ໂດຍ: ແສງຄຳ ຈິິດຕະວົງ

     ເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 69 ປີ, ໃນວັນທີ 12 ກໍລະກົດ 2024 ທີ່ສະໂມສອນຄະນະຈັດຕັ້ງສູນກາງພັກ ໄດ້ຈັດຝຶກອົບຮົມ ແລະ ເຜີຍແຜ່ “ແນວຄິດ ປະທານ ໄກສອນ ພົມວິຫານ ກ່ຽວກັບອົງການຈັດຕັ້ງສະຫະພັນແມ່ຍິງ ແລະ ການອະນຸລັກມູນເຊື້ອວັດທະນະທຳ” ໃຫ້ແກ່ສະມາຊິກສະຫະພັນແມ່ຍິງຄະນະຈັດຕັ້ງສູນກາງພັກ ໂດຍການເປັນປະທານຂອງສະຫາຍ ນາງ ສີບານ ສີສະອາດ ກໍາມະການພັກ ຄະນະຈັດຕັ້ງສູນກາງພັກ ຜູ້ຊ່ວຍຊີ້ນຳວຽກອົງການຈັດຕັ້ງສະຫະພັນແມ່ຍິງ ຄຈສພ, ມີສະຫາຍ ນາງ ບົວສະຫວັນ ອິນທິສານ ຮອງຫົວໜ້າກົມໂຄສະນາ ແລະ ວັດທະນະທຳ ທັງເປັນວິທະຍາກອນທີ່ມາຈາກສູນກາງສະຫະພັນແມ່ຍິງລາວ, ມີສະຫາຍ ນາງ ວິໄລ ອຸ່ນມີໄຊ ປະທານສະຫະພັນແມ່ຍິງ ຄຈສພ, ມີຕາງໜ້າບັນດາກົມ, ຕາງໜ້າບັນດາອົງການຈັດຕັ້ງມະຫາຊົນ, ຄະນະບໍລິຫານງານ ແລະ ສະຫະຊິກສະຫະພັນແມ່ຍິງ ຄະນະຈັດຕັ້ງສູນກາງພັກ ເຂົ້າຮ່ວມທັງໝົດ 71 ສະຫາຍ, ຍິງ 64 ສະຫາຍ.

     ໃນກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການເຜີຍແຜ່ 3 ເອກະສານ ຄື: “ແນວຄິດປະທານໄກສອນ ພົມວິຫານ ກ່ຽວກັບອົງການຈັດຕັ້ງສະຫະພັນແມ່ຍິງລາວ”, “ການອະນຸລັກ ແລະ ສົ່ງເສີມມູນເຊື້ອວັດທະນະທຳອັນດີງາມຂອງແມ່ຍິງລາວ”, “ດຳລັດ ແລະ ຄຳແນະນຳວ່າດ້ວຍຊຸດເຄື່ອງນຸ່ງປະຈຳຊາດ” ສະເໜີໂດຍສະຫາຍ ນາງ ບົວສະຫວັນ ອິນທິສານ ເຊິ່ງໄດ້ຍົກໃຫ້ເຫັນເຖິງການກຳເນີດ, ການເຕີບໃຫຍ່ຂະຫຍາຍຕົວຂອງອົງການຈັດຕັ້ງແມ່ຍິງລາວ ທີ່ເປັນອົງການຈັດຕັ້ງໜຶ່ງສ້າງຕັ້ງຂຶ້ນແຕ່ຫົວທີ ພ້ອມໆກັບການກຳເນີດຂຶ້ນຂອງຮາກຖານການປະຕິວັດ (ໃນໄລຍະຕໍ່ຕ້ານບ່ອນໃດທີ່ເລີ່ມສ້າງເປັນຮາກຖານທີ່ໝັ້ນຂອງການປະຕິວັດກໍ່ໄດ້ມີການຈັດຕັ້ງຂອງສະມາຄົມແມ່ຍິງໄປພ້ອມ, ພະນັກງານ ຂອງອົງການຈັດຕັ້ງແມ່ຍິງກໍ່ເປັນຜູ້ທີ່ມີຄວາມຕື່ນຕົວປະຕິວັດມາຕັ້ງແຕ່ເລີ່ມຕົ້ນອົງການຈັດຕັ້ງແມ່ຍິງ, ເປັນພາຄີໜຶ່ງຂອງແນວໂຮມແຫ່ງຊາດ, ມີຮາກຖານຂອງຕົນຢູ່ທົ່ວເຂດປົດປ່ອຍ ເຖິງວ່າລະບົບການຈັດຕັ້ງແມ່ຍິງບໍ່ທັນແໜ້ນໜາປານໃດ ແຕ່ກໍ່ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການນຳພາຂະບວນການແມ່ຍິງຕໍ່ສູ້ກູ້ຊາດ ແລະ ໃນການປະຕິບັດສິດສະເໝີພາບຍິງຊາຍ”. ມາເຖິງປະຈຸບັນ ມີການຈັດຕັ້ງຮາກຖານແມ່ຍິງ 10.868 ຮາກຖານ, ໃນນັ້ນ, ຂັ້ນບ້ານມີ 7.987 ຮາກຖານ, ຮາກຖານອ້ອມຂ້າງແຂວງ ເມືອງ 2.881 ຮາກຖານ, ໃນນັ້ນ ມີສະມາຊິກສະຫະພັນແມ່ຍິງທົ່ວປະເທດ ຈຳນວນ 1.434.236 ຄົນ.

