ໂດຍ: ພິດສະໄໝ

        ວັນທີ 20 ພະຈິກ 2025 ຢູ່ທີ່ຄະນະຈັດຕັ້ງສູນກາງພັກ (ຫຼັກ 6) ໄດ້ຈັດພິທີປະດັບຫຼຽນກາລະນຶກ 50 ປີ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ (2 ທັນວາ 1975-2 ທັນວາ 2025) ໃຫ້ແກ່ສະມາຊິກພັກ, ພະນັກງານບຳນານ ແລະ ພະນັກງານ-ລັດຖະກອນ ຄະນະຈັດຕັ້ງສູນກາງພັກ. ໃຫ້ກຽດເຂົ້າຮ່ວມຂອງສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຄະນະພັກ ຄະນະຈັດຕັ້ງສູນກາງພັກ, ການນຳຂັ້ນກົມ, ຂັ້ນພະແນກ ແລະ ພະນັກງານອາວຸໂສບຳນານ ເຂົ້າຮ່ວມຢ່າງພ້ອມພຽງ.

         ເພື່ອຫວນຄືນເຖິງວັນມະຫາໄຊ ຈິດວິນຍານແຫ່ງການປະຕິວັດຊາດປະຊາທິປະໄຕ ລະນຶກເຖິງຜົນງານ ແລະ ການເສຍສະຫຼະອັນຍິ່ງໃຫຍ່ຂອງປະທານ ໄກສອນ ພົມວິຫານ, ປະທານ ສຸພານຸວົງ, ບັນດາຜູ້ນຳ, ນັກຮົບປະຕິວັດ, ວິລະຊົນ, ສະມາຊິກພັກ-ພະນັກງານ ຕະຫຼອດຮອດປະຊາຊົນລາວບັນດາເຜົ່າ ທີ່ໄດ້ອຸທິດຕົນໃຫ້ແກ່ພາລະກິດຕໍ່ສູ້ກູ້ຊາດຢ່າງພິລະອາດຫານ ຈົນສາມາດຍາດໄດ້ເອກະລາດແຫ່ງຊາດ, ປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975. ພິທີປະດັບຫຼຽນກາລະນຶກ 50 ປີ ຄັ້ງນີ້ ພະນັກງານທີ່ຮັບຫຼຽນ ມີຈຳນວນ ທັງໝົດ 188 ສະຫາຍ, ຍິງ 68 ສະຫາຍ, ພະນັກງານປະຈຳການ 124 ສະຫາຍ, ຍິງ 46 ສະຫາຍ ແລະ ພະນັກງານບຳນານ 64 ສະຫາຍ, ຍິງ 22 ສະຫາຍ. ບັນດາສະຫາຍທີ່ໄດ້ຮັບຫຼຽນລະນຶກຄັ້ງນີ້ ລ້ວນແລ້ວແຕ່ແມ່ນຜູ້ທີ່ມີຜົນງານ, ຄຸນງາມຄວາມດີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດໄລຍະຜ່ານມາ.