ໂດຍ: ພອນສະຫວັນ ລາຊະບັນເທົາ

     ໃນວັນທີ 13 ທັນວາ 2024 ທີ່ຫ້ອງປະຊຸມ ຄະນະຈັດຕັ້ງສູນກາງພັກ ໄດ້ມີພິທີຮັບສະມາຊິກພັກສົມບູນຂອງ ໜ່ວຍພັກກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ຈຳນວນ 3 ສະຫາຍ, ຍິງ 1 ສະຫາຍ; ໃຫ້ກຽດເປັນປະທານໂດຍ ສະຫາຍ ສຸລິຍາ ພົມມີສິດ ຮອງເລຂາໜ່ວຍພັກ, ຮອງຫົວໜ້າກົມຄຸ້ມຄອງພະນັກງານ, ມີສະຫາຍ ວຽນທອງ ສິງຄຳພັນ ຄະນະພັກ, ຫົວໜ້າຫ້ອງການ ຄະນະຈັດຕັ້ງສູນກາງພັກ, ມີຄະນະໜ່ວຍພັກ, ບັນດາສະຫາຍຕາງໜ້າໜ່ວຍພັກອ້ອມຂ້າງ, ຕາງໜ້າ 3 ອົງການຈັດຕັ້ງມະຫາຊົນ ແລະ ສະມາຊິກພັກພາຍໃນໜ່ວຍພັກເຂົ້າຮ່ວມຢ່າງພ້ອມພຽງ.

     ໃນພິທີດັ່ງກ່າວ ສະຫາຍ ມານະສິນ ລັບຫຼ່ຽມແສງ ຫົວໜ້າພະແນກບໍລິຫາມ-ສັງລວມ ກົມຄຸ້ມຄອງພະນັກງານ ຕາງໜ້າໄດ້ຂຶ້ນຜ່ານມະຕິຕົກລົງ ຂອງຄະນະພັກຄະນະຈັດຕັ້ງສູນກາງພັກ ວ່າດ້ວຍການຮັບສະມາຊິກພັກສຳຮອງເລື່ອນເປັນສະມາຊິກພັກສົມບູນ, ຈາກນັ້ນ ສະຫາຍຮອງເລຂາໜ່ວຍພັກກົມຄຸ້ມຄອງພະນັກງານ ໄດ້ມີຄໍາເຫັນ ແລະ ມອບຂໍ້ຕົກລົງໃຫ້ບັນດາສະຫາຍສະມາຊິກພັກສົມບູນ ເພື່ອສືບຕໍ່ຝຶກຝົນຫຼໍ່ຫຼອມກໍ່ສ້າງຕົນເອງໃຫ້ເປັນກຳລັງແຮງໃນການປະຕິບັດໜ້າທີ່ການເມືອງໃນຕໍ່ໜ້າ.

     ຕອນທ້າຍພິທີ ສະຫາຍ ວຽນທອງ ສິງຄຳພັນ ໄດ້ມີຄໍາເຫັນໂອ້ລົມຕໍ່ພິທີດັ່ງກ່າວ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ບັນດາສະມາຊິກພັກສົມບູນໃໝ່ ທີ່ໄດ້ຝຶກຝົນຫຼໍ່ຫຼອມຕົນເອງຕະຫຼອດໄລຍະສະໄໝສຳຮອງ 12 ເດືອນ, ໄດ້ເນັ້ນໃຫ້ຜູ້ກ່ຽວສືບຕໍ່ກໍ່ສ້າງ ແລະ ຝຶກຝົນຫຼໍ່ຫຼອມຕົນເອງ ໃນການຄົ້ນຄວ້າຮໍ່າຮຽນ, ກໍາແໜ້ນແນວທາງນະໂຍບາຍຂອງພັກ ແລະ ກົດໝາຍຂອງລັດ, ພ້ອມທັງຈັດຕັ້ງປະຕິບັດໜ້າທີ່ການເມືອງ ແລະ ວຽກງານທີ່ໄດ້ຮັບມອບໝາຍຢ່າງຫ້າວຫັນ, ພັດທະນາຕົນເອງໃນທຸກດ້ານ, ສ້າງຕົນເອງໃຫ້ກາຍເປັນສະມາຊິກພັກສົມບູນທີ່ມີຄຸນນະພາບ, ເປັນກໍາລັງແຮງຊ່ວຍວຽກໜ່ວຍພັກ, ປະຕິບັດກົດລະບຽບຂອງພັກ ທີ່ໄດ້ກຳນົດໄວ້ມີ 14 ໝວດ, 58 ມາດຕາຢ່າງ​ເຂັ້ມ​ງວດ, ພ້ອມນັ້ນ ຕ້ອງຮັກສາໄດ້ບົດບາດຄວາມເປັນແບບຢ່າງນຳໜ້າຂອງສະມາຊິກພັກຢ່າງມີປະສິດທິພາບ ແລະ ປະສິດທິຜົນສູງ.