     ປະທານ ໄກສອນ ພົມວິຫານ ໂອ້ລົມຕໍ່ກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ I ວັນທີ 24/3/1984 ວ່າ: ແມ່ຍິງໄດ້ສ້າງຄຸນລັກສະນະອັນເປັນມູນເຊື້ອຂອງຕົນຂຶ້ນດັ່ງນີ້: 1. ແມ່ຍິງມີຄວາມດຸໝັ່ນຂະຫຍັນພຽນໃນການອອກແຮງງານ, ມີນໍ້າໃຈປະຢັດສັດທ່ຽງ (ການໃຊ້ຈ່າຍກໍ່ມີການຄິດໄລ່ຈົ່ງຢອມ, ຮັກສາມູນມັງໄວ້ໃຫ້ລູກເຕົ້າ); 2. ມີຄວາມບໍລິສຸດຜຸດຜ່ອງຮັກລູກແພງຜົວ, ຍອມທົນທຸກທົນຍາກ, ຍອມເສຍສະຫຼະ ເພື່ອຄວາມສຸກຂອງຄອບຄົວລູກຜົວ; 3. ມີນໍ້າໃຈເອື້ອເຟື້ອເພື່ອແຜ່, ຮັກແພງຊ່ວຍເຫຼືອຕຸ້ມຫໍ່ກັນ; 4. ມີນໍ້າໃຈຮັກຊາດແພງເຊື້ອ, ຮັກບ້ານເກີດເມືອງນອນ; 5. ມີກິລິຍາມາລະຍາດສຸພາບອ່ອນຫວານ, ຮັກສາມູນມໍລະດົກ ວັດທະນະທຳອັນດີງາມຂອງຊາດ. ແມ່ຍິງລາວຍັງມີບົດບາດໃນການອະນຸລັກວັດທະນະທຳອັນດີງາມຂອງຊາດຄື: ແມ່ຍິງມີບົດບາດສຳຄັນໃນການເບິ່ງແຍງດູແລເຮືອນຊານ; ບົດບາດສຳຄັນໃນການອະນຸລັກຮັກສາວັດທະນະທຳການນຸ່ງຖືທີ່ເປັນເອກະລັກຂອງແມ່ຍິງລາວ; ມີບົດບາດສຳຄັນໃນການຕໍ່າຫູກທໍໄໝ ແລະ ມີບົດບາດສຳຄັນໃນການລ້ຽງດູ ແລະ ສັ່ງສອນລຸກ.

     ໃນຕອນທ້າຍຂອງກອງປະຊຸມດັ່ງກ່າວ ສະຫາຍ ນາງ ສີບານ ສີສະອາດ ໄດ້ສະແດງຄວາມຊົມເຊີຍຕໍ່ສະຫະ ພັນແມ່ຍິງ ຄຈສພ ທີ່ໄດ້ຈັດກອງປະຊຸມໃນຄັ້ງນີ້ຂຶ້ນ ເຊິ່ງເປັນຫົວຂໍ້ທີ່ສຳຄັນຫຼາຍ ແລະ ໄດ້ດຳເນີນໄປດ້ວຍຜົນສຳເລັດຢ່າງຈົບງາມ, ໃນໂອກາດດັ່ງກ່າວ ສະຫາຍຍັງໄດ້ມີຄຳເຫັນເນັ້ນບາງດ້ານດັ່ງນີ້: ພາຍຫຼັງເຊື່ອມຊຶມສຳເລັດແລ້ວ ແມ່ຍິງ ຄຈສພ ທຸກສະຫາຍ ຕ້ອງເປັນເຈົ້າການໃນການຄົ້ນຄວ້າກຳແໜ້ນແນວຄິດ ໄກສອນ ພົມວິຫານ ກ່ຽວກັບອົງການຈັດຕັ້ງສະຫະພັນແມ່ຍິງ ແລະ ການອະນຸລັກມູນເຊື້ອວັດທະນະທຳ ນໍາໄປຜັນຂະຫຍາຍໃຫ້ປະກົດຜົນເປັນຈິງ; ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ມີທັດສະນະຫຼັກໝັ້ນການເມືອງໜັກແໜ້ນ ໄປຕາມອຸດົມການຂອງພັກ ມີຄຸນສົມບັດ, ສິນທຳປະຕິວັດ, ມີແບບແຜນການດຳລົງຊີວິດທີ່ປອດໃສ, ປະຢັດ ເປັນເຈົ້າການໃນການໃຊ້ຈ່າຍ ແລະ ບໍ່ຫຼິ້ນກິນຟຸມເຟືອຍ; ເອົາໃຈໃສ່ພັດທະນາຕົນເອງໃນທຸກດ້ານ; ພ້ອມກັນນັ້ນ ກໍ່ຕ້ອງເປັນເຈົ້າການເຂົ້າຮ່ວມການເຜີຍແຜ່, ເຊື່ອມຊຶມເອກະສານຕ່າງໆ ທີ່ທາງຄະນະພັກ ຄຈສພ ຈັດຂຶ້ນໃນແຕ່ລະໄລຍະ; ເອົາໃຈໃສ່ປະຕິບັດວຽກງານຂອງສະຫະພັນແມ່ຍິງ ເພື່ອພັດທະນາວຽກງານແມ່ຍິງ ແລະ ອົງການຈັດຕັ້ງສະຫະພັນແມ່ຍິງ ໂດຍຕິດພັນກັບການຍົກລະດັບຄວາມຮູ້, ຄວາມສາມາດວິຊາສະເພາະ ໃຫ້ຄຽງຄູ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນຂະແໜງການຂອງຕົນ ເພື່ອເຮັດຫຼ້ອນໜ້າທີ່ ທີ່ການຈັດຕັ້ງພັກ-ລັດມອບໝາຍໃຫ້ ມີຜົນສຳເລັດເປັນຢ່າງດີ...ຯ