ໂດຍ: ລັດດາວັນ ສີຫານຸວົງ

        ໃນວັນທີ 12 ກັນຍາ 2024 ທີ່ສຳນັກງານຄະນະຈັດຕັ້ງສູນກາງພັກ ປປ ລາວ, ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມ ນໍາໂດຍສະຫາຍ ຟານ ທັງ ອານ ຮອງຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ໃນໂອກາດທີ່ໄດ້ເດີນທາງມາເຮັດວຽກ ພົບປະແລກປ່ຽນບົດຮຽນວິຊາສະເພາະ ຢູ່ ສປປ ລາວ ແຕ່ວັນທີ 10-12 ກັນຍາ 2024.

        ໃນໂອກາດດັ່ງກ່າວ, ສະຫາຍ ຟານ ທັງ ອານ ຮອງຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ໄດ້ແຈ້ງຜົນການເຄື່ອນໄຫວເຮັດວຽກຢູ່ ສປປ ລາວ ຂອງຄະນະໂດຍສັງເຂບ ແລະ ໄດ້ສະແດງຄວາມຂອບໃຈຕໍ່ສະຫາຍ ນາງ ສີໃສ ລືເດດມູນສອນ ພ້ອມດ້ວຍຄະນະ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ຈິງໃຈຖານສະຫາຍເພື່ອນມິດອ້າຍນ້ອງ ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືຮອບດ້ານຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ກໍ່ຄືສອງຄະນະຈັດຕັ້ງສູນກາງພັກ ເຊິ່ງເປັນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.

        ໂອກາດນີ້, ສະຫາຍ ນາງ ສີໃສ ລືເດດມູນສອນ ໄດ້ສະແດງຄວາມຊົມເຊີຍຕໍ່ການມາພົບປະແລກປ່ຽນບົດຮຽນວິຊາສະເພາະ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບອັນເປັນມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ໃຫ້ນັບມື້ກ້າວເຂົ້າສູ່ລວງເລິກ. ສະຫາຍໄດ້ຕີລາຄາສູງຕໍ່ຜົນສຳເລັດອັນໃຫຍ່ຫຼວງ ແລະ ຮອບດ້ານ ໃນພາລະກິດການສ້າງສາພັດທະນາປະເທດຊາດທີ່ ພັກ-ລັດ ແລະ ປະຊາຊົນສອງຊາດອ້າຍນ້ອງ ຍາດມາໄດ້ຕະຫຼອດໄລຍະຜ່ານມາ. ພ້ອມນີ້ ກໍ່ໄດ້ອວຍພອນໃຫ້ຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມ ປະສົບຜົນສໍາເລັດໃນການມາເຄື່ອນໄຫວເຮັດວຽກຢູ່ ສປປ ລາວ ຄັ້ງນີ້ ແລະ ເດີນທາງກັບຄືນ ສສ ຫວຽດນາມ ດ້ວຍຄວາມສະຫວັດດິພາບ.