ພາບ ແລະ ຂ່າວໂດຍ: ບານ ມູນປະເສີດ
ໃນວັນທີ 27 ຕຸລາ 2025 ທີ່ສຳນັກງານຄະນະຈັດຕັ້ງສູນກາງພັກ, ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ຫຼີວ ເພີງເຟີຍ ຮອງຫົວໜ້າຜູ້ປະຈຳການ ສະຖາບັນກໍ່ສ້າງພະນັກງານປາຍເຊີ້ກວາງຊີ ພ້ອມດ້ວຍຄະນະ ໃນໂອກາດທີ່ຄະນະຊ່ຽວຊານດັ່ງກ່າວ ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 27-31 ຕຸລາ 2025.
ໃນໂອກາດດັ່ງກ່າວ ສະຫາຍ ຫຼີວ ເພີງເຟີຍ ໄດ້ລາຍງານຈຸດປະສົງໃນການມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ແມ່ນເພື່ອຢ້ຽມຢາມແລກປ່ຽນບົດຮຽນ ແລະ ດໍາເນີນການປາຖະກະຖາໃນຫົວຂໍ້ “ທິດສະດີ ແລະ ພຶດຕິກຳຕົວຈິງຂອງຄວາມທັນສະໄໝແບບຈີນ” ພ້ອມທັງໄດ້ແລກປ່ຽນຂໍ້ມູນຕ່າງໆ ກ່ຽວກັບການເພີ່ມທະວີການຮ່ວມມືຮອບດ້ານໃນທຸກຂົງເຂດວຽກງານ, ເວົ້າລວມ, ເວົ້າສະເພາະ ແມ່ນການຮ່ວມມືທາງດ້ານການພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນສອງຊາດ ລາວ-ຈີນ, ຈີນ-ລາວ ຕິດພັນກັບວຽກງານຈັດຕັ້ງ, ກໍ່ສ້າງພັກ-ພະນັກງານ ທັງເປັນການເພີ່ມທະວີສາຍພົວພັນຮ່ວມມື ແບບຄູ່ຮ່ວມຍຸດທະສາດຮອບດ້ານ ໃຫ້ເຂົ້າສູ່ລວງເລິກ ແລະ ນັບມື້ເກີດດອກອອກຜົນ ຢ່າງເປັນຮູບປະທໍາ.
ສະຫາຍ ນາງ ສີໃສ ລືເດດມູນສອນ ໄດ້ສະແດງຄວາມຍິນດີຕ້ອນຮັບ ຄະນະຊ່ຽວຊານ ຈາກ ສປ ຈີນ ແລະ ຕີລາຄາສູງຕໍ່ການມາເຄື່ອນໄຫວເຮັດວຽກ ຢູ່ ສປປ ລາວ ຄັ້ງນີ້ ເຊິ່ງເປັນການຮັດແໜ້ນຄວາມສາມັກຄີລະຫວ່າງສອງປະເທດໃຫ້ນັບມື້ແໜ້ນແຟ້ນ. ພ້ອມນີ້ ກໍ່ໄດ້ສະແດງຄວາມເຊື່ອໝັ້ນຕໍ່ຄະນະຊ່ຽວຊານຈາກເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ຈະສືບຕໍ່ປະກອບສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງ ສອງຊາດ ລາວ-ຈີນ, ຈີນ-ລາວ ໃຫ້ນັບມື້ແໜ້ນແຟ້ນ ແລະ ມີປະສິດທິຜົນຂຶ້ນເລື້ອຍໆ.
