮ່ວມ.
ໃນພິທີສະຫາຍ ທອງຈັນຊະ ຢາທໍ່ຕູ້ ຮອງຫົວໜ້າສູນພັດທະນາວຽກງານຈັດຕັ້ງ ໄດ້ຂຶ້ນຜ່ານບົດລາຍງານ ກ່ຽວກັບຜົນສຳເລັດຂອງຊຸດຝຶກອົບຮົມການເປັນຄູຝຶກທີ່ດີ ໃຫ້ພະນັກງານ-ລັດຖະກອນ ຄະນະຈັດຕັ້ງສູນກາງພັກ ທີ່ໄດ້ດຳເນີນມາເປັນເວລາ 4 ວັນ ໂດຍເລີ່ມແຕ່ວັນທີ 25-27 ພະຈິກ ແລະ ວັນທີ 3 ທັນວາ 2024 ເຊິ່ງລວມມີສຳມະນາກອນເຂົ້າຮ່ວມ 26 ສະຫາຍ, ຍິງ 10 ສະຫາຍ, ເນື້ອໃນຂອງການຝຶກອົບຮົມມີ: ບົດບາດຂອງນັກວິທະຍາກອນ, ການສ້າງຄວາມເຊື່ອໝັ້ນສຳລັບວິທະຍາກອນ, ຫຼັກການເວົ້າສໍາລັບວິທະຍາກອນ, ການຕໍານິຕິຊົມທີ່ມີປະສິດທິພາບ, ການນຳສະເໜີ ແລະ ການກະກຽມແຜນການສອນ, ການກະກຽມຫົວຂໍ້ ແລະ ແນະນຳການຂຶ້ນຫ້ອງ ແລະ ເຕັກນິກການຝຶກອົບຮົມໃນຮູບແບບຕ່າງໆ.
ຜ່ານການຮຽນ-ການສອນໃນ 4 ວັນດັ່ງກ່າວເຫັນວ່າ ບັນດາສຳມະນາກອນມີຄວາມເອົາໃຈໃສ່ໄດ້ຕັ້ງໃຈເຂົ້າຮ່ວມ ແລະ ຮັບຟັງການບັນຍາຍຂອງວິທະຍາກອນດ້ວຍຄວາມຮັບຜິດຊອບສູງ ເຊິ່ງສະແດງອອກ ມີການແລກປ່ຽນຄວາມຄິດຄວາມເຫັນ ຕັ້ງຄຳຖາມຂຶ້ນມາແລກປ່ຽນ ແລະ ບັນຫາທີ່ຍັງບໍ່ທັນເຂົ້າໃຈເນື້ອໃນເອກະສານທີ່ມາສິດສອນ ໃນບົດລາຍງານດັ່ງກ່າວ ຍັງໄດ້ສັງເກດຕີລາຄາ ແລະ ຈັດລະດັບຂອງການຂຶ້ນນຳສະເໜີ ແລະ ທົດສອບຕົວຈິງຂອງສຳມະນາກອນແຕ່ລະສະຫາຍ ເຊິ່ງສະແດງອອກມີລະດັບ ດີເລີດ ໄດ້ຄະແນນ A ຈຳນວນ 19 ຄົນ, ດີຫຼາຍ ໄດ້ຄະແນນ B+ ຈຳນວນ 4 ຄົນ, ດີ ໄດ້ຄະແນນ B ຈໍານວນ 1 ຄົນ ແລະ ພໍໃຊ້ ໄດ້ຄະແນນ C+ ຈຳນວນ 2 ຄົນ.
ໃນຕອນທ້າຍຂອງພິທີ ສະຫາຍ ຄຳສອນ ສຸເທບມະນີ ໄດ້ມີຄຳເຫັນໂອ້ລົມ ໂດຍສະຫາຍໄດ້ຍົກໃຫ້ເຫັນໄລຍະຜ່ານມາ, ຄະນະຈັດຕັ້ງສູນກາງພັກ ໄດ້ມີຄວາມເອົາໃຈໃສ່ ແລະ ພະຍາຍາມໃນການບໍາລຸງສ້າງພະນັກງານ-ລັດຖະກອນພາຍໃນ ຄຈສພ ດ້ວຍຫຼາຍຮູບແບບ, ນັບທັງການສ້າງຄູຝຶກໃນຄັ້ງນີ້ ແຕ່ຖ້າທຽບໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ແລ້ວກໍ່ຍັງເຫັນວ່າບໍ່ທັນຕອບສະໜອງໄດ້ດີເທົ່າທີ່ຄວນ; ດັ່ງນັ້ນ ການຝຶກອົບຮົມຄັ້ງນີ້ ແມ່ນການຍົກລະດັບຂຶ້ນອີກກ້າວໜຶ່ງ ທັງເປັນການສ້າງຄວາມໝັ້ນໃຈ, ສ້າງທັກສະການເປັນຄູຝຶກທີ່ດີໃຫ້ແກ່ພະນັກງານຄະນະຈັດຕັ້ງສູນກາງພັກພວກເຮົາ ເພາະຍັງເຫັນວ່າຄວາມຕ້ອງການດ້ານຄູຝຶກແມ່ນນັບມື້ເພີ່ມຂຶ້ນ ທັງຢູ່ສູນກາງກະຊວງ-ອົງການ ແລະ ທ້ອງຖິ່ນ ເພື່ອຮັບປະກັນການຂາດດູນດ້ານຄູຝຶກໃນຕໍ່ໜ້າ ແຕ່ຖ້າພວກເຮົາສ້າງວິທະຍາກອນໄດ້ດີ ຜົນໄດ້ຮັບໃນວຽກງານຈັດຕັ້ງ, ກໍ່ສ້າງພັກ ແລະ ປັບປຸງກົງຈັກການຈັດຕັ້ງພະນັກງານຢູ່ຂັ້ນສູນກາງກະຊວງ-ອົງການ ແລະ ທ້ອງຖິ່ນກໍ່ຈະມີຄວາມເຂັ້ມແຂງ ແລະ ມີການພັດທະນາທີ່ດີຂຶ້ນກວ່າເກົ່າ. ສະຫາຍ ຍັງໄດ້ເນັ້ນວິທະຍາກອນທັງໝົດຕື່ມວ່າ ພາຍຫຼັງສຳເລັດການຝຶກອົບຮົມໃນຄັ້ງນີ້ແລ້ວ ຂໍຮຽກຮ້ອງມາຍັງສຳມະນາກອນແຕ່ລະສະຫາຍ ຈົ່ງນຳເອົາບົດຮຽນທີ່ໄດ້ຮັບໃນຄັ້ງນີ້ໄປໝູນໃຊ້ເຂົ້າໃນວຽກງານຕົວຈິງ ແລະ ວຽກງານວິຊາສະເພາະ ຂອງແຕ່ລະສະຫາຍໃຫ້ມີຜົນສຳເລັດ ແລະ ມີປະສິດທິພາບສູງຂຶ້ນກວ່າເກົ່າ...ຯ
