ພາບ: ວິລະສະໄໝ, ບານ ມູນປະເສີດ; ຂ່າວໂດຍ: ສ.ສົດໃສ
ວັນທີ 27 ກຸມພາ 2023 ທີ່ສະໂມສອນ ຄະນະຈັດຕັ້ງສູນກາງພັກ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປີ 2022 ແລະ ທິດທາງແຜນການປະຈໍາ ປີ 2023 ຂອງສະຫະພັນກຳມະບານ ຄະນະຈັດຕັ້ງສູນກາງພັກ ແລະ ປະຖະກະຖາ ວັນສ້າງຕັ້ງສະຫະພັນກຳມະບານ ຄົບຮອບ 67 ປີ (1 ກຸມພາ 1956 - 1 ກຸມພາ 2023) ໂດຍການເປັນປະທານຂອງສະຫາຍ ຄູນເພັງ ໄຊສະຫວາດ ປະທານສະຫະພັນກຳມະບານ ຄະນະຈັດຕັ້ງສູນກາງພັກ, ຮອງຫົວໜ້າກົມກໍ່ສ້າງພັກ. ເປັນກຽດເຂົ້າຮ່ວມຂອງສະຫາຍ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ, ສະຫາຍ ວິໄລ ວົງຂະເສີມ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ສະຫາຍ ຄຳປ່ຽນ ແກ້ວສໍລະສິງ ຄະນະພັກ ຫົວໜ້າກົມກົງຈັກການຈັດຕັ້ງ ແລະ ກົດລະບຽບພັກ ຜູ້ຊ່ວຍຊີ້ນຳສະຫະພັນກຳມະບານ ຄະນະຈັດຕັ້ງສູນກາງພັກ, ມີບັນດາຄະນະບໍລິຫານງານສະຫະພັນກຳມະບານ ຄະນະຈັດຕັ້ງສູນກາງພັກ, ສະມາຊິກສະຫະພັນ ກຳມະບານຮາກຖານແຕ່ລະໜ່ວຍທີ່ຂຶ້ນກັບຄະນະຈັດຕັ້ງສູນກາງພັກເຂົ້າຮ່ວມທັງໝົດ 153 ສະຫາຍ, ຍິງ 64 ສະຫາຍ.
ກອງປະຊຸມຄັ້ງນີ້ ໄດ້ຮັບຟັງບົດສະຫຼຸບ, ຕີລາຄາການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງສະຫະພັນກຳມະບານ ຄະນະຈັດຕັ້ງສູນກາງພັກ ປະຈຳປີ 2022 ແລະ ຜ່ານທິດທາງແຜນການ ປີ 2023 ສະເໜີໂດຍສະຫາຍ ຄູນເພັງ ໄຊສະຫວາດ ເຊິ່ງເນື້ອໃນບົດສະຫຼຸບໄດ້ສ່ອງແສງໃຫ້ເຫັນເຖິງຜົນສຳເລັດໃນຫຼາຍດ້ານ ທີ່ຄະນະບໍລິຫານງານສະຫະພັນກຳມະບານ ຄະນະຈັດຕັ້ງສູນກາງພັກ ເປັນຕົ້ນເອົາໃຈໃສ່ຕໍ່ວຽກງານການເມືອງ-ແນວຄິດເປັນກົກ, ການປະຕິບັດກົດໝາຍ ແລະ ລະບຽບການຂອງລັດ, ການພັດທະນາຕົນເອງ ແລະ ການຈັດຕັ້ງ, ການປົກປ້ອງສິດ ແລະ ຜົນປະໂຫຍດອັນຊອບທຳ ແລະ ການປະຕິບັດໜ້າທີ່ວິຊາສະເພາະຢ່າງປະດິດສ້າງຂອງບັນດາສະມາຊິກກຳມະບານຮາກຖານແຕ່ລະໜ່ວຍ ເຫັນໄດ້ສະມາຊິກກໍາມະບານມີຄວາມຮັບຮູ້, ເຂົ້າໃຈ, ກໍາແໜ້ນຕໍ່ເນື້ອໃນເອກະສານ, ຮັບຮູ້ແນວທາງນະໂຍບາຍ ແລະ ເຊື່ອໝັ້ນຕໍ່ການນໍາພາຂອງພັກ-ລັດ, ຮັກສາໄດ້ຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການຈັດຕັ້ງ, ຮັກສາໄດ້ມູນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ຕັ້ງໜ້າບຸກບືນປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ມີຜົນສໍາເລັດ ເຊິ່ງໃນ 1 ປີຜ່ານມາສະມາຊິກກຳມະບານໄດ້ຮັບການສັບຊ້ອນ, ຈັດວາງ ແລະ ເລື່ອນຕຳແໜ່ງບໍລິຫານ ຈຳນວນ 29 ສະຫາຍ, ຍິງ 11 ສະຫາຍ, ໄດ້ປະຕິບັດນະໂຍບາຍແກ່ສະມາຊິກກຳມະບານເຈັບເປັນເຂົ້າໂຮງໝໍ ຈຳນວນ 4 ສະຫາຍ. ໄດ້ແບ່ງເບົາໃຫ້ຄອບຄົວຂອງ ສະມາຊິກກຳມະບານທີ່ເສຍຊີວິດ ຈຳນວນ 3 ຄັ້ງ ແລະ ມອບເງິນຊ່ວຍເຫຼືອ ໄພພິບັດທຳມະຊາດຢູ່ແຂວງອຸດົມໄຊ ຈຳນວນ 500.000 ກີບ. ຈາກນັ້ນ, ໄດ້ຮັບຟັງການຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຂະບວນການແຂ່ງຂັນ 5 ເປັນເຈົ້າ ປະຈຳປີ 2023, ຜ່ານເນື້ອໃນຂໍ້ແຂ່ງຂັນ 5 ເປັນເຈົ້າ ເຊິ່ງມີຜູ້ຕາງໜ້າກຳມະບານຮາກຖານ ທັງໝົດ 9 ໜ່ວຍ ທີ່ຂຶ້ນກັບສະຫະພັນກຳມະບານ ຄະນະຈັດຕັ້ງສູນກາງພັກໄດ້ຂຶ້ນຈັບມືເພື່ອເປີດບັ້ນຂໍ້ແຂ່ງຂັນ 5 ເປັນເຈົ້າ.
ໃນຕອນທ້າຍຂອງກອງປະຊຸມ ສະຫາຍ ວິໄລ ວົງຂະເສີມ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ ໄດ້ໃຫ້ກຽດປະຖະກະຖາເລົ່າມູນເຊື້ອປະຫວັດແຫ່ງການເຕີບໃຫຍ່ຂະ ຫຍາຍຕົວຂອງສະຫະພັນກຳມະບານລາວ, ຜົນງານອັນພົ້ນເດັ່ນແຕ່ລະໄລຍະການຕໍ່ສູ້ກູ້ຊາດກໍ່ຄືປົກປັກ ຮັກສາ ແລະ ສ້າງສາພັດທະນາປະເທດຊາດ ເຊິ່ງສະແດງໃຫ້ເຫັນໃນໄລຍະທີ່ຜ່ານມາ ຕະຫຼອດ 67 ປີ ພ້ອມທັງ ມີຄຳເຫັນໂອ້ລົມເພື່ອເປັນທິດຊີ້ນຳໃຫ້ແກ່ສະຫະພັນກຳມະບານ ຄະນະຈັດຕັ້ງສູນກາງພັກ ໃນການເຄື່ອນໄຫວຕາມພາລະບົດບາດໜ້າທີ່ຂອງຕົນສຳເລັດເປັນກ້າວໆ.
