ພາບ ແລະ ຂ່າວໂດຍ: ສ.ສົດໃສ
ໃນວັນທີ 27 ທັນວາ 2024 ທີ່ສຳນັກງານຄະນະຈັດຕັ້ງສູນກາງພັກ, ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍພະນັກງານກົມກ່ຽວຂ້ອງຈຳນວນໜຶ່ງ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ຫຼິວ ໜານ ຮອງຫົວໜ້າຄະນະຈັດຕັ້ງ, ຫົວໜ້າກົມຄຸ້ມຄອງລັດຖະກອນ ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ພ້ອມດ້ວຍຄະນະ ໃນໂອກາດທີ່ຄະນະຜູ້ແທນ ດັ່ງກ່າວ ມາເຄື່ອນໄຫວເຮັດວຽກປາຖະກະຖາຢູ່ ສປປ ລາວ ໃນລະຫວ່າງວັນທີ 23-27 ທັນ ວາ 2024.
ໃນໂອກາດດັ່ງກ່າວ ທ່ານ ຫຼິວ ໜານ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຈິງໃຈ ມາຍັງທ່ານ ຫົວໜ້າຄະນະຈັດຕັ້ງສູນກາງພັກ ພ້ອມທັງໄດ້ແລກປ່ຽນຂໍ້ມູນກ່ຽວກັບການເພີ່ມທະວີການຮ່ວມມືທຸກຂົງເຂດວຽກງານໃນຕໍ່ໜ້າ ໂດຍສະເພາະ ການຮ່ວມມືທາງດ້ານການພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນສອງຊາດ ລາວ-ຈີນ, ຈີນ-ລາວ ຕິດພັນກັບວຽກງານຈັດຕັ້ງ, ກໍ່ສ້າງພັກ-ພະນັກງານທີ່ສອງຝ່າຍສົນໃຈ ເພື່ອປະກອບສ່ວນເພີ່ມທະວີສາຍພົວພັນແບບຄູ່ຮ່ວມຍຸດທະສາດຮອບດ້ານ, ໝັ້ນຄົງ, ຍາວນານ ຕາມທິດ 4 ດີ ຄືເປັນເພື່ອນບ້ານໃກ້ຄຽງທີ່ດີ, ເປັນເພື່ອນມິດທີ່ດີ, ເປັນສະຫາຍທີ່ດີ ແລະ ເປັນຄູ່ຮ່ວມມືທີ່ດີ ໃຫ້ເຂົ້າສູ່ລວງເລິກ ແລະ ນັບມື້ເກີດດອກອອກຜົນຍິ່ງຂຶ້ນ.
ໃນຕອນທ້າຍ ທ່ານ ນາງ ສີໃສ ລືເດດມູນສອນ ໄດ້ສະແດງຄວາມຍິນດີຕ້ອນຮັບ ຄະນະຜູ້ແທນ ແລະ ຕີລາຄາສູງຕໍ່ການມາເຄື່ອນໄຫວເຮັດວຽກ ຢູ່ ສປປ ລາວໃນຄັ້ງນີ້ ເພື່ອຮັດແໜ້ນຄວາມສາມັກຄີລະຫວ່າງສອງປະເທດໃຫ້ນັບມື້ແໜ້ນແຟ້ນ ພ້ອມນີ້ ກໍ່ໄດ້ສະແດງຄວາມເຊື່ອໝັ້ນຕໍ່ ຄະນະຜູ້ແທນເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ຈະສືບຕໍ່ໃຫ້ການຮ່ວມມືປະກອບສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງ ສອງຊາດລາວ-ຈີນ, ຈີນ-ລາວ ໃຫ້ນັບມື້ນັບກ້າວເຂົ້າສູ່ລວງເລິກ ແລະ ມີປະສິດທິຜົນສູງຍິ່ງໆຂຶ້ນ.
