ໂດຍ: ລັດດາວັນ
ໃນລະຫວ່າງວັນທີ 10-12 ກັນຍາ 2024 ຄະນະຜູ້ແທນຂັ້ນສູງຂອງຄະນະຈັດຕັ້ງສູນກາງພັກກອມມູນິດຫວຽດນາມ ນຳໂດຍ ສະຫາຍ ຟານ ທັງ ອານ ຮອງຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ພ້ອມດ້ວຍຄະນະ 6 ສະຫາຍ ໄດ້ເດີນທາງມາຢ້ຽມຢາມ-ເຮັດວຽກ ຢູ່ ສປປ ລາວ.
ໃນຕອນເຊົ້້າ ວັນທີ 10 ກັນຍາ 2024 ຄະນະຜູ້ແທນດັ່ງກ່າວເດີນທາງມາຮອດ ສປປ ລາວ; ຕອນບ່າຍ ໄດ້ພົບປະແລກປ່ຽນບົດຮຽນດ້ານວິຊາການກ່ຽວກັບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ທາງດ້ານທິດສະດີ ແລະ ພຶດຕິກໍາ ກັບ ຄະນະຈັດຕັ້ງສູນກາງພັກ ປປ ລາວ ຢ່າງເປັນທາງການ ຢູ່ທີ່ສໍານັກງານຄະນະຈັດຕັ້ງສູນກາງພັກ ປປ ລາວ ເຊິ່ງຝ່າຍລາວນໍາໂດຍສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ປປ ລາວ.
ການພົບປະຂອງສອງຝ່າຍ ເຕັມໄປດ້ວຍບັນຍາກາດທີ່ສະໜິດສະໜົມ ສະແດງໃຫ້ເຫັນເຖິງໄມຕີຈິດມິດຕະພາບອັນດູດດື່ມ, ໝົດຈິດໝົດໃຈ, ຄວາມສາມັກຄີຮັກແພງແບບພິເສດຖານສະຫາຍອ້າຍ-ນ້ອງ ເຊິ່ງທັງສອງຝ່າຍໄດ້ແຈ້ງສະພາບການທີ່ພົ້ນເດັ່ນໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ກໍຄືການສ້າງສາພັດທະນາປະເທດຊາດຂອງຕົນໃຫ້ກັນຊາບ ເວົ້າລວມ, ເວົ້າສະເພາະ ແມ່ນການເປັນເສນາທິການໃຫ້ຄະນະບໍລິຫານງານສູນກາງພັກ, ກົມການເມືອງສູນກາງພັກ, ຄະນະເລຂາທິການສູນກາງພັກ ກ່ຽວກັບວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ.
ທັງສອງຝ່າຍໄດ້ຍົກບັນຫາທີ່ຕົນສົນໃຈມາແລກປ່ຽນບົດຮຽນເຊິ່ງກັນແລະກັນ ເປັນຕົ້ນແມ່ນບົດຮຽນໃນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ການປະຕິບັດບັນດາຂໍ້ຫ້າມສະມາຊິກພັກ ທີ່ເປັນພະນັກງານການນໍາຂັ້ນສູງ; ບົດຮຽນການນໍາພາຂອງການຈັດຕັ້ງຮາກຖານພັກ ຢູ່ຂົງເຂດລັດວິສາຫະກິດ, ການປັບປຸງໂຄງສ້າງດ້ານການຈັດຕັ້ງ ແລະ ກົນໄກການຄຸ້ມຄອງລັດວິສາຫະກິດ ໃຫ້ມີປະສິດທິຜົນ ສອດຄ່ອງກັບການນໍາພາຂອງພັກ; ການແກ້ໄຂບັນຫາປະກົດການຫຍໍ້ທໍ້ ໃນຖັນແຖວພະນັກງານ, ສະມາຊິກພັກ ທີ່ລະເມີດຂໍ້ຫ້າມຂອງສະມາຊິກພັກ, ການກະກຽມບົດລາຍງານ ສະຫຼຸບ-ສັງລວມວຽກງານກໍ່ສ້າງພັກ ແລະ ບັນຫາອື່ນໆທີ່ມີການແລກປ່ຽນບົດຮຽນລົງເລິກລາຍລະອຽດສະເພາະດ້ານ ລະຫວ່າງກົມວິຊາການຕ່າງຫາກ.
