ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
3 ອົງການຈັດຕັ້ງມະຫາຊົນ ຄຈສພ ຈັດກິດຈະກຳໄປທັດສະນະສຶກສາ ຢູ່ແຂວງຄຳມ່ວນ
ຈຳນວນຜູ້ອ່ານ: 128
ອະນຸມັດວັນທີ: 27/03/2024

ພາບ: ອານຸລັກ ຈິດຕິລາດ; ຂ່າວ: ສ.ສົດໃສ

        ເພື່ອສ້າງຂະບວນການຂໍ່ານັບຮັບຕ້ອນ ແລະ ຮ່ວມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ (22/3/1955 - 22/3/2024), ວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 69 ປີ (25/3/1955 - 25/3/2024), ວັນສ້າງຕັ້ງສະຫະພັນກຳມະບານລາວ ຄົບຮອບ 68 ປີ (1/2/1956 - 1/2/2024), ວັນແມ່ຍິງສາກົນ ຄົບຮອບ 114 ປີ (8/3/1910 - 8/3/2024), ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 69 ປີ (14/4/1955 – 14/4/2024) ແລະ ວັນເກີດປະທານ ຄໍາໄຕ ສີພັນດອນ ຄົບຮອບ 100 ປີ (8/2/1914 - 8/2/2024).

        ໃນລະຫວ່າງວັນທີ 22-24 ມີນາ 2024 ສາມອົງການຈັດຕັ້ງມະຫາຊົນ ຄະນະຈັດຕັ້ງສູນກາງພັກ  ນໍາພາໂດຍທ່ານ ນາງ ສີບານ ສີສະອາດ ກຳມະການຄະນະພັກ ຄະນະຈັດຕັ້ງສູນກາງພັກ, ຜູ້ຊີ້ນຳສະຫະພັນແມ່ຍິງຄະນະຈັດຕັ້ງສູນກາງພັກ, ມີທ່ານ ພອນສະຫວັນ ໄຊຊະນະ ກຳມະການຄະນະພັກ ຄະນະຈັດຕັ້ງສູນກາງພັກ, ຜູ້ຊີ້ນຳຄະນະຊາວໜຸ່ມ ຄະນະຈັດຕັ້ງສູນກາງພັກ, ມີຄະນະບໍລິຫານງານ ພ້ອມດ້ວຍສະມາຊິກສາມອົງການຈັດຕັ້ງມະຫາຊົນ ທັງໝົດ 58 ສະຫາຍ, ຍິງ 20 ສະຫາຍ ໄດ້ເດີນທາງໄປທັດສະນະສຶກສາຮ່ອງຮອຍປະຫວັດສາດຢູ່ແຂວງຄຳມ່ວນ ໂດຍການຕ້ອນຮັບຂອງທ່ານ ສາຍຄຳ ພະໄຊສິດທິເດດ ກຳມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງຄຳມ່ວນ ພ້ອມດ້ວຍຄະນະບໍລິຫານງານ ແລະ ສະມາຊິກ ສາມອົງການຈັດຕັ້ັ້ງມະຫາຊົນແຂວງຄຳມ່ວນ.

