ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ຫົວໜ້າຄະນະຈັດຕັ້ງສູນກາງພັກ ຕ້ອນຮັບການເຂົ້າຢ້ຽມຂໍ່ານັບອຳລາໜ້າທີ່ ແລະ ສະເໜີຕົວ ຂອງຫົວໜ້າອົງການຮ່ວມມືສາກົນຍີ່ປຸ່ນ ປະຈຳ ສປປ ລາວ (ຜູ້ເກົ່າ) ແລະ (ຜູ້ໃໝ່)
ຈຳນວນຜູ້ອ່ານ: 118
ອະນຸມັດວັນທີ: 28/03/2024

ຂ່າວ: ວິລະສະໄໝ, ພາບ: ອານຸລັກ

     ໃນວັນທີ 15 ມີນາ 2024, ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ນາກາເຊ ໂທສິໂອະ ຫົວໜ້າອົງການຮ່ວມມືສາກົນ ຍີ່ປຸ່ນ (ໄຈ່ກ່າ) ປະຈຳ ສປປ ລາວ ທີ່ຫ້ອງຮັບແຂກຂອງຄະນະຈັດຕັ້ງສູນກາງພັກ, ພາຍຫລັງສໍາເລັດການປະຕິບັດໜ້າທີ່ ໃນທ້າຍເດືອນ ກຸມພາ 2024.

     ໃນໂອກາດດັ່ງກ່າວ ສະຫາຍ ນ. ສີໃສ ລືເດດມູນສອນ ໄດ້ສະແດງຄວາມຍິນດີຕ້ອນຮັບຄະນະຂອງອົງການຮ່ວມມືສາກົນຍີ່ປຸ່ນ ປະຈຳ ສປປ ລາວ ແລະ ໄດ້ທົບທວນສະພາບການຈັດຕັ້ງປະຕິບັດໂຄງການທີ່ຂື້ນກັບຄວາມຮັບຜິດຊອບຂອງຄະນະຈັດຕັ້ງສູນກາງພັກ ໂດຍສະເພາະແມ່ນໂຄງການຝຶກອົບຮົມຍົກລະດັບຂີດຄວາມສາມາດໃຫ້ພະນັກງານນຳພາ-ຄຸ້ມຄອງຂອງລາວ ຜົນສຳເລັດດັ່ງກ່າວຝ່າຍລາວໄດ້ຕີລາຄາສູງຕໍ່ໝາກຜົນຂອງການຊ່ວຍເຫຼືອຈາກອົງການຮ່ວມມືສາກົນຍີ່ປຸ່ນ ກໍຄືລັດຖະບານຍີ່ປຸ່ນ, ຕາງໜ້າໃຫ້ການນຳພັກ-ລັດຖະບານ ແລະ ປະຊາຊົນລາວ ສະຫາຍ ໄດ້ສະແດງຄວາມຂອບໃຈຕໍ່​ລັດ​ຖະ​ບານ ​ກໍ່​ຄື​ປະ​ຊາ​ຊົນ​ຍີ່​ປຸ່ນ ທີ່​ໄດ້​ໃຫ້​ການ​ຊ່ວຍ​ເຫຼືອ ສປ​ປ ລາວ ໄລ​ຍະ​ຜ່ານ​ມາ ແລະ ເຊື່ອໝັ້ນວ່າ ຄະນະຈະສືບຕໍ່ໃຫ້ການຮ່ວມມືສົ່ງເສີມສາຍພົວພັນອັນດີງາມ ລະຫວ່າງສອງປະເທດ ຍີ່​ປຸ່ນ-ລາວ ໃຫ້ຈະເລີນງອກງາມຍິ່ງໆຂຶ້ນ; ພ້ອມທັງອວຍພອນໃຫ້ທ່ານ ນາກາເຊ ໂທສິໂອະ ປະສົບຜົນສຳເລັດໃນໜ້າທີ່ໃໝ່.

     ໂອ​ກາດນີ້ ທ່ານ ນາກາເຊ ໂທສິໂອະ ກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ພັກ​-ລັດ​ຖະ​ບານ​ ແລະ ປະ​ຊາ​ຊົນລາວ ​ທີ່​ໃຫ້ການ​ຕ້ອນ​ຮັບ​ອັນ​ອົບ​ອຸ່ນ ແລະ ໃຫ້​ຄວາມ​ຮ່ວມ​ມື-ອຳ​ນວຍ​ຄວາມ​ສະ​ດວກ​ຕະ​ຫຼອດໄລ​ຍະ​ຂອງ​ການ​ປະ​ຕິ​ບັດ​ໜ້າ​ທີ່​ວຽກ​ງານຢູ່ ສ​ປ​ປ ລາວ ແລະ ມີ​ຄວາມ​ພາກ​ພູມ​ໃຈຕໍ່ຜົນ​ສຳ​ເລັດ​ໃນ​ການ​ພົວ​ພັນຮ່ວມ​ມືຂອງສອງ​ຝ່າຍ. ພ້ອມນີ້ ຍັງໄດ້ສະເໜີຕົວ ຫົວໜ້າອົງການຮ່ວມມືສາກົນ ຍີ່ປຸ່ນ ປະຈຳ ສປປ ລາວ ຜູ້ໃໝ່ ຄືທ່ານ ນາງ ມີຢາໂກະ ໂຄບາຢາຊິ (ຊາກູໂດ) ທີ່ຈະສືບຕໍ່ປະຕິບັດໜ້າທີ່ຕະລອດໄລຍະການດຳລົງຕຳແໜ່ງຢູ່ ສປປ ລາວ.