ໃນວັນທີ 11 ກັນຍາ 2024 ຄະນະຜູ້ແທນ ໄດ້ເດີນທາງໄປພົບປະແລກປ່ຽນບົດຮຽນກັບຄະນະນຳຂອງແຂວງຫຼວງພະບາງ ໃຫ້ກຽດຕ້ອນຮັບໂດຍ ສະຫາຍ ບຸນເຫຼື່ອມ ມະນີວົງ ຄະນະປະຈຳພັກແຂວງ ຮອງເຈົ້າແຂວງຫຼວງພະບາງ ພ້ອມດ້ວຍຄະນະ ແລະ ທ່ຽວຊົມສະຖານທີ່ທ່ອງທ່ຽວວັດທະນະທຳຈຳນວນໜຶ່ງ ແລະ ເດີນທາງກັບນະຄອນຫຼວງວຽງຈັນ ໃນຕອນຄໍ່າຂອງວັນດຽວກັນ.
ໃນຕອນເຊົ້າວັນທີ 12 ກັນຍາ 2024 ໄດ້ມີກອງປະຊຸມພົບປະແລກປ່ຽນບົດຮຽນກັບບັນດາກົມວິຊາການກ່ຽວຂ້ອງຂອງສອງຝ່າຍ ຢູ່ທີ່ສໍານັກງານຄະນະຈັດຕັ້ງສູນກາງພັກ ປປ ລາວ; ໂດຍໄດ້ຮັບການມອບໝາຍຈາກຫົວໜ້າຄະນະ ຝ່າຍລາວ ນໍາໂດຍ ສະຫາຍ ວຽນທອງ ສິງຄໍາພັນ ກໍາມະການຄະນະບໍລິຫານງານພັກ ຄະນະຈັດຕັ້ງສູນກາງພັກ ປປ ລາວ, ຫົວໜ້າຫ້ອງການ ພ້ອມດ້ວຍຫົວໜ້າກົມ-ຮອງກົມທີ່ກ່ຽວຂ້ອງເຂົ້າຮ່ວມ, ຝ່າຍຫວຽດນາມ ນໍາໂດຍ ສະຫາຍ ວູ໋ ແທັງ ເຊິນ ກໍາມະການຄະນະບໍລິຫານງານພັກ ຄະນະຈັດຕັ້ງສູນກາງພັກກອມມູນິດຫວຽດນາມ, ຫົວໜ້າກົມກໍ່ສ້າງ ບໍາລຸງພະນັກງານ ພ້ອມດ້ວຍຄະນະ. ທັງສອງຝ່າຍມີຄວາມສົນໃຈແລກປ່ຽນບົດຮຽນວິຊາສະເພາະກ່ຽວກັບຂັ້ນຕອນການປັບປຸງກົງຈັກການຈັດຕັ້ງ ແລະ ກົດລະບຽບພັກ, ການກໍ່ສ້າງພັກ (ການຈັດຕັ້ງຮາກຖານພັກ ແລະ ສະມາຊິກພັກ), ການເປັນເສນາທິການໃນການຄົ້ນຄວ້າ ສະເໜີດັດ ແກ້ ປັບປຸງກົດລະບຽບພັກ ຕໍ່ກອງປະຊຸມໃຫຍ່ຂອງພັກ ຄັ້ງທີ XI, ການກະກຽມບັນດາເອກະສານໃຫ້ແກ່ກອງປະຊຸມໃຫຍ່ຂອງພັກ ຄັ້ງທີ XII ມີຄວາມພ້ອມແນວໃດ?, ການບໍາລຸງ-ກໍ່ສ້າງພະນັກງານ ແລະ ການເປັນເສນາທິການວຽກງານໂຄສະນາແນວທາງການຈັດຕັ້ງຂອງພັກ.
