ໂດຍ: ວິລະສະໄໝ
ໃນວັນທີ 18 ກໍລະກົດ 2024 ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ນາງ ຟັ່ງຫົງ (FANG HONG) ເອກອັກຄະລັດຖະທູດແຫ່ງສາທາລະນະລັດປະຊາຊົນຈີນ ຄົນໃໝ່ ປະຈຳ ສປປ ລາວ ພ້ອມດ້ວຍຄະນະ.
ໃນໂອກາດນີ້, ສະຫາຍ ນາງ ສີໃສ ລືເດດມູນສອນ ໄດ້ກ່າວສະແດງຄວາມຍິນດີຕ້ອນຮັບສະຫາຍ ນາງ ຟັ່ງຫົງ ພ້ອມດ້ວຍຄະນະ ພ້ອມທັງຊົມເຊີຍຕໍ່ຜົນສຳເລັດກອງປະຊຸມໃຫຍ່ຄັ້ງທີ 3 ຂອງຄະນະກໍາມະການສູນກາງພັກກອມມູນິດຈີນ ສະໄໝທີ XX ແລະ ສະແດງຄວາມຂອບໃຈຕໍ່ການຮ່ວມມື, ການຊ່ວຍເຫຼືອຂອງລັດຖະບານ ແລະ ປະຊາຊົນຈີນ ທີ່ໄດ້ປະກອບສ່ວນສຳຄັນເຂົ້າໃນການພັດທະນາຊັບພະຍາກອນມະນຸດ ຕະຫຼອດຮອດການພັດທະນາເສດຖະກິດ-ສັງຄົມຂອງ ສປປ ລາວ ພ້ອມທັງຍິນດີຮ່ວມມືກັບ ສປ ຈີນ ເພື່ອເພີ່ມທະວີການຮ່ວມມືລະຫວ່າງບັນດາອົງການ ແລະ ພະແນກການຂອງສອງພັກ ແລະ ຄະນະກຳມະການສູນກາງ ຕາມການຊີ້ນຳຂອງການນຳຂັ້ນສູງຂອງທັງສອງຝ່າຍ ເພື່ອຊຸກຍູ້ການກໍ່ສ້າງປະຊາຄົມຮ່ວມມືໃນອະນາຄົດລະຫວ່າງລາວ-ຈີນຢ່າງເລິກເຊິ່ງ ແລະ ແທດຕົວຈິງ; ຖືໂອກາດນີ້ ອວຍພອນແດ່ສະຫາຍພ້ອມດ້ວຍຄະນະຈົ່ງມີສຸຂະພາບແຂງແຮງ ແລະ ເຮັດສຳເລັດໜ້າທີ່ອັນສະຫງ່າງາມຂອງບັນດາສະຫາຍ.
ໃນໂອກາດນີ້ ສະຫາຍ ນາງ ຟັ່ງຫົງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍຫົວໜ້າຄະນະຈັດຕັ້ງສູນກາງພັກ ແລະ ຊົມເຊີຍຕໍ່ການປະກອບສ່ວນອັນສຳຄັນຂອງຄະນະຈັດຕັ້ງສູນກາງພັກປະຊາຊົນປະຕິວັດລາວ ໃນການເພີ່ມທະວີການແລກປ່ຽນ ແລະ ການຮ່ວມມືລະຫວ່າງ ສປ ຈີນ ແລະ ສປປ ລາວ ພ້ອມທັງລາຍງານກ່ຽວກັບສະພາບການຕົ້ນຕໍຂອງກອງປະຊຸມໃຫຍ່ຄັ້ງທີ 3 ຂອງຄະນະກໍາມະການສູນກາງພັກກອມມູນິດຈີນ ສະໄໝທີ XX ແລະ ສະແດງຄວາມຍິນດີເພີ່ມທະວີການພົວພັນຮ່ວມມືລະຫວ່າງສອງພັກ-ສອງລັດ ກໍ່ຄືການພົວພັນສະໜິດແໜ້ນລະຫວ່າງສອງປະເທດ ຈີນ-ລາວ, ລາວ-ຈີນ, ການພົວພັນຮ່ວມມືແລກປ່ຽນບົດຮຽນຂອງຄະນະຜູ້ແທນການນໍາຂັ້ນສູງຂອງສອງພັກ, ການແລກປ່ຽນບົດຮຽນການປົກຄອງປະເທດ ແລະ ການບໍລິຫານລັດ, ເພີ່ມທະວີການຮ່ວມມືດ້ານວຽກງານຄົ້ນຄວ້າທິດສະດີ, ການຜັດປ່ຽນກັນເປັນເຈົ້າພາບຈັດກອງປະຊຸມສຳມະນາທິດສະດີຂອງສອງພັກ, ເພີ່ມທະວີການຄົ້ນຄວ້າ-ແລກປ່ຽນບົດຮຽນດ້ານທິດສະດີ ແລະ ພຶດຕິກໍາຕົວຈິງ ເພື່ອສົ່ງເສີມບົດບາດການນໍາພາຂອງພັກສູງເດັ່ນຂຶ້ນ ແລະ ທັງເປັນການສຶກສາອົບຮົມປະຊາຊົນ ໃຫ້ເຂົ້າໃຈແນວທາງຂອງພັກ-ລັດ ໃຫ້ຫຼາຍຂຶ້ນ.
