ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ຫົວໜ້າຄະນະຈັດຕັ້ງສູນກາງພັກ ຕ້ອນຮັບທູດຍີ່ປຸ່ນເຂົ້າອຳລາໜ້າທີ່
ຈຳນວນຜູ້ອ່ານ: 66
ອະນຸມັດວັນທີ: 08/05/2024

ຂ່າວ: ວິລະສະໄໝ ຍົດບຸນມີ, ພາບ: ບານ ມູນປະເສີດ

     ໃນຕອນບ່າຍວັນທີ 6 ພຶດສະພາ 2024, ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັັບອຳລາຂອງທ່ານ ໂຄບາຢາຊິ ເຄັນອິຈິ ເອກອັກຄະຣາຊະທູດຍີ່​ປຸ່ນ ປະຈຳ ສ​ປ​ປ ລາວ ທີ່ຫ້ອງຮັບແຂກຂອງຄະນະຈັດຕັ້ງສູນກາງພັກ, ພາຍຫຼັງສຳ​ເລັດປະຕິບັດໜ້າທີ່ການທູດ ຢູ່ ສປປ ລາວ.

     ໃນໂອກາດດັ່ງກ່າວ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ສະແດງຄວາມຍິນດີຕໍ່ທ່ານ ໂຄບາຢາຊິ ເຄນອິຈິ ເອກອັກຄະຣາຊະທູດຍີ່​ປຸ່ນ ປະຈຳ ສ​ປ​ປ ລາວ ທີ່ໄດ້ສຳເລັດໜ້າທີ່ການທູດຢູ່ ສປປ ລາວ ເຊິ່ງຕະຫຼອດໄລຍະທີ່ຜ່ານມາ ທ່ານໄດ້ເຮັດໜ້າທີ່ການທູດ ຢູ່ ສປປ ລາວ ກໍ່ແມ່ນຜູ້ໜຶ່ງທີ່ຫ້າວຫັນໃນການເຄື່ອນໄຫວປະສານສົມທົບ ຊຸກຍູ້ ຢູ່ສູນກາງ ແລະ ທ້ອງຖິ່ນ ປະກອບສ່ວນໃນການພົວພັນຮ່ວມມືຂອງສອງລັດຖະບານໃຫ້ເກີດໝາກຜົນຕົວຈິງໃນຫຼາຍດ້ານ, ເປັນໃຈກາງປະສານງານລະຫວ່າງ ຄະນະຈັດຕັ້ງສູນກາງພັກ ກັບອົງການຮ່ວມມືສາກົນຢີປຸ່ນ (ໄຈ່ກ່າ) ປະຈຳ ສປປ ລາວ  ໃນການພົວພັນການຝຶກອົບຮົມໂຄງການຕ່າງໆ ມີຜົນສຳເລັດຕາມແຜນການທີ່ວາງໄວ້. ຕາງໜ້າໃຫ້ການນຳພັກ-ລັດຖະບານ ແລະ ປະຊາຊົນລາວ ຂໍສະແດງຄວາມຂອບໃຈຕໍ່​ລັດ​ຖະ​ບານ ​ກໍ່​ຄື​ປະ​ຊາ​ຊົນ​ຍີ່​ປຸ່ນທີ່​ໄດ້​ໃຫ້​ການ​ຊ່ວຍ​ເຫຼືອ ສປ​ປ ລາວ ໄລ​ຍະ​ຜ່ານ​ມາ ແລະ ເຊື່ອໝັ້ນວ່າ ທ່ານທູດພ້ອມດ້ວຍຄະນະຈະສືບຕໍ່ໃຫ້ການຮ່ວມມືສົ່ງເສີມສາຍພົວພັນການ​ທູດອັນດີງາມ ລະຫວ່າງສອງປະເທດຍີ່​ປຸ່ນ-ລາວ ໃຫ້ຈະເລີນງອກງາມຍິ່ງໆຂຶ້ນ, ພ້ອມທັງອວຍພອນໃຫ້ທ່ານ ໂຄບາຢາຊິ ເຄັນອິຈິ ປະສົບຜົນສຳເລັດໃນໜ້າທີ່ໃໝ່.

     ໂອ​ກາດນີ້ ທ່ານເອກອັກຄະຣາຊະທູດຍີ່​ປຸ່ນກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ພັກ​-ລັດ​ຖະ​ບານ​ ແລະ ປະ​ຊາ​ຊົນລາວ ​ທີ່​ໃຫ້ການ​ຊ່ວຍເຫຼືອ ແລະ ສະໜັບສະໜູນ ອຳ​ນວຍ​ຄວາມ​ສະ​ດວກ​ຕະ​ຫຼອດໄລ​ຍະ​ຂອງ​ການ​ປະ​ຕິ​ບັດ​ໜ້າ​ທີ່​ວຽກ​ງານຢູ່ ສປປ ລາວ ແລະ ມີ​ຄວາມ​ພາກ​ພູມ​ໃຈຕໍ່ຜົນ​ສຳ​ເລັດ​ໃນ​ການ​ພົວ​ພັນຮ່ວມ​ມືຂອງສອງ​ຝ່າຍ.