ພາຍຫຼັງພົບປະແລກປ່ຽນບົດຮຽນວິຊາສະເພາະນໍາກົມວິຊາການກ່ຽວຂ້ອງແລ້ວ ຄະນະຜູ້ແທນດັ່ງກ່າວ ໄດ້ເຂົ້າຢ້ຽມຂໍ່ານັບສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ປປ ລາວ ເພື່ອລາຍງານຜົນການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ ຄັ້ງນີ້ ເຊິ່ງຫົວໜ້າຄະນະຈັດຕັ້ງສູນກາງພັກ ໄດ້ສະແດງຄວາມຊົມເຊີຍຕໍ່ການມາພົບປະແລກປ່ຽນບົດຮຽນວິຊາສະເພາະ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມໃນຄັ້ງນີ້ ອັນເປັນການປະກອບສ່ວນສຳຄັນເຂົ້າໃນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ໃຫ້ນັບມື້ແຕກດອກອອກຜົນຍິ່ງໆຂຶ້ນ ພ້ອມທັງໄດ້ຕີລາຄາສູງຕໍ່ຜົນສຳເລັດອັນໃຫຍ່ຫຼວງ ແລະ ຮອບດ້ານ ໃນພາລະກິດການສ້າງສາພັດທະນາປະເທດຊາດທີ່ ພັກ-ລັດ ແລະ ປະຊາຊົນສອງຊາດອ້າຍນ້ອງ ຍາດມາໄດ້ຕະຫຼອດໄລຍະຜ່ານມາ. ໃນຕອນບ່າຍຂອງວັນດຽວກັນນີ້ ຄະນະຜູ້ແທນດັ່ງກ່າວ ໄດ້ໄປທ່ຽວຊົມສະຖານທີ່ທ່ອງທ່ຽວວັດທະນະທຳ ໃນນະຄອນຫຼວງວຽງຈັນຈຳນວນໜຶ່ງ ແລະ ໃນຕອນຄໍ່າໄດ້ເດີນທາງກັບນະຄອນຫຼວງຮ່າໂນ້ຍ ສສ ຫວຽດນາມ ດ້ວຍຄວາມສະຫວັດດິພາບ.
ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເພື່ອທົບທວນຄືນຜົນການຈັດຕັ້ງຜັນຂະຫຍາຍເນື້ອໃນບົດບັນທຶກຊ່ວຍຈຳທີ່ສອງຄະນະຈັດຕັ້ງສູນກາງພັກ ລາວ-ຫວຽດນາມ ໄດ້ລົງນາມຮ່ວມກັນ ຄັ້ງວັນທີ 04/01/2022 ແລະ ພົບປະແລກປ່ຽນບົດຮຽນວິຊາສະເພາະວຽກງານຈັດຕັ້ງຂອງສອງພັກ; ການພົບປະລະຫວ່າງສອງຄະນະຈັດຕັ້ງສູນກາງພັກ ໄດ້ສ້າງເງື່ອນໄຂໃຫ້ແກ່ສອງຝ່າຍ ໄດ້ມີໂອກາດແລກປ່ຽນບົດຮຽນວິຊາສະເພາະຂອງຕົນ ທັງເປັນການເພີ່ມພູນຄູນສ້າງສາຍພົວພັນ, ການຮ່ວມມື ລະຫວ່າງ ສອງຄະນະຈັດຕັ້ງສູນກາງພັກ ທີ່ເປັນມູນເຊື້ອອັນມີຄວາມໝາຍຄວາມສຳຄັນ, ສືບທອດກັນມາຈາກຜູ້ນຳຮຸ່ນກ່ອນ ຈົນຮອດຜູ້ນຳຮຸ່ນປະຈຸບັນ, ເປັນການຢັ້ງຢືນເຖິງຄວາມສາມັກຄີ, ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ທາງດ້ານວິຊາການ ຂອງສອງຄະນະຈັດຕັ້ງສູນກາງພັກ ໃນການປະຕິບັດພາລະບົດບາດການເປັນເສນາທິການໃຫ້ແກ່ສູນກາງພັກ, ກົມການເມືອງ ແລະ ຄະນະເລຂາທິການສູນກາງພັກ, ທັງສອງຄະນະຈັດຕັ້ງສູນກາງພັກ ໄດ້ຖອດຖອນບົດຮຽນຈາກປະສົບການຕົວຈິງຂອງສອງປະເທດ ກ່ຽວກັບວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກການຈັດຕັ້ງ ເພື່ອມາແລກປ່ຽນບົດຮຽນ ແລະ ໝູນໃຊ້ເຂົ້າໃນວຽກງານຕົວຈິງຕາມເງື່ອນໄຂ ແລະ ທ່າແຮງບົ່ມຊ້ອນຂອງແຕ່ລະປະເທດ ເພື່ອເຮັດໃຫ້ວຽກງານບັນລຸຕາມຄາດໝາຍຂອງສອງປະເທດ ໄດ້ວາງໄວ້.
