ໂດຍ: ລັດດາວັນ
ໃນວັນທີ 25 ມັງກອນ 2022 ຢູ່ທີ່ສຳນັກງານຄະນະຈັດຕັ້ງສູນກາງພັກ, ສະຫາຍ ນ. ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕ້ອນຮັບການຢ້ຽມຂໍ່ານັບຂອງ ທ່ານ ໂຄບາຢາຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ຜູ້ໃໝ່ ພ້ອມດ້ວຍຄະນະ.
ໃນໂອກາດນີ້ ທັງສອງຝ່າຍໄດ້ປຶກສາຫາລືກັນ ເພື່ອສືບຕໍ່ວຽກງານການຮ່ວມມືຊ່ວຍເຫລືອກັນທາງດ້ານການພັດທະນາເສດຖະກິດ-ສັງຄົມ ແລະ ການຝຶກອົບຮົມດ້ານວິຊາການຕ່າງໆ ໃຫ້ແກ່ພະນັກງານນຳພາ-ຄຸ້ມຄອງຂອງລາວ ໃນຂັ້ນຄະນະກົມຂອງກະຊວງ-ອົງການ ແລະ ຂັ້ນຄະນະພະແນກຂອງແຂວງ ແລະ ເມືອງ ໃນຂອບເຂດທົ່ວປະເທດ, ໂດຍສະເພາະການຝຶກອົບຮົມໃຫ້ພະນັກງານການນຳຂັ້ນສູງຂອງລາວ ຂັ້ນຮອງລັດຖະມົນຕີ-ທຽບເທົ່າ, ຮອງເລຂາພັກແຂວງ, ຮອງເຈົ້າແຂວງ ທີ່ມີອາຍຸຍັງໜຸ່ມ.
ຄະນະຈັດຕັ້ງສູນກາງພັກ ໄດ້ເປັນໃຈກາງໃນການປະສານສົມທົບກັບສະຖານທູດຍີ່ປຸ່ນປະຈຳ ສປປ ລາວ, ອົງການໄຈກາ ປະຈຳ ສປປ ລາວ, ຫ້ອງການໃຫຍ່ອົງການໄຈກາ ທີ່ນະຄອນໂຕກຽວ ປະເທດຍີ່ປຸ່ນ ແລະ ສະຖາບັນຄົ້ນຄວ້າແຜນນະໂຍບາຍແຫ່ງຊາດ ຍີ່ປຸ່ນ ຂຽນເປັນໂຄງການນຳສະເໜີຂັ້ນເທິງຂອງທັງສອງຝ່າຍ ເພື່ອຮັບເອົາທຶນຊ່ວຍເຫລືອລ້າຂອງຍີ່ປຸ່ນ ໂດຍຜ່ານອົງການໄຈກາ ປະຈຳ ສປປ ລາວ ມາຈັດຕັ້ງປະຕິບັດເປັນ : ໂຄງການຝຶກອົບຮົມຫົວຂໍ້ສະເພາະພະນັກງານການນຳ, ເຊິ່ງໃນປີ 2017 ໄດ້ທົດລອງຈັດຊຸດຝຶກອົບຮົມ 1 ຊຸດ; ຈາກນັ້ນ, ສອງຝ່າຍຮ່ວມກັນປະເມີນຜົນໄດ້ຮັບຂອງການຝຶກອົບຮົມ ແລ້ວຈຶ່ງສືບຕໍ່ສ້າງເປັນໂຄງການໄລຍະ 3 ປີ (2019-2021). ໄລຍະແຕ່ປີ 2017-2019 ໄດ້ຊັບຊ້ອນເອົາພະນັກງານນຳພາ-ຄຸ້ມຄອງຂັ້ນສູງ, ຮອງເລຂາ-ຮອງລັດຖະມົນຕີ, ຮອງເລຂາ-ຮອງເຈົ້າແຂວງ, ຫົວໜ້າກົມ, ຮອງກົມ ໄປຝຶກອົບຮົມຫົວຂໍ້ສະເພາະ ໄລຍະ 12 ວັນ ແລະ ໄລຍະ 7 ວັນ ຈຳນວນ 45 ສະຫາຍ, ຍິງ 10 ສະຫາຍ. ນອກຈາກນັ້ນ ຍັງໄດ້ກຳນົດທິດທາງແຜນການຮ່ວມມືໃນຕໍ່ໜ້າ ໂດຍຈະໄດ້ສືບຕໍ່ຈັດຊຸດຝຶກອົບຮົມຫົວຂໍ້ສະເພາະໃຫ້ພະນັກງານການນຳ ແລະ ພະນັກງານນຳພາ-ຄຸ້ມຄອງ ໄລຍະ 7-10 ວັນ, ປີລະ 1-2 ຊຸດ, ຊຸດລະ 15-20 ສະຫາຍ; ເນື້ອໃນເລັ່ງໃສ່ຂະແໜງກະສິກຳ, ການທ່ອງທ່ຽວ ແລະ ອື່ນໆ ທີ່ເຫັນວ່າສຳຄັນຈຳເປັນສຳລັບ ສປປ ລາວ, ສືບຕໍ່ສັບຊ້ອນເອົາພະນັກງານໜຸ່ມຮຸ່ນສືບທອດ ທີ່ເຮັດວຽກຢູ່ຂົງເຂດການເມືອງ ໄປແລກປ່ຽນບົດຮຽນຢູ່ປະເທດຍີ່ປຸ່ນໄລຍະ 5-7 ວັນ, ປີລະ 1 ຊຸດ, ຊຸດລະ 10-15 ສະຫາຍ ຕາມຄວາມເໝາະສົມ.
ໃນໂອກາດດັ່ງກ່າວ ສະຫາຍ ນ. ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານ ໂຄບາຢາຊິ ເຄັນອິຈິ ທີ່ໄດ້ຖືກແຕ່ງຕັ້ງມາປະຕິບັດໜ້າທີ່ ດຳລົງຕໍາແໜ່ງເປັນເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ຜູ້ໃໝ່ ຊຶ່ງຈະເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ຍີ່ປຸ່ນໃຫ້ຂະຫຍາຍຕົວຍິ່ງໆຂຶ້ນ.
