ພາບ ແລະ ຂ່າວໂດຍ: ບານ ມູນປະເສີດ
ວັນທີ 26 ກໍລະກົດ 2023 ທີ່ສໍານັກງານຄະນະຈັດຕັ້ງສູນກາງພັກ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕ້ອນຮັບ ສະຫາຍ ຈ່ຽງຈ່າຍຕົງ ເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ ພ້ອມຄະນະ. ຈຸດປະສົງການເຂົ້າຢ້ຽມຂ່ຳນັບຄັ້ງນີ້ ແມ່ນເພື່ອອຳລາ ແລະ ລາຍງານຜົນສໍາເລັດໃນໂອກາດເຮັດໜ້າທີ່ການທູດຢູ່ ສປປ ລາວ ເຊິ່ງຈະສິ້ນສຸດໃນຕົ້ນເດືອນສິງຫາ 2023 ນີ້.
ໃນໂອກາດດັ່ງກ່າວ ສະຫາຍ ນາງ ສີໃສ ລືເດດມູນສອນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ສະຫາຍ ຈ່ຽງຈ່າຍຕົງ ເອກອັກຄະລັດຖະທູດ ທີ່ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ. ສະຫາຍຫົວໜ້າຄະນະຈັດຕັ້ງສູນກາງພັກ ຍັງໄດ້ຢັ້ງຢືນເຖິງສາຍພົວພັນ, ຄວາມສາມັກຄີແບບພິເສດ ແລະ ສະແດງຄວາມຂອບໃຈຕໍ່ການຮ່ວມມື, ການຊ່ວຍເຫຼືອຂອງລັດຖະບານ ແລະ ປະຊາຊົນ ສປ ຈີນ ໃນໄລຍະຜ່ານມາ ບໍ່ວ່າທາງດ້ານວັດຖຸ ແລະ ຈິດໃຈ ທີ່ໄດ້ປະກອບສ່ວນສຳຄັນເຂົ້າໃນການພັດທະນາຊັບພະຍາກອນມະນຸດ ກໍຄືບຸກຄະລາກອນຕະຫຼອດຮອດການພັດທະນາເສດຖະກິດ-ສັງຄົມຂອງ ສປປ ລາວ ໄດ້ຮັບການພັດທະນາດີຂຶ້ນເທື່ອລະກ້າວ ແລະ ຫວັງຢ່າງຍິ່ງວ່າ ໃນຕໍ່ໜ້າລັດຖະບານ ສປ ຈີນ ຈະໃຫ້ການຮ່ວມມື, ສະໜັບສະໜູນ ແລະ ຊ່ວຍເຫຼືອ ສປປ ລາວ ສືບຕໍ່ໄປ. ເຫດການຄັ້ງນີ້ ໄດ້ເປັນນິມິດໝາຍອັນດີໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ ລາວ-ຈີນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ, ໂດຍສະເພາະການພົວພັນຮ່ວມມືຂອງສອງຝ່າຍໃນຂະແໜງການຕ່າງໆ. ໄລຍະຜ່ານມາເຫັນວ່າມີການສືບຕໍ່ເພີ່ມທະວີຂຶ້ນເລື້ອຍໆ, ໃນນັ້ນໄດ້ກວມເອົາຫຼາຍຂົງເຂດບໍ່ວ່າດ້ານການຄ້າ, ການລົງທຶນ, ການທ່ອງທ່ຽວ, ການສຶກສາ, ການພັດທະນາຊັບພະຍາກອນມະນຸດ, ສາທາລະນະສຸກ, ການພັດທະນາພື້ນຖານໂຄງລ່າງ ແລະ ອື່ນໆ. ພ້ອມກັນນີ້, ທັງສອງຝ່າຍ ຍັງຈະໄດ້ສືບຕໍ່ຮ່ວມມືແລກປ່ຽນຂໍ້ມູນກ່ຽວກັບວຽກງານກົງຈັກການຈັດຕັ້ງໃນລະບົບການເມືອງໂດຍສະເພາະ ວຽກງານຈັດຕັ້ງ, ກໍ່ສ້າງພັກ-ພະນັກງານ.
ພ້ອມນີ້, ສະຫາຍ ຈ່ຽງຈ່າຍຕົງ ເອກອັກຄະລັດຖະທູດ ແຫ່ງ ສປ ຈີນ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້ ແລະ ພ້ອມທີ່ຈະສືບຕໍ່ໃຫ້ຄວາມຮ່ວມມືໃຫ້ດີທີ່ສຸດ ເພື່ອປະກອບສ່ວນເພີ່ມພູນສາຍພົວພັນມິດຕະພາບອັນເປັນມູນເຊື້ອດີງາມ, ຄວາມສາມັກຄີ ແລະ ການຮ່ວມມືລະຫວ່າງສອງຊາດ ລາວ ແລະ ສປ ຈີນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ…ຯ