        ການໄປທັດສະນະຢ້ຽມຢາມ ແລະ ເຮັດວຽກຢູ່ແຂວງຄຳມ່ວນໃນຄັ້ງນີ້, ຄະນະໄດ້ເຂົ້າວາງກະຕ່າດອກໄມ້, ຂໍ່ານັບ-ບູຊາ ສະແດງຄວາມເຄົາລົບຮັກ, ກະຕັນຍູ ຮູ້ບຸນຄຸນ ຜົນງານ ຄຸນງາມຄວາມດີ ນໍ້າໃຈພິລະອາດຫານຂອງປະທານ ສຸພານຸວົງ ທີ່ອະນຸສອນສະຖານປະທານ ສຸພນຸວົງ ແຂວງຄຳມ່ວນ, ຈາກນັ້ນ ໄດ້ໄປທັດສະນະຢ້ຽມຊົມຫໍລະນຶກມູນເຊື້ອ 21 ມີນາ ແລະ ເຂົ້າກາບໄຫວ້ສັກກາລະບູຊາພະທາດເມືອງເກົ່າສີໂຄດຕະບອງ ຢູ່ເມືອງທ່າແຂກ, ຢ້ຽມຊົມເຂດອະນຸສອນສະຖານປະທານ ໂຮ່ຈີມິນ ຢູ່ບ້ານຊຽງຫວາງ ເມືອງໜອງບົກ ແຂວງຄຳມ່ວນ ເຊິ່ງເປັນອີກໜຶ່ງໃນສະຖານທີ່ສຳຄັນທາງປະຫວັດສາດການເມືອງ ໃນໄລຍະປະທານ ໂຮ່ຈີມິນ ມາເຄື່ອນໄຫວປະຕິວັດຊອກຫາຊ່ອງທາງປົດປ່ອຍຊາດ, ເຂດດັ່ງກ່າວຍັງເປັນບ່ອນເຜີຍແຜ່ກ່ຽວກັບຊີວິດ ແລະ ພາລະກິດອັນຍິ່ງໃຫຍ່ຂອງປະທານ ໂຮ່ຈີມິນ ໃນຂະບວນວິວັດແຫ່ງການກໍ່ຕັ້ງ ແລະ ບຳລຸງສ້າງ, ເສີມຂະຫຍາຍມູນເຊື້ອແຫ່ງສາຍພົວພັນມິດຕະພາບ ແລະ ຄວາມສາມັກຄີພິເສດສອງຊາດລາວ-ຫວຽດນາມ, ຫວຽດນາມ-ລາວ ໃຫ້ສວຍສົດງົດງາມຕະຫຼອດມາ.

        ນອກຈາກການໄປທັດສະນະສຶກສາ ຢ້ຽມຊົມສະຖານທີ່ສຳຄັນຄືດັ່ງກ່າວແລ້ວ ຍັງໄດ້ຈັດໃຫ້ມີຂະບວນການແຂ່ງຂັນກິລາມິດຕະພາບ ເພື່ອຮັດແໜ້ນຄວາມສາມັກຄີ ແລະ ສືບຕໍ່ກໍ່ສ້າງເສີມຂະຫຍາຍມູນເຊື້ອອັນດີງາມຂອງ 3 ອົງການຈັດຕັ້ງມະຫາຊົນທັງສອງພາກສ່ວນ ໃຫ້ໜັກແໜ້ນ ເຂັ້ມແຂງຍິ່ງໆຂຶ້ນ.

        ໃນໂອກາດໄປທັດສະນະສຶກສາຄັ້ງນີ້ ຄະນະຍັງໄດ້ວາງກະຕ່າດອກໄມ້ ຢູ່ຕໍ່ໜ້າຮູບຫຼໍ່ຂອງທ່ານ ສີສົມພອນ ລໍວັນໄຊ ເຂດເທດສະບານເມືອງປາກຊັນ ແຂວງບໍລິຄຳໄຊ ເພື່ອຂໍ່ານັບ ແລະ ລະນຶກເຖິງຜົນງານ-ຄຸນງາມຄວາມດີຂອງທ່ານ ສີສົມພອນ ລໍວັນໄຊ ໃນນາມເປັນອະດີດຫົວໜ້າຄະນະຈັດຕັ້ງສູນກາງພັກ ແລະ ເປັນບິດາແຫ່ງວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ເຊິ່ງຜູ້ທີ່ເຮັດວຽກງານຈັດຕັ້ງຄວນໄດ້ຄົ້ນຄວ້າສຶກສາຮໍ່າຮຽນ ແລະ ສືບທອດເສີມຂະຫຍາຍພາລະກິດທີ່ເພີ່ນສ້າງມາສູ່ຮຸ່ນຄົນຕໍ່ໆໄປ.